dard phir uThaa mujh mein — Naseem Ajmal

"nazar sarshaar us ki fazaa bedaar us ki bahut baatein suni hain sar-e-baazaar us ki kahaan kaTtaa miraa sar magar talvaar us ki main chhoTaa saa nagina baDi baazaar us ki havaa us kaa takallum shafaq dastaar us ki suni hai main ne aahaT hazaaron baar us ki kahaani kah rahi hai nigaah-e-yaar us ki nazar aai vo surat giri divaar us ki fazaa ik shabnami si badan ke paar us ki yahaan kyaa main nahin huun ye sab paikaar us ki ajab hamd-o-sanaa hai sukhan ke paar us ki dikhaa de koi 'ajmal' jhalak ik baar us ki"

"kahaan-kahaan tujhe DhunDun kahaan duhaai duun kisi kaa jurm ho apni to main safaai duun ye kusht-o-khun kaa manzar nafas-nafas lekin asir-e-jaan ko bhalaa kis tarah rihaai duun main ik sadaa huun to taDpun tiri zabaan ke biich huun ik khayaal to parvaaz mein dikhaai duun kabhi to phailun in aankhon mein daastaan ban kar kahaan talak lab-e-khaamosh se duhaai duun badan mein chikhtaa phirtaa huun tire raat gae nahin yaqin ki tujh ko na main sunaai duun tiri vafaa ke bahut tazkire kiye ab to ye ji mein hai tujhe ilzaam-e-bevafaai duun tujhe shafaq mein bharun chaand chaand chamkaaun sahar mein duur talak rang-aazmaai duun bas ek baar nazar aa miyaan-e-shoala-o-shaam phir is ke baad na main umr bhar dikhaai duun kahaan talak tere laulaak par main chhaayaa rahun kahaan talak tiri palkon pe main dikhaai duun ghazal nahin na sahi marsiya likhun 'ajmal' qalam hai sard ise dil ki raushnaai duun"

"naghma thaa yaa ki giit sunaai nahin diyaa aisaa thaa gahraa rang dikhaai nahin diyaa ubhri thi ek shakl fasil-e-nigaah par phir us kaa koi naqsh dikhaai nahin diyaa main kheltaa rahaa unhin tughyaaniyon ke biich tufaan kaa shor kuchh bhi sunaai nahin diyaa jab dil mein aa gayaa mire ghar-baar chhoD kar phir aisaa kyaa huaa ki dikhaai nahin diyaa taaron ki dhuup chhaanv mein soyaa tamaam raat jo khvaab dekhnaa thaa dikhaai nahin diyaa aahistagi se vo miri jaan mein utar gayaa hangaama aisaa thaa ki sunaai nahin diyaa Takraa ke khud se rah gai meri nigaah-e-shauq maujon ke aar-paar dikhaai nahin diyaa har nok-e-khaar ko main dikhaataa lahu kaa rang sahraa ne izn-e-aabla-paai nahin diyaa halchal machaa di us ne miri zaat mein magar kuchh hausla-e-sang-kushaai nahin diyaa us ki sadaa navaah-e-dil-e-yaasman ki thi yaani ki dars-e-shoala-navaai nahin diyaa baiThaa huaa hai gham ki tarah dil ki raah mein us ne bichhaD ke dard-e-judaai nahin diyaa vo chaand jis ko chaand kahein kaaenaat kaa aisaa to koi chaand dikhaai nahin diyaa kyaa naqsh-e-paa-e-gul hain jo taktaa hai ghaur se mujh ko to kuchh zamin pe dikhaai nahin diyaa 'ajmal' jamaal-e-yaar ki raanaai kuchh na puchh aks-e-rukh-e-khayaal dikhaai nahin diyaa"

