aaj maail-ba-karam ik but-e-raanaai hai — Bakhtiyar Ziya

"aaj phir dasht koi aabla-paa maange hai khaar bhi taazgi-e-rang-e-hinaa maange hai zabt-e-gham dast-ras-e-aah-e-rasaa maange hai ye andheraa tire 'aariz ki ziyaa maange hai jaan-dahi tishna-labi aabla-paai be-sud dasht-e-ghurbat to kuchh is ke bhi sivaa maange hai phunk rahaa hai gham-e-hasti se vajud-e-insaan zindagi ab tire daaman ki havaa maange hai aap chupke se use zahr kaa pyaala de dein jo rivaayat se baghaavat kaa sila maange hai chaand siine se lagaae hai miraa naqsh-e-qadam aur suraj miri saanson ki sadaa maange hai"

"nikhat-o-rang na mausam ki havaa Thahri hai gul ki qismat mein ba-har-haal fanaa Thahri hai zakhm-e-dil khil uThe hanste hue phulon ki tarah ek lamhe ko jahaan baad-e-sabaa Thahri hai maut ko kahiye ilaaj-e-gham-e-hasti lekin zindagi kaun se jurmon ki sazaa Thahri hai aur mansur koi mashhad-e-hasti mein na thaa laaeq-e-daar jo ik meri anaa Thahri hai husn-e-mukhtaar hai har baat ravaa hai is ko fitrat-e-ishq to paaband-e-vafaa Thahri hai koi naghma koi jhankaar koi hosh-rubaa dil hi bahlaa lein tabiat jo zaraa Thahri hai"

"hujum-e-yaas mein jiinaa bhi ik 'azaab huaa yahi huaa ki mohabbat mein dil kharaab huaa chhupaa huaa hai jo chehra hayaa ke daaman mein na koi aaina us husn kaa javaab huaa baham ulajhte rahe shaikh-o-barhaman ab tak jo ham uThe to zamaane mein inqalaab huaa tumhaare hukm pe hasti miTaa chuke ham to magar hamaari vafaaon kaa kyaa javaab huaa miri navaa se larazne lagaa nizaam-e-kohan miraa payaam 'ziyaa' vajh-e-inqalaab huaa"

"na puchho vajh meri chashm-e-tar ki miyaan phir gir gai divaar ghar ki ye maanaa dhul gayaa suraj saron se mire aangan ki dhuup ab tak na sar ki jabin tar khushk-lab talvon mein chhaale yahi rudaad hai apne safar ki badi neki izaafi masale hain hukumat hai dilon par sirf Dar ki gumaanon kaa muqaddar hai bhaTaktaa yaqin ne har muhim duniyaa ki sar ki na saayaa hai na shaakhon mein samar hain zarurat kyaa hai ab sukhe shajar ki jhulasti dhuup baarish sard raatein ba-har-surat 'ziyaa' ham ne basar ki"

"koi khadsha hai na tufaan balaa kuchh bhi nahin ab na ghamza hai na andaaz-o-adaa kuchh bhi nahin ishq kahte hain kise husn hai kyaa kuchh bhi nahin meri aankhein tiri surat ke sivaa kuchh bhi nahin kab se viraan paDi hai mire dil ki duniyaa koi naghma kisi paael ki sadaa kuchh bhi nahin zahr se kam nahin ye saaghar-e-mai mere liye tu nahin hai to ye mausam ye fazaa kuchh bhi nahin tere chehre pe qayaamat hai hayaa ki surkhi rang-e-gul rang-e-shafaq rang-e-hinaa kuchh bhi nahin"

"chaliye kahin sahraa hi mein ab khaak uDaaein basti mein to sab jal gaiin khvaabon ki ridaaein bechain hai muztar hai pareshaan hai ye ruuh kab tak ise ehsaas ki suuli pe chaDhaaein aankhon mein paDhi jaati hai saail ki zarurat chehre se suni jaati hain khaamosh sadaaein main vaqt ki raftaar kaa rukh moD rahaa huun vo log jo Darte hain mire saath na aaein munh moD rahe hain jo 'ziyaa' jahd-o-amal se jaa kar dar-e-taqdir ki zanjir hilaaein"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"

"aakhiri hal thaa yahi pesh-e-nazar jaane diyaa ek gahri saans li phir khvaab mar jaane diyaa saarbaanaa de gavaahi mujh ko pyaari thi anaa rakh liyaa zaad-e-safar aur ham-safar jaane diyaa hazrat-e-naaseh ki khush-uftaadgi pe daad hai khud jidhar se aae the sab ko udhar jaane diyaa is harim-e-naaz mein yuun be-mahaabaa guftugu kuchh bharam rakkhaa to hotaa tum ko gar jaane diyaa tujh ko rokaa jaa rahaa thaa raushni thi jab talak shaam ke Dhalte samay suraj ko ghar jaane diyaa aankh sapne dekhti thi aansuon se kyon bhari chaahti to puchh leti main magar jaane diyaa dostaa qismat na ho to koshishein bekaar hain sabr kaa paimaana ham ne khud hi bhar jaane diyaa dil musir thaa baarhaa kuchh jaanchne ko ruk gae aakhirash us ne hamein baar-e-digar jaane diyaa"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"tire jamaal se ham runumaa nahin hue hain chamak rahe hain magar aaina nahin hue hain dhaDak rahaa hai tu ik ism ki hai ye barakat vagarna vaaqiye is dil mein kyaa nahin hue hain bataa na paaein to khud tum samajh hi jaao ki ham bilaa javaaz to be-maajraa nahin hue hain tiraa kamaal ki aankhon mein kuchh zabaan pe kuchh hamein to moajize aise ataa nahin hue hain ye mat samajh ki koi tujh se munharif hi nahin abhi ham ahl-e-junun lab-kushaa nahin hue hain ba-naam-e-zauq-e-sukhan khud-numaai aap karein ham is maraz mein abhi mubtalaa nahin hue hain hami vo jin kaa safar maavaraa-e-vaqt-o-vajud hami vo khud se kabhi jo rihaa nahin hue hain khud-aagahi bhi khaDi maangti hai apnaa hisaab junun ke qarz bhi ab tak adaa nahin hue hain kisi ne dil jo dukhaayaa kabhi to ham 'irfaan' udaas ho gae lekin khafaa nahin hue hain"