dard kaa surmai samaan le jaa — Aulad

"dil kaa gulshan jalaa gae kaanTe un ki yaadein miTaa gae kaanTe ab zarurat nahin rahi gul ki itni kasrat se aa gae kaanTe ziist mein rah gai chubhan hi chubhan aisaa qabza jamaa gae kaanTe gul hi kyaa gulsitaan bhi hairaan hai is qadar mujh ko bhaa gae kaanTe ab to khushiyon ki bu nahin milti har taraf gham ke chhaa gae kaanTe un pe kaliyaan bhi ho gaiin shaidaa os mein yuun nahaa gae kaanTe kyaa kiyaa tum ne ajnabi mohsin raah se kyon haTaa gae kaanTe ab phaTaa jaa rahaa hai meraa dimaagh kaisi khushbu basaa gae kaanTe main to mohsin unhein samajhtaa rahaa nafratein kyon baDhaa gae kaanTe mujh ko ehsaas tak na ho paayaa dost ban kar samaa gae kaanTe ham tumhaare bane rahe ham-dam khuub ehsaan jataa gae kaanTe roz-o-shab kaa rahaa na farq koi niind aisi sulaa gae kaanTe kam nahin ham pe un kaa ye ehsaan ramz-e-duniyaa bataa gae kaanTe kaise azbar kitaab hoti mujhe har sabaq phir bhulaa gae kaanTe jaise saathi janam ke hon 'qudsi' yuun gale se lagaa gae kaanTe"

"kahtaa hai kaun sang-o-shajar bolte nahin vo bolte hain jab to bashar bolte nahin taamil-e-hukm-e-rab mein hain masruf raat-din is vaaste ye shams-o-qamar bolte nahin gaanv ke zarre zarre mein hai shor-o-ghul magar baazaar chup hai aur nagar bolte nahin pal pal ki hai khabar inhein phir bhi na jaane kyon divaar be-zabaan hai dar bolte nahin paDhte rahe darud hai dasht-e-arab gavaah ye baat hai ghalat ki hajar bolte nahin be-jaan se bhi hote hain vo mahv-e-guftugu kyaa jaane mujh se kyon vo magar bolte nahin qatron ko roz dete hain ye dars-e-ijtihaad phir kaise maan luun ki guhar bolte nahin"

"dil ke safhon mein jaal lafzon kaa jaan par hai vabaal lafzon kaa kaise mahfuz hon usul-e-huruf baDh rahaa hai zalaal lafzon kaa uljhe rahte hain sab ibaarat mein hai ajab ye kamaal lafzon kaa harf to harf kaT gae nuqte allah allah jalaal lafzon kaa ab qayaamat zabaan pe aaegi ho rahaa hai qitaal lafzon kaa hai kitaabon mein dimakon kaa hisaar aa gayaa ab zavaal lafzon kaa biich raahon mein saut ke hamraah luT gayaa saaraa maal lafzon kaa tum to sheron mein kho gae 'qudsi' aur ham ko malaal lafzon kaa"

"is daur mein jismon ke kharidaar bahut hain har samt gunaahon ke bhi baazaar bahut hain baalidgiyaan ruh-e-adab mein to sameTo aslaaf ke is hind mein aasaar bahut hain tahqiq tumhaari ye adhuri hi rahegi qudrat ke jahaan mein abhi asraar bahut hain tum shauq se shahron ke ujaalon se ho mahzuz mere liye paataal ziyaa-baar bahut hain gulzaar-e-rivaayat se zaraa zehn ko moDo jiddat ke bayaabaan mein ashjaar bahut hain sab par gul-e-raanaa ki to hoti hai navaazish kyaa mere muqaddar ke liye khaar bahut hain 'qudsi' to akelaa nahin maidaan-e-sukhan mein har kucha-o-baazaar mein fan-kaar bahut hain"

"vo ek shakhs miraa ham-mizaaj pahle thaa badal gayaa vahi kal mein jo aaj pahle thaa bashar ki pyaas bashar ke lahu se bujhti hai jahaan mein kyaa yahi khuni rivaaj pahle thaa tamaam vaqt guzartaa hai laghviyaat mein ab hamaare sar pe bahut kaam kaaj pahle thaa ye aisaa daur ki insaaniyat bilakti hai sukun se par baDaa saada samaaj pahle thaa na dekhi dahr ne us ki tarah ziyaa ab tak ajiib bujhtaa huaa ik siraaj pahle thaa ghubaar-o-khaak mein vo sab badal gae 'qudsi' javaaharaat kaa ghar bhar anaaj pahle thaa"

"uDaa ghubaar havaaon ki anjuman mein hai dhuaan dhuaan saa fazaaon ki anjuman mein hai nigaah-e-manzar-e-dilkash mein chhaa gai surkhi mai-e-khumaar sadaaon ki anjuman mein hai libaas-posh ki khvaahish mein lag gayaa hai zang shikasta daagh qabaaon ki anjuman mein hai tum us se duur raho niind uD na jaae kahin thakan khamida ridaaon ki anjuman mein hai nizaam-e-vaqt kaa ab khuun nichoDnaa hogaa ki sang-e-sakht adaaon ki anjuman mein hai darinde karb ke manDlaa rahe hain us ke gird ye kaun khufta-balaaon ki anjuman mein hai bashar ki ziist mulavvis hai raakh se 'qudsi' sulagti aag vafaaon ki anjuman mein hai"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"hai jo ik maa'raka faisal nahin hone detaa jin vo ho ke mujhe botal nahin hone detaa qatl ik roz hi kartaa huun isi goshe mein aur saabit ise maqtal nahin hone detaa zid hai us ki ki har ik shaakh ho phir sabz hi sabz garche paidaa koi konpal nahin hone detaa raushni apne khayaalon hi se karni hogi koi raushan kahin mash'al nahin hone detaa chun-ki miTTi ki bhi ek apni alag khushbu hai main kahin bhi ise sandal nahin hone detaa ik parinda ki jo sahtaa hai havaaon kaa dabaao aur parvaaz ko paidal nahin hone detaa Dar hai us ko nazar aae na kahin zehn kaa 'aks vo miraa aaina saiqal nahin hone detaa tiraa qaanun hai jangal kaa ghanimat hai ki tu mire is shahr ko jangal nahin hone detaa chalo baat us ki sunein ek 'ajab mantiq se jo kisi baat ko muhmal nahin hone detaa"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"