Zaki Tariq

'zaki' hamaaraa muqaddar hain dhuup ke kheme
hamein na raas kabhi aayaa saaebaan koi

gumaan hotaa hai mujh ko tumhaare aane kaa
havaa idhar se dabe paanv jab guzarti hai

ham bhi kahne lage hain raat ko raat
ham bhi goyaa kharaab hone lage

itaab-o-qahr kaa har ik nishaan bolegaa
main chup rahaa to shikasta makaan bolegaa

roz suntaa huun main hansne ki sadaa
kaun ye mere sivaa hai mujh mein

simTe hue jazbon ko bikharne nahin detaa
ye aas kaa lamha hamein marne nahin detaa

ajnabi khushbu ki aahaT se mahak uTThaa badan
qahqahon ke lams se khauf-e-khizaan raushan huaa

mere andar nihaan hai aks miraa
aaine mein hai aap kaa partav

darida-jaib garebaan bhi chaak chaahtaa hai
vo ishq kyaa hai jo daaman ko paak chaahtaa hai