Kaleem Haider Sharar

aaina-dar-aaina qad-aavari kaa karb hai

آئینہ در آئینہ قد آوری کا کرب ہے گمشدہ دانش وری ہے خود سری کا کرب ہے میرا دکھ یہ ہے کہ میں نا معتبر لشکر میں ہوں سر بہ نیزہ میں نہیں ہوں اک جری کا کرب ہے بھوک کو نسبت نہیں گیہوں کی پیداوار سے میرا دسترخوان خالی طشتری کا کرب ہے اک طرف یاروں کی یاری کا بھرم کھلتا ہوا اک طرف اخلاص کی بخیہ گری کا کرب ہے اپنے دروازے پہ بیٹھا سوچتا رہتا ہوں میں میرا گھر اجداد کی بارہ دری کا کرب ہے وہ زمانہ ہے کہ اب تار نفس بھی ہے گراں بعد کی منزل تو بس خوش پیکری کا کرب ہے وقت کی میزان پر بینائی خنداں ہے شررؔ کور بینوں میں بھی اب دیدہ وری کا کرب ہے

haqiqat hai ise maanein na maanein ghaTti baDhti hain

حقیقت ہے اسے مانیں نہ مانیں گھٹتی بڑھتی ہیں وہ جھوٹی ہوں کہ سچی داستانیں گھٹتی بڑھتی ہیں کسی پہلو سے کوئی تیر آ کر چاٹ جائے گا ہزاروں زاویے ہیں اور کمانیں گھٹتی بڑھتی ہیں فلک گیری کی خواہش بال و پر کو راکھ کر دے گی ہوس رانو پرندوں کی اڑانیں گھٹتی بڑھتی ہیں شکم سیری نے دسترخوان بچھوائے ہیں لوگوں سے مذاق ذائقہ سمجھو زبانیں گھٹتی بڑھتی ہیں بلندی اور پستی کا کوئی معیار طے کر لو زمیں تنگ ہو رہی ہے اور چٹانیں گھٹتی بڑھتی ہیں میں ان چاندی کے بازاروں پہ اپنے دانت کیا گاڑوں چمکتی پھیکی پڑتی سب دوکانیں گھٹتی بڑھتی ہیں شررؔ میں ایسی مٹی پر اساس فن نہیں رکھتا رسانوں کا بھروسہ کیا رسانیں گھٹتی بڑھتی ہیں

zinda rahne kaa bharam aa ke kahaan par TuuTaa

زندہ رہنے کا بھرم آ کے کہاں پر ٹوٹا اک ستارہ سا مری شہ رگ جاں پر ٹوٹا غیرممکن ہے مری خاک اڑاتا کوئی میں کہ خود اپنی تباہی کے نشاں پر ٹوٹا سود در سود مروت مری کام آئی ہے جب میں اخلاص کی میزان زیاں پر ٹوٹا زہر سا پھیل چکا ہے مری شریانوں میں کون سا حرف مری نوک زباں پر ٹوٹا سسکیاں بھر کے شررؔ کون وہاں روتا تھا خیمۂ خواب سر شام جہاں پر ٹوٹا

iraadon ki shikaston par sanaa-khvaani se pahchaanaa

ارادوں کی شکستوں پر ثنا خوانی سے پہچانا خدایا میں نے تجھ کو کتنی آسانی سے پہچانا کئی لوگوں نے پھلتے پھولتے پیڑوں سے جانا ہے مگر میں نے تجھے سبزے کی عریانی سے پہچانا مرے سجدے اسی دنیا میں میرے کام آئے ہیں مرے قاتل نے مجھ کو میری پیشانی سے پہچانا کبھی دیکھا کہ دل کیسے سکڑتا ہے ضرورت پر کبھی دنیا کو پیسوں کی فراوانی سے پہچانا رگ و پے میں در آتا ہے شررؔ ہر شعر کا نشہ غزل کو بارہا ترتیب جسمانی سے پہچانا

bahut thaa naaz jin par ham unhin rishton pe hanste hain

بہت تھا ناز جن پر ہم انہیں رشتوں پہ ہنستے ہیں ہمیں کیا رسم دنیا ہے کہ سب اپنوں پہ ہنستے ہیں ہم ایسے لوگ دیواروں پہ ہنسنے کے نہیں قائل مگر جب جی میں آتا ہے تو دروازوں پہ ہنستے ہیں دوانہ کر گیا آخر ہمیں فرزانہ پن اپنا کہ جن لوگوں کو رونا تھا ہم ان لوگوں پہ ہنستے ہیں اب اس کو زندگی کہئے کہ عہد بے حسی کہئے گھروں میں لوگ روتے ہیں مگر رستوں پہ ہنستے ہیں یہاں اپنا پرایا کچھ نہیں خوشبو پہ مت جاؤ گلوں میں پڑنے والے پھول گلدستوں پہ ہنستے ہیں سمجھنے والے کیا کیا کچھ سمجھتے ہیں شررؔ صاحب رگ معنی پھڑکتی ہے تو ہم لفظوں پہ ہنستے ہیں

anaa zada thaa kahin par kahin par aan-zada

انا زدہ تھا کہیں پر کہیں پر آن زدہ زمیں کی زد سے نکلنے تک آسمان زدہ یہاں پہ دشت و سمندر کی بات مت کرنا ہمارے شہر کا ہر شخص ہے مکان زدہ خیال و خواب کے موسم بدلنے والے ہیں ہجوم وہم و تصور میں ہے گمان زدہ تو بال و پر کی نمائش پہ حرف آ جاتا ہوا کا رخ نہ پلٹتا اگر اڑان زدہ ہمارے بعد ہمیں ڈھونڈنے کے سب رستے ہماری خاک میں مل جائیں گے نشان زدہ بھنور سے ڈوب کے ابھرا تو یہ کھلا مجھ پر سمندری تھیں ہوائیں میں بادبان زدہ سب اپنا حرف معانی بنا رہے ہیں شررؔ یہ لفظ لفظ تو صدیوں سے ہیں زبان زدہ