be-ikhtiyaar ham jo sar-e-bazm ro diye — Mahendra Partap Chand

"main ne kab apni vafaaon kaa sila maangaa thaa ik tabassum hi tiraa bahr-e-khudaa maangaa thaa kyaa khabar thi miri nindein hi ujaD jaaeingi main ne khoe hue khvaabon kaa pataa maangaa thaa dast-e-gul-chin ne bhi gulshan se vahi phuul chunaa main ne jis gul ke liye dast-e-sabaa maangaa thaa shiddat-e-gham mein duaa ki thi tujhe bhulne ki ab bhare zakhm to naadim huun ye kyaa maangaa thaa bas isi baat pe barham hai zamaana mujh se apne bad-khvaahon kaa bhi main ne bhalaa maangaa thaa ik guzaarish bhi na ho paai qubul us ke huzur ghaaliban main ne hi kuchh had se sivaa maangaa thaa chuDiyaan TuTin to zakhmon se lahu-rang hui jis hatheli ne zaraa rang-e-hinaa maangaa thaa tu ne har gham se navaazaa hai tiraa khaas karam mujh ko to ye bhi nahin yaad ki kyaa maangaa thaa aafatein sahne kaa yaaraa bhi to detaa yaa-rab aur to kuchh bhi nahin is ke sivaa maangaa thaa ye alag baat milaa karb-e-musalsal varna ham ne jo maangaa ba-sad sidq-o-safaa maangaa thaa zehn par 'chaand' phir ik barq si lahraane lagi dil ne maazi ke nihaan-khaanon se kyaa maangaa thaa"

"tariq-e-ishq mein barbaad honaa paDtaa hai gulon ki chaah mein kaanTon pe sonaa paDtaa hai bas ek lamha-e-raaz-o-niyaaz ki khaatir bashar ko muddaton chhup-chhup ke ronaa paDtaa hai zamir bech ke mansab to mil hi jaaegaa vaqaar pahle magar is mein khonaa paDtaa hai hai bad-lihaaz ye duniyaa koi kahaan jaae qadam qadam pe yahaan khvaar honaa paDtaa hai ye faaqa-kash ki jinhein haif khud-farebi mein shikam ki seri ko paani bilonaa paDtaa hai maaashre kaa ho naasur yaa badan kaa ghaav ilaaj ke liye nashtar chubhonaa paDtaa hai pasaare haath to phirte ho maal-o-zar ke liye bil-aakhir un se magar haath dhonaa paDtaa hai paraae dard mein hotaa nahin sharik koi ghamon ke bojh ko khud aap Dhonaa paDtaa hai ye sach hai 'chaand' shagufta ghazal jo kahni ho qalam ko khun-e-jigar mein Dubonaa paDtaa hai"

"fareb-e-nau ke bhanvar mein utaartaa hai mujhe ye kaun pichhle pahar phir pukaartaa hai mujhe shikasta-haal huun ranj-o-alam se chuur huun main nigaah-e-lutf se ab kyaa sanvaartaa hai mujhe nazar ye apni chaDhaataa huun jis qadar us ko usi qadar vo nazar se utaartaa hai mujhe main kab kaa Duub chukaa huun use khabar hi nahin jo saahilon se abhi tak pukaartaa hai mujhe usi ki yaad hai meri hayaat kaa haasil jo be-niyaaz taghaaful se maartaa hai mujhe main sulh-o-amn kaa shaidaai huun mire rahbar fasaad-o-fitna pe tu kyuun ubhaartaa hai mujhe milaa hai muddaton ke baa'd kuchh gharaz hogi kis inkisaar se dekho nihaartaa hai mujhe use main khaas karam mein shumaar kartaa huun jo tu maraahil-e-gham se guzaartaa hai mujhe vo chaahtaa hai guhar-yaab ho ke ubhrun main samundaron ki jo tah tak utaartaa hai mujhe punam ki raat kaa ye faiz nur-afshaan 'chaand' kisi hasin khataa par ubhaartaa hai mujhe"

"chilchilaati dhuup manzil duur tanhaa raaste dekhte hain ham faqiron kaa tamaashaa raaste maslahat-aamez hai rasm-e-vafaa bhi aaj-kal dosti ki aaD mein nikle hain kyaa kyaa raaste shart hai azm-e-javaan zauq-e-safar tark-e-maqaam manzilein baDh kar kareingi khud hi paidaa raaste ho rahi hai aaj phir mahsus yaadon ki chubhan Das rahe hain aaj phir mujh ko ye tanhaa raaste 'chaand' apni ziist ik bahte hue dariyaa si hai pattharon mein bhi jo kar letaa hai paidaa raaste"

"zabaan kaa paas hai to qaul sab nibhaane hain agar mukarne pe aauun to sau bahaane hain tir-e-nigaah ke raste sabhi nae hain magar hamaare taur-tariqe sabhi paraae hain na raas aai hamein aap ki adaa koi sitam hai us pe ki ham aap ke divaane hain ye kyaa ki hausla tum ne abhi se haar diyaa abhi to vaqt ne kuchh aur gul khilaane hain siyaah-raat ki taarikiyaan bajaa lekin naveli subh ke manzar 'ajab suhaane hain har ek samt balaaon kaa ik hujum saa hai tamaam hausle ab dil ko aazmaane hain nayaa to kuchh bhi nahin teri daastaan mein 'chaand' vahi hain dard ke qisse vahi fasaane hain"

"jazba-e-shauq ko is taur ubhaaraa jaae ham jidhar jaaein udhar un kaa nazaaraa jaae aapsi rishton ki khushbu ko koi naam na do is taqaddus ko na kaaghaz par utaaraa jaae saikDon naam tire aur hain be-naam bhi tu kaun se naam se ab tujh ko pukaaraa jaae raqs karti hai lahakti hai ajab masti mein kashti-e-dil ke bhanvar mein jo utaaraa jaae meri ghairat ko kisi taur gavaaraa hi nahin tang-dasti mein bhi haath apnaa pasaaraa jaae dil ke soe hue armaanon ne angDaai li zindagi aa tujhe shishe mein utaaraa jaae subh-e-raushan ko to aanaa hai vo aaegi zarur is bharose pe shab-e-gham ko guzaaraa jaae aaina dekh ke naahaq ye bigaDnaa kaisaa gard aaine pe hai us ko utaaraa jaae apne purkhon ki inaayaat ki taazim karo ye hai vo qarz jo sadiyon na utaaraa jaae aaj ke daur mein vaajib hai yahi 'chaand' ki ham saath dein us kaa jidhar vaqt kaa dhaaraa jaae"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"kal shab dil-e-aavaara ko siine se nikaalaa ye aakhiri kaafir bhi madine se nikaalaa ye fauj nikalti thi kahaan khaana-e-dil se yaadon ko nihaayat hi qarine se nikaalaa main khuun bahaa kar bhi huaa baagh mein rusvaa us gul ne magar kaam pasine se nikaalaa Thahre hain zar-o-sim ke haqdaar tamaashaai aur maar-e-siyah ham ne dafine se nikaalaa ye soch ke saahil pe safar khatm na ho jaae baahar na kabhi paanv safine se nikaalaa"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"