baat kab tak zabaan mein Thahre — Basharat Gill

"agar jaanaa zaruri thaa to chupke se chale jaate ki ik khush-fahmi si rahti sahaare jis ke ji paate abhi bhi vaqt lagtaa hai abhi bhi fan nahin kaamil agarche 'umr guzri hai hamein is dil ko bahlaate raho apne hi ghar mein tum paraae fard ke maanind sitam dekho taqaaza hai raho is par bhi itraate samaa'at ne Duboyaa hai gulon ki siskiyaan sun kar na kaanon tak sadaa aati na aansu aankh tak aate ye ‘ahd-e-kam-nigaahi hai yahaan shikva nahin kaafi kahaan shikve shikaayat hain kisi patthar ko kumhlaate"

"dil par jami paDi hai kai dilbaron ki khaak har samt uD rahi hai gae mausamon ki khaak ham ko bhi hissa dijiye ham bhi hain hissa-daar sar mein hamaare Daaliye ujDe gharon ki khaak rasta bhi dhuul ho gayaa manzil bhi ik ghubaar aapas mein baanT lijiye ab rahbaron ki khaak dariyaa ke paas hote koi tishna-lab mire uDti hai phir vahaan pe sadaa paaniyon ki khaak saston ke haath aa gai saste mein bech di varna to jaan se mahngi thi mere baDon ki khaak"

"hosh jab jaae to pyaare bhi kahaan dikhte hain phire dariyaa ko kinaare bhi kahaan dikhte hain jab muridi hi kisi raat ki kar li jaae aise mein din ke ishaare bhi kahaan dikhte hain aap ke saath to ham dekh liyaa karte the ab hamein chaand sitaare bhi kahaan dikhte hain kandhe phir chaar hon chhe aaTh ki das baarah hon mar gae hon to sahaare bhi kahaan dikhte hain jo kabhi dard ko bhi dekh liyaa karte the ab unhein dard ke maare bhi kahaan dikhte hain"

"dil ko nahin hai 'ilm ki dhaDkan kidhar gai aise guzar rahi hai ki jaise guzar gai dikhtaa nahin jo chaahe faqat us ko dekhnaa dikhtaa hai jo kab us ki taraf hai nazar gai ab janvari ki dhuup bhi lagti hai june si sar se tire khayaal ki chaadar utar gai vo khvaahish-e-visaal thi yaa khushk ret thi jitnaa sameTaa us ko vo utnaa bikhar gai laalach faqat gunaah hai jannat kaa chaahe ho ye baat sun ke khvaahishon ki huur mar gai"

"tire khayaal se duniyaa taraash saktaa huun magar kahaan koi tujh saa taraash saktaa huun ye mo'jiza bhi mohabbat ne de rakhaa hai mujhe ki pyaas joDun to dariyaa taraash saktaa huun mire vujud mein maujud hain mire apne khulun to puuraa qabila taraash saktaa huun jo e'tibaar nahin hai to aazmaa mujh ko akele-pan se main mela taraash saktaa huun iraada kar to sahi mere paas aane kaa rukaavaTon se bhi rasta taraash saktaa huun"

"ye zulm-o-jabr ke mausam mein ho banjar nahin jaati nazar-andaaz hone se sadaaqat mar nahin jaati nigah vaise to puure shahr ki nigraan Thahri hai magar apne garebaan ki taraf aksar nahin jaati kabhi mat bhuul karnaa dil kahin par bhuul aane ki paDe ik baar jo 'aadat vo jivan-bhar nahin jaati na jaane mere siine mein ye kaisaa khauf paltaa hai jo baahar saans aa jaae vo phir andar nahin jaati hamesha se hi tanhaai hamaare saath phirti hai hai shaayad ye bhi be-ghar tab hi apne ghar nahin jaati"

"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"

"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"

"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"