"koi aahaT na koi Dagar saamne ek aks-e-safar sar-basar saamne aasmaan par lahu gul bikhartaa huaa aur ubhartaa huaa meraa sar saamne vo akelaa hazaaron se laDtaa rahaa jang hoti rahi raat bhar saamne nannhi-munni duaaon kaa haasil hai kyaa luT gayaa saaraa rakht-e-safar saamne TuuT kar saare manzar bikharne lage be-tahaashaa aDe baam-o-dar saamne kashtiyaan TuuT kar sab kinaare lagin kaise aaseb kaa hai safar saamne koi autaar to is zamin par mile aae koi to paighaambar saamne faasla mere qadmon mein manzil kaa thaa varna rahtaa kahaan ye safar saamne TukDe TukDe badan raqs kartaa huaa ik zaraa saa udhar baam par saamne ik jhalak sabz miTTi ki aankhon mein bas shoala shoala shafaq lamha bhar saamne sar pe buDhaa gagan kab se rakkhaa huaa raqs-e-shams-o-qamar aankh bhar saamne koi mujh mein mujhe qaid kartaa huaa pheink kar kitne laal-o-guhar saamne kyaa karun meraa man thaa khalaaon mein gum vo dikhaataa rahaa sab hunar saamne siina siina safar ye tilism-e-hunar dekh 'ajmal' hai raftaar bhar saamne"

"badan Thahraa dikhaai de rahaa hai zaraa gahraa dikhaai de rahaa hai har ik gungaa hai us ki anjuman mein har ik bahraa dikhaai de rahaa hai baDaa sunsaan saa hai us kaa kucha bahut pahraa dikhaai de rahaa hai kabhi utraa thaa yaan main paaniyon mein jahaan sahraa dikhaai de rahaa hai hai kaisaa maajraa kuchh tum bhi dekho ye kyaa chehraa dikhaai de rahaa hai abhi Duubaa hi thaa main aansuon mein ki phir sahraa dikhaai de rahaa hai miri aavaaz ke bujhte diye mein tiraa chehraa dikhaai de rahaa hai har ik yaan uD rahaa hai aandhiyon mein magar Thahraa dikhaai de rahaa hai jahaan mahfuz saari raunaqein hain vahin sahraa dikhaai de rahaa hai koi uTThegaa tufaan dil-zamin se qadam gahraa dikhaai de rahaa hai koi rishta nahin hai aaine se magar chehraa dikhaai de rahaa hai vo mujh mein aa gayaa main us ke andar jahaan Thahraa dikhaai de rahaa hai zaraa chhaTne to do rangon ke baadal dhuaan gahraa dikhaai de rahaa hai abhi mat chheDnaa 'ajmal' ko dekho 'ajab chehraa dikhaai de rahaa hai"

"dard siine mein sulaa detaa hai harf honTon se haTaa detaa hai khud banaataa hai miraa manzar-e-shauq phir tah-e-khaak chhupaa detaa hai DhunDh laataa hai kabhi mujh se mujhe phir mujhi mein vo milaa detaa hai mere hone ki numaaish kar ke apne hone kaa pata detaa hai saare aalam mein andheraa kar ke dil mein shamein vo jalaa detaa hai ghaur se dekh zaraa shaam ke vaqt rukh se parda vo haTaa detaa hai mujh ko kar detaa hai mujh se hi judaa phir vo dariyaa mein milaa detaa hai kaise har raat kaa rone vaalaa mujh ko jiine ki duaa detaa hai vo jo chaahe to tire shaair ki hamd mashhur banaa detaa hai"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ba-zom-e-aql ye kaisaa gunaah main ne kiyaa ik aainaa thaa usi ko siyaah main ne kiyaa ye shahr-e-kam-nazaraan ye dayaar-e-be-hunaraan kise ye apne hunar kaa gavaah main ne kiyaa harim-e-dil ko jalaane lagaa thaa ek khayaal so gul use bhi ba-yak sard aah main ne kiyaa vahi yaqin rahaa hai javaaz-e-ham-safari jo gaah us ne kiyaa aur gaah main ne kiyaa bas ek dil hi to hai vaaqif-e-rumuz-e-hayaat so shahr-e-jaan kaa use sarbaraah main ne kiyaa har ek ranj usi baab mein kiyaa hai raqam zaraa saa gham thaa jise be-panaah main ne kiyaa ye raah-e-ishq bahut sahl ho gai jab se hisaar-e-zaat ko paivand-e-raah main ne kiyaa ye umr ki hai basar kuchh ajab tavaazun se tiraa huaa na hi khud se nibaah main ne kiyaa khirad ne dil se kahaa tu junun-sifat hi sahi na puchh us ki ki jis ko tabaah main ne kiyaa"

