barpaa kisi din mahfil-e-tanhaai kareinge — Amir Hamza Saqib

"pahra paani pe hai aur ju-e-sitam jaari hai zakhm-khurda hain magar jang kahaan haari hai mujh se puchhaa na karo shaghl-e-junun ki baabat tum se fursat hai miri jaan so bekaari hai tu idhar kaise nikal aai hai duniyaa-daari jazba-e-shauq ki is samt 'amal-daari hai gardish-e-shaam-o-sahar se bhi koi farq paDaa daaera-vaar mujhe teri hi didaari hai lazzatein zahr-bujhaa tiir hui jaati hain kyaa miri ruh-e-badan jism se inkaari hai aarzu hoti hai rukhsat kisi dulhan ki tarah jashn-e-shaadi bhi 'ajab rasm-e-‘azaa-daari hai"

"dilon ki tarh ragon mein lahu dhaDaktaa hai ki aabla hai mohabbat kaa jo tapaktaa hai rahe kahin bhi kahin duur mujh se tu chhup jaae mire khayaalon mein chehra tiraa damaktaa hai ye jism-o-ruh ki gahraaiyon mein utregaa ye dard vo nahin aankhon se jo chhalaktaa hai gunaahgaar na ban dil mire khudaa ke liye khayaal-e-yaar kaa daaman koi jhaTaktaa hai siyaah ho gae sab sabz-o-tar mire din raat vo chaand chhat pe kisi aur ki chamaktaa hai tumhaaraa lutf-o-karam ham faqir logon par kisi gharib ki chhat ki tarah Tapaktaa hai"

"badan ke daf par lahu bahaa le de raft raftan thirak rahaa hai ye kaun naddaaf andar andar tamaam ruui dhunak rahaa hai ham apne ruyaa-e-'ishq saare jalaa ke khaashaak kar to deinge magar vo ik khvaab jo musalsal hamaari aankhon ko tak rahaa hai farishte ujle paron se sar-sabz fasl-e-rahmat bikherte hain gharib dahqaan hikaayaton se zamin ke daaghon ko Dhak rahaa hai main apni tanhaaiyon ke raagon mein apni vahshat ko Dhaaltaa huun ye meri saanson ke zer-o-bam mein tumhaaraa dil kyon dhaDak rahaa hai azal abad hast-o-bud main tu sab ik ikaai mein Dhal rahe hain nazar pe thaa manzaron kaa parda so ab ye parda sarak rahaa hai"

"gard-baad-e-sharaar hain ham log kis ke ji kaa ghubaar hain ham log aa ki haasil ho naaz-e-‘izz-o-sharaf aa tiri rahguzaar hain ham log be-kajaava hai naaqa-e-duniyaa aur zakhmi savaar hain ham log jabr ke baab mein farozaan hain haasil-e-ikhtiyaar hain ham log phir badan mein thakan ki gard liye phir lab-e-ju-e-baar hain ham log chashm-e-nargis magar 'alil bhi hai kis liye be-kanaar hain ham log"

"koi mahtaab-e-digar hai mire andar tujh saa so miraa daagh-e-mohabbat hai munavvar tujh saa niim ke peD se shahtut kise miltaa hai sab kaa hotaa nahin ai jaan muqaddar tujh saa maslahat-bin mire lashkar ke jiyaale saare hausla laaein kahaan se dil-e-asghar tujh saa zahr piinaa dur-e-naayaab luTaate rahnaa zarf kab mujh ko mayassar hai samundar tujh saa 'ishq bartaa hi nahin tu ne abhi tak 'saaqib' tis pe daa'vaa hai nahin koi sukhan-var tujh saa"

"ab kahaan kaa junun ki mar rahiye dasht-o-sahraa hain tang ghar rahiye mil hi jaaegaa ghairat-e-firdaus ism-e-jaan paDhiye raah par rahiye aagahi khuun chuus leti hai chhoDiye jo ho baa-khabar rahiye apni gudDi mein mast hai ye malang daavar-e-zar miyaan udhar rahiye shahr-e-khubaan-e-sabz-rang kahaan kis kharaabe mein ziist kar rahiye ku-e-jaanaan mein kam se kam 'saaqib' aabru rakhiye beshtar rahiye"

"zindagi bojhal hui aazaar se jism jhuktaa jaa rahaa hai baar se doston ne is qadar dhoke diye aur raghbat baDh gai aghyaar se zindagi kaa ik nayaa imkaan huaa ik daricha khul gayaa divaar se ab bayaan kaise karun rudaad-e-gham kaam mushkil hai dil-e-naa-chaar se hijr ki raaton mein bahtaa hi rahaa ek naala chashm-e-dariyaa-baar se misl-e-majnun regzaaron mein rahe sar paTakte ret ki divaar se ham asiraan-e-mohabbat hain yahaan uljhe hain ab gesu-e-khamdaar se 'qalb' teri ghazlein yuun shaadaan karein dard nikle hai tire ashaar se"

