Tahir Adeem

har ek rasta-e-paayaab se nikalnaa hai
saraab-e-umr ke har baab se nikalnaa hai

hain dastaras mein abhi bhi 'taahir' uThaa ke ab is ko pi bhi Daalo
mushaahidon mein hi ho gai gar ye ThanDi chaae to kyaa karoge

faqat tum hi nahin naaraaz mujh se jaan-e-jaanaan
mire andar kaa insaan tak khafaa hai intihaa hai

mujhe vo chhoD kar jab se gayaa hai intihaa hai
rag-o-pai mein fazaa-e-karbalaa hai intihaa hai

rang kyaa ajab diyaa meri bevafaai ko
us ne yuun kiyaa ki mere khat jalaae uud mein

khirad ke laakh qaasid hain to honge
junun kaa naama-bar koi nahin hai

havaadis bhi vahin ham bhi vahin hain
magar ab chashm-e-tar koi nahin hai

ba-juz mere yahaan meri vafaa kaa
havaala mo'atabar koi nahin hai

use bhi parda-e-tahzib ko giraanaa hai
mujhe bhi paikar-e-naayaab se nikalnaa hai

nahin hai rahnaa use bhi bahaar mein 'taahir'
mujhe bhi mausam-e-shaadaab se nikalnaa hai

aankhon mein hai kaisaa paani band hai kyuun aavaaz
apne dil se puchho jaanaan meri chup kaa raaz