"kaam liyaa jab lafzon hi se khud ko bas naakaam kiyaa baat asar-andaaz hui jab she'ron ko paighaam kiyaa ye kaise saari duniyaa mein aaj bahut mashhur ho tum vaise to saari duniyaa ne tum ko bahut gumnaam kiyaa yak-rangi se 'aajiz aa kar rangaa-rangi ki khaatir jo mujh ko raas aayaa thaa us nilam ko nilaam kiyaa aksar tanhaai mein mujh ko yaad aa jaataa hai vo sab haan aaghaaz se pahle hi jis ko main ne anjaam kiyaa khaamoshi pas fan hai khudaa kaa sikhaa ham ne bhi lekin har-su roz machaayaa tahalka yaa paidaa kohraam kiyaa vaqt ke saath aur aap ke haathon qadrein kitni badli hain ek ilzaam se kitnaa kam hai haasil jo in'aam kiyaa kahiye husn aur 'ishq ko de kar apne dil ke khuun kaa lams kis ne use gul-rang kiyaa phir kis ne use gulfaam kiyaa ab kaa fasaad aaraam se guzre is koshish mein us ne to qashqa khinchaa dair mein baiThaa kab kaa tark islaam kiyaa"

"log kahte hain ki qaatil ko masihaa kahiye kaise mumkin hai andheron ko ujaalaa kahiye chehre paDhnaa to sabhi siikh gae hain lekin kaisi tahzib hai apnon ko paraayaa kahiye jaane pahchaane hue chehre nazar aate hain vaqt qaatil hai yahaan kis ko masihaa kahiye aap jis peD ke saae mein khaDe hain is ko sehn-e-gulshan nahin jaltaa huaa sahraa kahiye sab ke chehron pe hain akhlaaq-o-muravvat ke naqaab kis ko apnaa yahaan aur kis ko paraayaa kahiye shab ke maathe pe koi saaya numudaar huaa us ko ab pyaar ke aangan kaa saveraa kahiye zahr-e-tanhaai-e-gham pi ke mohabbat mein 'khayaal' kis tarah maut ko jiine kaa sahaaraa kahiye"

"vo dost thaa to usi ko adu bhi honaa thaa lahu pahan ke mujhe surkh-ru bhi honaa thaa sunahri haath mein taaza lahu ki fasl na di ki apne haq ke liye jang-ju bhi honaa thaa bagula ban ke samundar mein khaak uDaanaa thi ki lahar lahar mujhe tund-khu bhi honaa thaa mire hi harf dikhaate the meri shakl mujhe ye ishtihaar mire ru-ba-ru bhi honaa thaa kashish thi phuul si is mein to laa-muhaala mujhe asir-e-rang giraftaar-e-bu bhi honaa thaa sazaa to milnaa thi mujh ko barahna lafzon ki zabaan ke saath labon ko rafu bhi honaa thaa safar kaa bojh uThaane se peshtar 'saajid' mizaaj-daan-e-rah-e-justuju bhi honaa thaa"

"ab tire lams ko yaad karne kaa ik silsila aur divaana-pan rah gayaa tu kahin kho gayaa aur pahlu mein teri shabaahat liye ik badan rah gayaa vo saraapaa tiraa vo tire khaal-o-khad meri yaadon mein sab muntashir ho gae lafz ki justuju mein laraztaa huaa nim-vaa saa faqat ik dahan rah gayaa harf ke harf se kyaa tazaadaat hain tu ne bhi kuchh kahaa main ne bhi kuchh kahaa tere pahlu mein duniyaa simaTti gai mere hisse mein harf-e-sukhan rah gayaa tere jaane se mujh par ye uqda khulaa rang-o-khushbu to bas teri miraas the ek hasrat saji rah gai gul-ba-gul ek maatam chaman-dar-chaman rah gayaa ek be-naam khvaahish ki paadaash mein teri palkein bhi baaham piro di gaiin ek vahshat ko sairaab karte hue mein bhi aankhon mein le kar thakan rah gayaa arsa-e-khvaab se vaqt maujud ke raaste mein ganvaa di gai guftugu ek israar ki bebasi rah gai ek inkaar kaa baankpan rah gayaa tu sitaaron ko apni jilau mein liye jaa rahaa thaa tujhe kyaa khabar kyaa huaa ik tamannaa dariche mein baiThi rahi ek bistar kahin be-shikan rah gayaa"