aaina dekh kar jo itraayaa — Javed Mushiri

"tumhaare chehre ki chilmanon se ham apni aankhein utaar leinge savaal ye hai ki ratjagon kaa jamaal kab tak udhaar leinge malaal ye hai tumhaari yaadein hamein akelaa na kar sakeingi magar ye sach hai tumhaare bin bhi ham apnaa jivan guzaar leinge gharaz se koi gharaz nahin hai davaa-talab ye maraz nahin hai 'ilaaj puchheinge laakh tum se davaaein tum se hazaar leinge ye 'umr-e-rafta tiri talab mein bhaTak rahi hai sulag rahi hai guzaarni thi jo zindagi ab guzaarni hai guzaar leinge ye aaDi-tirchhi si kuchh lakirein chamak rahi hain hatheliyon par milaa nujumi jo qaa'ede kaa so ham bhi in ko sanvaar leinge"

"diyaa aandhiyon mein jalaane chale ho vafaa ki rivaayat nibhaane chale ho munaasib nahin hai ye 'ujlat-pasandi hatheli pe sarson jamaane chale ho vahi baat jis se hayaa un ko aae bataane chale ho sunaane chale ho thapak kar sulaayaa jinhein mushkilon se vahi aap armaan jagaane chale ho jinhein ruuTh jaane ki 'aadat buri hai unhein aap phir se manaane chale ho"

"jurm kuchh aur hai kuchh aur sazaa kaaTtaa huun roz pairon se main zanjir-e-anaa kaaTtaa huun aandhiyaan shor machaati hain guzar jaati hain aur main apne charaaghon se havaa kaaTtaa huun tum bhi majbur ho phir mil ke bichhaDne ke liye main bhi haathon ki lakiron kaa likhaa kaaTtaa huun kuchh chamakte hue jugnu hain miri aankhon mein aur main khvaab mein phulon ki qabaa kaaTtaa huun"

"be-manzari kaa 'ajab khvaab dekhtaa huun main har ek aankh mein tezaab dekhtaa huun main talaash karne chalaa huun main aap ki surat palaT palaT ke nae baab dekhtaa huun main bas ek zid thi talaatum se jang laDni hai so ab safine ko gharqaab dekhtaa huun main tumhaaraa hijr salaamat mujhe kami kyaa hai har ek zakhm ko shaadaab dekhtaa huun main jahaan pe naam-o-nasab takhtiyon se raushan hon vahaan pe khud ko hi kamyaab dekhtaa huun main tujhe to hijr mein sahraa hue zamaana huaa ye kis ki aankhon mein sailaab dekhtaa huun main"

"koi divaar hai na darvaaza aisaa bikhraa hai ghar kaa shiraaza sahn ke saath baT gae dil bhi ab kahaan aaegi havaa taaza sulh hi jang kaa sabab Thahri mukhtalif niklaa apnaa andaaza dard ki shaam Dhalne vaali hai zakhm hone lage tar-o-taaza be-sadaa chikhne se kyaa hogaa koi aavaaz hai na aavaaza apne purkhon kaa qarz hai 'jaaved' jis kaa bharnaa hai ham ko khamyaaza"

"sar par suraj naach rahaa hai dhuup paDi hai kone mein bas itnaa saa farq hai yaaro hone aur na hone mein pichhli rut ke pyaase patthar TuTeinge na bikhreinge tum ne kitni der lagaa di sab se mil kar rone mein vo raste mein haath chhuDaa kar apni manzil paa bhi gayaa ham ne saari 'umr ganvaa di jis ko paane khone mein hanste hanste dard ki daulat saunp gayaa vo chupke se tum bhi aakhir aa hi gae naa us ke jaadu-Tone mein tum yaadon ke diip jalaa kar chhat par baiTho khvaabon ke aur idhar masruf hai saavan pankh hamaare dhone mein aankhon kaa khaamosh samundar dil ko jal-thal kar degaa tishna-labi kuchh aur baDhegi ret se paanv bhigone mein"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"

"aakhiri hal thaa yahi pesh-e-nazar jaane diyaa ek gahri saans li phir khvaab mar jaane diyaa saarbaanaa de gavaahi mujh ko pyaari thi anaa rakh liyaa zaad-e-safar aur ham-safar jaane diyaa hazrat-e-naaseh ki khush-uftaadgi pe daad hai khud jidhar se aae the sab ko udhar jaane diyaa is harim-e-naaz mein yuun be-mahaabaa guftugu kuchh bharam rakkhaa to hotaa tum ko gar jaane diyaa tujh ko rokaa jaa rahaa thaa raushni thi jab talak shaam ke Dhalte samay suraj ko ghar jaane diyaa aankh sapne dekhti thi aansuon se kyon bhari chaahti to puchh leti main magar jaane diyaa dostaa qismat na ho to koshishein bekaar hain sabr kaa paimaana ham ne khud hi bhar jaane diyaa dil musir thaa baarhaa kuchh jaanchne ko ruk gae aakhirash us ne hamein baar-e-digar jaane diyaa"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"

"tire jamaal se ham runumaa nahin hue hain chamak rahe hain magar aaina nahin hue hain dhaDak rahaa hai tu ik ism ki hai ye barakat vagarna vaaqiye is dil mein kyaa nahin hue hain bataa na paaein to khud tum samajh hi jaao ki ham bilaa javaaz to be-maajraa nahin hue hain tiraa kamaal ki aankhon mein kuchh zabaan pe kuchh hamein to moajize aise ataa nahin hue hain ye mat samajh ki koi tujh se munharif hi nahin abhi ham ahl-e-junun lab-kushaa nahin hue hain ba-naam-e-zauq-e-sukhan khud-numaai aap karein ham is maraz mein abhi mubtalaa nahin hue hain hami vo jin kaa safar maavaraa-e-vaqt-o-vajud hami vo khud se kabhi jo rihaa nahin hue hain khud-aagahi bhi khaDi maangti hai apnaa hisaab junun ke qarz bhi ab tak adaa nahin hue hain kisi ne dil jo dukhaayaa kabhi to ham 'irfaan' udaas ho gae lekin khafaa nahin hue hain"