Syed Kamran Zubair Kami

tu jab nahin thaa saamne tere khayaal se
ai chaudhvin ke chaand bahalnaa paDaa mujhe

fikr-e-jahaan nahin hai umid-e-vafaa nahin
jiine kaa koi bhi to bahaana nahin rahaa

ghar ke sannaaTe tire halqa-e-aaghosh mein huun
mehrbaan tu ne mujhe dasht mein jaane na diyaa

marhun-e-iltifaat-e-faraavaani-e-sitam
aashufta-haal dasht mein laayaa gayaa mujhe

sab pe kaifiyyat 'ayaan hoti nahin hai 'ishq ki
mubtalaa-e-'ishq par khultaa hai ye raaz-e-nihaan

vo aksar dekhte hain baa-dil-e-naa-khvaasta mujh ko
nasib-e-dushmanaan yaaro yahaan tak baat aa pahunchi

aansu miri aankhon se nikal jaate hain aksar
vo daur-e-mohabbat kabhi bhulaa to nahin huun

darakhshaan chaand se rukh ne miri viraan aankhon mein
bahut se bhar diye jugnu chamak in mein ubhar aai

dil chaTakh jaataa hai meraa dekhtaa huun khud ko jab
barsar-e-paikaar shishe mein khaDe ik shakhs se

sard mausam jo guzaaraa thaa dil-e-viraan ne
buDhe bargad ne vo mausam na guzaaraa hogaa

meri nisbat se kare tujh ko na rusvaa duniyaa
khauf paltaa rahaa kal tujh se mulaaqaat ke baa'd

kahaan tak saath degi tu hamaaraa dasht-e-ghurbat mein
tujhe is qaid se ai zindagi aazaad karte hain