aaj kyon be-hijaab hai re tu — Adil Hera

"mire badan ko ghusl de ke paak kar diyaa gayaa phir is ke baad mujh ko zer-e-khaak kar diyaa gayaa jahaan pe thoDi der hi sahi vo aate the magar ye kyaa huaa ki khiDkiyon ko lock kar diyaa gayaa sitamgaron ke zulm se huaa ye faaeda hamein ki ham ko har tariqe se be-baak kar diyaa gayaa yahaan pe jhuuT hi kaa bas hai bol-baalaa har taraf hai jis ne haq ki baat ki halaak kar diyaa gayaa zariya ab koi nahin main un ko kaise khat likhun ki duur ghar ke paas se hai Daak kar diyaa gayaa bahut dinon ke baad dil 'hiraa' kahin lagaa magar phir ek hi ghaDi mein dil ko chaak kar diyaa gayaa"

"ai dil-e-naadaan na koi tu sunahre khvaab dekh band hotaa jaa rahaa hai ab vafaa kaa baab dekh un ke aane ki khabar baad-e-sabaa le aai hai ho rahaa hai dil miraa betaab pe betaab dekh chaand ke jalve bhi tujh ko aaeinge phike nazar ik nazar pahle tu us kaa chehra-e-zartaab dekh kyaa zaraa saa vaqt badlaa sab ne aankhein pher liin bebasi par muskuraate hain mire ahbaab dekh bhuuk kahti hai ki kar le aur thoDi koshishein aur thakan kahti hai chal ab chal ke koi khvaab dekh kis qadar karne lage ahl-e-khirad naadaaniyaan vo badal baiThe hain apnaa huliya-e-aadaab dekh ab to saahil bhi nazar aataa nahin hai duur tak bach nikalne ke 'hiraa' manjhdaar se asbaab dekh"

"har khushi hisse se mere jaise rukhsat ho gai mustaqil sahnaa ghamon ko meri aadat ho gai chaand taaron ki ziyaa bhi kam nazar aane lagi aap ke chehre ki jab mujh ko ziyaarat ho gai ab patangon ki tarah se niind meri ban gai mujh ko jab se shaaeri karne ki aadat ho gai jo muaafiq thaa miraa vo naa-muvaafiq ban gayaa kyaa zamaane mein zaraa si meri shohrat ho gai har koi us ko nigaah-e-qadr se dekhe yahaan paas jis ke thoDi daulat aur shohrat ho gai titliyon ko phuul ki jitni tamanna hai 'hiraa' us se bhi baDh kar mujhe teri zarurat ho gai"

"aankhon se ho rahi hai jo barsaat hi to hai mujh par kisi ki chashm-e-inaayaat hi to hai jo rafta-rafta utraa hai dil ke makaan mein koi nahin vo sirf tiri zaat hi to hai sab pesh aa rahe hain khulus-o-vafaa ke saath ye zindagi ki meri baDi baat hi to hai toDaa na ham ne sabr kaa daaman isi liye lambi hai gham ki raat magar raat hi to hai ye jhiil ye pahaaD ye jharne ye aabshaar jo kuchh hai sab khudaa ki inaayaat hi to hai be-ikhtiyaari aur ye be-taabiyaan 'hiraa' ye sab mohabbaton ki shuruaat hi to hai"

"ujDe hue dayaar kaa matlab samajh gae tum kaise intizaar kaa matlab samajh gae jo ajnabi the ishq-o-mohabbat ke lafz se sad-shukr hai vo yaar kaa matlab samajh gae phir khul ke apne ishq kaa izhaar kar diyaa jab vo bhi haal-e-zaar kaa matlab samajh gae hairat mein huun main dekh ke ye aaj dosto vo kaise dil-figaar kaa matlab samajh gae thoDi bahut idhar bhi hain kuchh be-qaraariyaan jo dil ke taar-taar kaa matlab samajh gae us ko bhi meri yaad ne majbur kar diyaa jab mausam-e-bahaar kaa matlab samajh gae nazrein jhukaae rakhnaa 'hiraa' un ke ru-ba-ru vo bhi tumhaare pyaar kaa matlab samajh gae"

"khushi zaruri nahin sirf zindagi ke liye mataa-e-gham bhi zaruri hai aadmi ke liye na hogaa raaegaan us shakhs kaa koi sajda jo dil se sar ko jhukaataa hai bandagi ke liye ye kaisi aag lagaai hai nafraton ki yahaan taras rahaa hai har ik shakhs ik hansi ke liye pata nahin tumhein ye kaam kitnaa mushkil hai rah-e-vafaa mein nikal aae aashiqi ke liye tu be-naqaab sar-e-bazm saaqiyaa aa jaa taras rahi hai miri aankh mai-kashi ke liye tumhaari yaad ki khushbu mili mujhe har pal uThaayaa jab bhi qalam main ne shaaeri ke liye had-e-nigaah yahaan dhuup hi kaa sahraa hai 'hiraa' bataao kahaan jaaein tishnagi ke liye"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"