chaman mein dekh ghunchon ko javaani apni yaad aai — Hakeem Aagha Jan Aish

"ye havaa kaisi chali barham zamaana ho gayaa haal-e-dehli bazm-e-aalam mein fasaana ho gayaa dil kisi fard-e-bashar kaa khaali is gham se nahin gham ye shaae ku-ba-ku khaana-ba-khaana ho gayaa har sar-e-mizhgaan na ho favvaara-e-khun kis tarah gham-zadon ke dil mein jab gham kaa khazaana ho gayaa ek ho to roiye kis kis ko roein yaad kar dekh kar us haadisa ko dil divaana ho gayaa dekhte hi dekhte aankhon mein aage apne yaan dam ke dam mein aur hi kuchh kaarkhaana ho gayaa aah gulgun-e-bahaar-e-gulshan dehli ko 'aish' mauja-e-baad-e-khizaan kyaa taaziyaana ho gayaa"

"aap ke ishq mein ham se to zamaana chhuTaa tum se afsos na ik ghair kaa milnaa chhuTaa be-hijaabaana the baiThe hue aghyaar ke paas dekhte hi mujhe daalaan kaa parda chhuTaa rind to rind aji zaahid-o-vaaiz se bhi to dekhte hi use tasbih-o-musalllaa chhuTaa havas-e-dil mein khudaa jaane ki kyaa lazzat hai ki jo lab se na kabhi harf-e-tamannaa chhuTaa taank-jhaank aap ki vaisi hi buDhaape mein bhi hai 'aish' buDhe bhi hue par vo na lapkaa chhuTaa"

"tujh mein us gul se rang-o-bu kam hai vo ziyaada hai is mein tu kam hai ho koi kyon mughaan kaa minnat-kash apnaa piine ko kyaa lahu kam hai dil se insaan ke ye hoti kab havas-o-hirs-o-aarzu kam hai ahl-e-ghairat ko ai falak kyaa kuchh marg hai minnat-e-adu kam hai dekh kar us bahaar-e-khubi ko ho gayaa gul kaa rang-o-bu kam hai baat baaqi hai aur kaun si 'aish' kyaa hui us se guftugu kam hai"

"kaifiyyat aisi hai nigah-e-mast-e-khvaab mein zaahid bhi dekh le to nahaave sharaab mein kyon kyaa kaheinge hazrat-e-yusuf javaab mein chori kiyaa hai dil jo zulekhaa kaa khvaab mein honTon ko tar to karte ho qadh-e-sharaab mein aisaa na ho ki aag lage aaftaab mein hai josh-e-girya ab bhi vo chashm-e-pur-aab mein dariyaa ke dam ko band kiyaa hai habaab mein likkhaa hai aashiqon ne ye dil ki kitaab mein hain pand mana sunne mohabbat ke baab mein chin-bar-jabin ho kis kaa paDaa aks aab mein is tarah mauj-e-bahr jo hai pech-o-taab mein bu aur maza vo hai tire munh ke luaab mein goyaa ghulaa hai qand-e-mukarrar gulaab mein shaayad ki azm-e-kucha-e-jaanaan hai dil ko aaj bhejaa hai pahle jaan ko jo paa-turaab mein gardish hai us ki chashm ko hasti mein yaa kahin nargis kaa phuul tair rahaa hai sharaab mein apnaa to vaqt yaad karo tum ne shaikh ji kyaa kyaa maze uDaae hain ahd-e-shabaab mein suntaa hai ham-nashin nigah-e-naaz be-tarah ghar kar gai hai is dil-e-khaana-kharaab mein chechak ke daagh us rukh-e-taabaan pe dekh lo taare khile na dekhe hon gar aaftaab mein mat ghusl diijo dast-e-hinaai kaa huun shahid nahlaa chukaa hai dashna mujhe khun-e-naab mein le chakh to shokhi-e-lab-o-namkini-e-zaqan kyaa khuub nuun mirch hain dil ke kabaab mein us ki si kuchh yahin nahin kahte hain daad-gar sab mil ke vaan bhi cheind kareinge hisaab mein ab yaan se kaabe khaak uDaane chale hain shaikh bahr-e-savaab khaak paDe is savaab mein baatein sunaa sunaa ke Daraaeinge apne saath zaahid na saaniyo tu kisi ko azaab mein miltaa nahin kuchh aur gar ai chaaraagar tujhe laachaar kuchh to chain paDe iztiraab mein zakhmon pe dil ke suda-e-almaas hi chhiDak hal kar ke ho so ho namak-o-mushk-e-naab mein zabt-e-fughaan mein Dar hai mujhe 'aish' dil kahin siine se baahar aa na paDe iztiraab mein"

"jaan-e-muztar ko na ho kyuun dil-e-betaab se haz hotaa ahbaab ko hai sohbat-e-ahbaab se haz nigah-e-mast se paataa hai vo dil kaifiyyat hoe makhmur ko jis tarah mai-e-naab se haz kyaa kahun furqat-e-jaanaan mein ki jo guzre hai puchhe ab is kaa koi maahi-e-be-aab se haz ahl-e-dil paate hain jamiyyat-e-dil se lazzat ahl-e-duniyaa ko hai jamiyyat-e-asbaab se haz dekh kar ru-e-butaan jaan mazaa paati hai andalibon ko na ho kyuun gul-e-shaadaab se haz kartaa bad-haz hai faqat taala-e-bedaar ko khvaab varna har jaagne vaale ko milaa khvaab se haz jab na ho saath vo mah-ru shab-e-mahtaab mein 'aish' kyaa uThe khaak bataao shab-e-mahtaab se haz"

"yuun baat kisi ki ham kab yaar uThaate hain dil tum ko diyaa is se laachaar uThaate hain ham matlab-e-dil chaahein gardun se ye kyaa mumkin aazaad-manash us ke kab aar uThaate hain bahkaane se ghairon ke kyaa kiije ilaaj is kaa har baat mein vo mujh se takraar uThaate hain munh kyaa hai falak teraa koh-e-gham-e-hijraan kaa ye hazrat-e-dil hi hain jo baar uThaate hain ham tufta-jigar zaalim hai kuchh bhi khabar tujh ko ulfat mein tiri kyaa kyaa aazaar uThaate hain ik jumbish-e-abru hi ushshaaq ko kaafi hai kyuun qatl ko vo un ke talvaar uThaate hain kuchh 'aish' sunaa tu ne us bazm mein aashiq par tufaan nae kyaa kyaa aghyaar uThaate hain"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"kal shab dil-e-aavaara ko siine se nikaalaa ye aakhiri kaafir bhi madine se nikaalaa ye fauj nikalti thi kahaan khaana-e-dil se yaadon ko nihaayat hi qarine se nikaalaa main khuun bahaa kar bhi huaa baagh mein rusvaa us gul ne magar kaam pasine se nikaalaa Thahre hain zar-o-sim ke haqdaar tamaashaai aur maar-e-siyah ham ne dafine se nikaalaa ye soch ke saahil pe safar khatm na ho jaae baahar na kabhi paanv safine se nikaalaa"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"