طول دے کر مرے فسانے کو خود سمٹنا پڑا زمانے کو فرق ناز و نیاز میرے بعد کون سمجھائے گا زمانے کو کیسے کہہ دوں کہ دل ملول نہیں لب ترستے ہیں مسکرانے کو خود بدل جائے گا نظام حیات تم سہارا نہ دو زمانے کو میری بیداریاں تھیں مجھ تک ہی نیند کیوں آ گئی زمانے کو اس سے پوچھو عتیقؔ وجہ حیات جس نے چھیڑا ہے اس فسانے کو

غزل · Ghazal

paas-e-naamus-e-mohabbat kaa savaal aaya to

پاس ناموس محبت کا سوال آیا تو کہیں ان کو بھی کسی فکر میں ڈال آیا تو جن اندھیروں میں فروزاں تھا مری فکر کا چاند ان اندھیروں کی سیاست کو زوال آیا تو کر تو دوں تیرے جنوں خیز لبوں کی تشہیر اور اگر شیشۂ ادراک میں بال آیا تو شوق منزل تو مرے کام نہ آیا لیکن کتنی راہوں کے خم و پیچ نکال آیا تو دل میں وہ سوز و تب و تاب کہاں پھر بھی عتیقؔ زندگی کے کئی گوشے کو اجال آیا تو

غزل · Ghazal

aib-o-hunar se khelne vaalon ke shahr mein

عیب و ہنر سے کھیلنے والوں کے شہر میں میں گھر گیا ہوں تنگ خیالوں کے شہر میں ہم تو سیاہ بخت ہیں لیکن خطا معاف جو لوگ گم ہوئے ہیں اجالوں کے شہر میں یا رب یہ کیا کہ اور بھی بیگانہ ہو گئے آ کر وہ اپنے چاہنے والوں کے شہر میں وہ اک جواب تلخ دل بے قرار کو الجھا گیا ہے کتنے سوالوں کے شہر میں میرا ہی ذکر کیا ہے کوئی مطمئن نہیں اس زندگی سے کھیلنے والوں کے شہر میں کیا بات ہے ہر ایک یہاں تیرہ ذہن ہے بستے ہیں کیسے لوگ اجالوں کے شہر میں آتا نہیں ہے کوچۂ دل کا بھی کچھ خیال رہتا ہوں محو کس کے خیالوں کے شہر میں چھائی ہے مردنی سی یہ کیوں ہر طرف عتیقؔ جام حیات بانٹنے والوں کے شہر میں

غزل · Ghazal

vo ham nahin hain ki gulshan par ikhtiyaar ke baad

وہ ہم نہیں ہیں کہ گلشن پر اختیار کے بعد بہار کو بھی ترستے رہیں بہار کے بعد نظام دہر جو ہے منتشر تو ہونے دو کہ نظم دہر سنورتا ہے انتشار کے بعد ابھی تو صبح کی پہلی کرن ہی پھوٹی ہے جمال صبح ذرا دیکھنا نکھار کے بعد قدم قدم پہ ملے گا حیات نو کا سراغ بلا کشان محبت کو سیر دار کے بعد انہیں سے پوچھئے کیف حیات کیا شے ہے جو مطمئن ہیں غم زندگی سے پیار کے بعد در حبیب پہ بیٹھا ہوں سر جھکائے ہوئے تمام سلسلۂ ترک و اختیار کے بعد غم حیات و غم کائنات بھی ہے عزیز کچھ اپنی فکر بھی لیکن خیال یار کے بعد اجال دے جو رخ شام زندگی کو عتیقؔ وہ صبح آئے گی کس صبح انتظار کے بعد

غزل · Ghazal

mire labon pe gham-e-zindagi ki baat nahin

مرے لبوں پہ غم زندگی کی بات نہیں کچھ مجھ کو فکر علاج غم حیات نہیں میں آشنائے غم کائنات ہوں لیکن مرے ملال سے آگاہ کائنات نہیں غم حیات کو سینے سے جو لگا نہ سکے مری نظر میں وہ شائستۂ حیات نہیں بنائے حسن رخ کائنات ہم بھی ہیں تمہیں سے دل کشیٔ بزم کائنات نہیں ہیں زندگی کی بہاریں انہیں نصیب تو کیا جنہیں شعور چمن بندیٔ حیات نہیں کسے سنائیں غم زندگی کے افسانے یہاں کوئی بھی تو آسودۂ حیات نہیں تری جفائیں بھی مجھ کو عزیز ہیں لیکن یہ کیا کہ مجھ پہ تری چشم التفات نہیں بلا سے عشرت امروز خواب ہو کہ خیال عتیقؔ راحت فردا تو بے ثبات نہیں

غزل · Ghazal

intihaa-e-yaas-o-gham se jab guzar jaataa huun main

انتہائے یاس و غم سے جب گزر جاتا ہوں میں ہر قدم پر اک سکون قلب سا پاتا ہوں میں ساز غم پر جب کبھی کوئی غزل گاتا ہوں میں اک سراپا سوز کی تصویر بن جاتا ہوں میں ہر قدم پر ایک آفت ہر قدم پر اک بلا پھر بھی منزل کی طرف بڑھتا چلا جاتا ہوں میں پھر کسی تازہ پریشانی کو ہے میری تلاش پھر کسی کو ملتفت اپنی طرف پاتا ہوں میں اللہ اللہ مسلک مہر و محبت اے عتیقؔ آہ کوئی بھی کرے لیکن تڑپ جاتا ہوں میں

See all 17 Ghazals →

Similar Poets