"raakh ke Dher pe kyaa shoala-bayaani karte ek qisse ki bhalaa kitni kahaani karte husn itnaa thaa ki mumkin hi na thi khud-nigari ek imkaan ki kab tak nigaraani karte shola-e-jaan ko bujhaate yunhi qatra qatra khud ko ham aag banaate tujhe paani karte phuul saa tujh ko mahaktaa huaa rakhte shab bhar apne saanson se tujhe raat ki raani karte naddiyaan dekhein to bas sharm se paani ho jaaein chashm-e-khun-basta se paidaa vo ravaani karte sab se kahte ki ye qissa hai puraanaa saahab aah ki aanch se tasvir puraani karte dar-o-divaar badalne mein kahaan ki mushkil ghar jo hotaa to bhalaa naql-e-makaani karte koi aa jaataa kabhi yunhi agar dil ke qarib ham tiraa zikr pae-yaad-dahaani karte sach to ye hai ki tire hijr kaa ab ranj nahin kyaa dikhaave ke liye ashk-fishaani karte dil ko har lahza hi di aql pe ham ne tarjih yaar-e-jaani ko kahaan dushman-e-jaani karte shab isi tarah basar hoti hai meri 'irfaan' harf-e-khush-rang ko andoh-e-maaani karte"

"chaand bhi khoyaa khoyaa saa hai taare bhi khvaabida hain aaj fazaa ke bojhal-pan se lahje bhi sanjida hain jaane kin kin logon se is dard ke kyaa kyaa rishte the hijr ki is aabaad saraa mein sab chehre naadida hain itne barson baad bhi donon kaise TuuT ke milte hain tu hai kitnaa saada-dil aur ham kitne pechida hain sun jaanaan ham tark-e-taalluq aur kisi din kar leinge aaj tujhe bhi ujlat si hai ham bhi kuchh ranjida hain kaanon mein ik sargoshi hai be-maani si sargoshi aankhon mein kuchh khvaab saje hain khvaab bhi umr-rasida hain ghar ki vo makhdush imaarat gir ke phir taamir hui ab aangan mein peD hain jitne saare shaakh burida hain is basti mein ek saDak hai jis se ham ko nafrat hai us ke niche pagDanDi hai jis ke ham girvida hain"

"ek taarik khalaa us mein chamaktaa havaa main ye kahaan aa gayaa hasti se saraktaa huaa main shola-e-jaan se fanaa hotaa huun qatra qatra apni aankhon se lahu ban ke Tapaktaa huaa main aagahi ne mujhe bakhshi hai ye naar-e-khud-soz ik jahannam ki tarah khud mein bhaDaktaa huaa main muntazir huun ki koi aa ke mukammal kar de chaak par ghumtaa bal khaataa daraktaa huaa main majmaa ahl-e-haram naqsh-ba-divaar udhar aur idhar shor machaataa huaa baktaa huaa main mere hi dam se mili saaat-e-imkaan use vaqt ke jism mein dil ban ke dhaDaktaa huaa main be-niyaazi se miri aate hue tang ye log aur logon ki tavajjoh se bidaktaa huaa main raat ki raat nikal jaataa huun khud se baahar apne khvaabon ke taaaqub mein humaktaa huaa main aisi yakjaai ki miT jaae tamiz-e-man-o-tu mujh mein khiltaa huaa tu tujh mein mahaktaa huaa main ik to vo husn-e-junun-khez hai aalam mein shuhud aur ik husn-e-junun-khez ko taktaa huaa main ek aavaaz paDi thi ki koi saail-e-hijr? aan ki aan mein pahunchaa thaa lapaktaa huaa main hai kashid-e-sukhan-e-khaas vadiat mujh ko ghumtaa phirtaa huun ye itr chhiDaktaa huaa main raaz-e-haq faash huaa mujh pe bhi hote hote khud tak aa hi gayaa 'irfaan' bhaTaktaa huaa main"

"kis ajab saaat-e-naayaab mein aayaa huaa huun tujh se milne main tire khvaab mein aayaa huaa huun phir vahi main huun, vahi hijr kaa dariyaa-e-amiq koi dam aks-e-sar-e-aab mein aayaa huaa huun kaise aaine ke maanind chamaktaa huaa main ishq ke shahr-e-abad-taab mein aayaa huaa huun meri har taan hai az-roz-e-azal taa-ba-abad ek sur ke liye mizraab mein aayaa huaa huun koi parchhaain kabhi jism se karti hai kalaam? be-sabab saaya-e-mahtaab mein aayaa huaa huun har guzarte hue lamhe mein Tapaktaa huaa mein dard huun, vaqt ke aasaab mein aayaa huaa huun kaisi gahraai se niklaa huun adam ki 'irfaan' kaise paayaab se taalaab mein aayaa huaa huun"

"dil mubtalaa-e-hijr rifaaqat mein rah gayaa lagtaa hai koi farq mohabbat mein rah gayaa is ghar ke do makin the ik peD aur main ye hijr to kisi ki sharaarat mein rah gayaa ik baar mana karti hui shaam se to puchh jo bhi judaa huaa vo haqiqat mein rah gayaa mumkin thaa tujh ko chhin hi letaa jahaan se lekin main kyaa karun main mohabbat mein rah gayaa ab tu hi meri khaali hatheli ki laaj rakh mujh se to koi farq ibaadat mein rah gayaa tujh par hai koi zoam na khud par yaqin 'nadim' kuchh din kaa ham mein pyaar to aadat mein rah gayaa"