dariche so gae shab jaagti hai — Azhar Naiyyar

"main apne shahr mein apnaa hi chehra kho baiThaa ye vaaqia jo sunaayaa to vo bhi ro baiThaa tumhaari aas mein aankhon ko main bhigo baiThaa ki dil mein yaas ke kaanTe kai chubho baiThaa mataa-e-haal na maazi kaa koi sarmaaya nadi mein vaqt ki har chiiz ko Dubo baiThaa sunahre vaqt ki tahrirein jin mein thiin mahfuz main un sahifon ko ashkon se apne dho baiThaa main suntaa rahtaa thaa jis aaine ki sargoshi vo shahr-e-sang mein apni jilaa bhi kho baiThaa kisi babul ke saae tale mili jo amaan to apne paanv mein kaanTe bhi main chubho baiThaa vahi rahaa hai bahar-taur shaadmaan 'nayyar' jo apne gham mein gham-e-digaraan samo baiThaa"

"main mahal ret ke sahraa mein banaane baiThaa chand alfaaz ko maazi ke bhulaane baiThaa haadse se hi huaa gham kaa mudaavaa mere falsafa sabr kaa logon ko paDhaane baiThaa thak ke saae mein babulon ke sukun jab chaahaa us kaa har patta mujhe kaanTe lagaane baiThaa jis ne toDaa sabhi naaton sabhi rishton ko mire umr bhar kaa vahi ab qarz chukaane baiThaa us ke talkhaab se kab pyaas miri bujh paai ghar samundar ke kinaare hi basaane baiThaa jism ke bakhiye jo udhDe to udhaDte hi rahe jaama resham kaa pahne ko silaane baiThaa log the gird alaav ke magar main 'nayyar' jism ki aag ko paani se bujhaane baiThaa"

"hairaan huun ki aaj ye kyaa haadisa huaa hai aag sard dil bhi hai meraa bujhaa huaa manzil pe pahle meri rasaai hui to phir har naqsh-e-paa se aage miraa naqsh-e-paa huaa rekhaaein haath ki to sivaa jaagti rahein ai kaash meraa bakht rahe jaagtaa huaa thi us ki band muTThi mein chiTThi dabi hui jo shakhs thaa train ke niche kaTaa huaa 'nayyar' kahaani yaad hai pariyon ke desh ki main us tilism se na abhi tak rihaa huaa"

"insaan jo hain in ko kabhi kamtar nahin dekhaa khud raah kaa kham hote hue sar nahin dekhaa tum bahr-e-mohabbat ke kinaare pe khaDe the tum ne miri aankhon mein samundar nahin dekhaa yuun biit gai shahr-e-gharibaan mein miri umr khush-haal yahaan main ne koi ghar nahin dekhaa dil khaak huaa pyaar ki is aag mein jal kar aur jhaank ke us ne kabhi andar nahin dekhaa aavaaz pe aavaaz vo detaa rahaa 'nayyar' ham ne use ik baar bhi muD kar nahin dekhaa"

"hamaare chehre pe ranj-o-malaal aisaa thaa masarraton kaa zamaane mein kaal aisaa thaa fazaa-e-shahr mein baarud ki thi bu shaamil ki saans lenaa bhi ham ko muhaal aisaa thaa amir-e-shahr ke honTon pe paD gae taale gharib-e-shahr kaa chubhtaa savaal aisaa thaa ba-vaqt-e-shaam samundar mein gir gayaa suraj tamaam din ki thakan se niDhaal aisaa thaa tamaam ghonsle khaali the nange peDon par hudud-e-dasht mein vaqt-e-zavaal aisaa thaa vo jab bhi milte hain zakhmon ke phuul dete hain hamaaraa raabta un se bahaal aisaa thaa zamin pe jhukne lagi khud-ba-khud har ik Daali darakht karb-e-numu se niDhaal aisaa thaa khud apne aap se bhi main rahaa huun begaana hisaar-e-dil mein kisi kaa khayaal aisaa thaa"

"ji rahaa huun main udaasi bhari tasvir ke saath shor kartaa huun siyah raat mein zanjir ke saath surkh phulon ki ghani chhaanv mein chupke chupke mujh se miltaa thaa koi ik nai tanvir ke saath ik tiri yaad ki har saans ke nazdik rahi ik tiraa dard ki chaspaan rahaa taqdir ke saath kabhi zakhmon kaa bhi khanda-e-gul kaa mausam ham pe khultaa rahaa ik dard ki tafsir ke saath baat aapas ki hai aapas hi mein rahne diije varna ham surkhiyaan ban jaaeinge tashhir ke saath aap ki mez pe phir ek nayaa manzar hai meri tasvir bhi hai aap ki tasvir ke saath dil ke nazdik sar-e-shaam-e-alam ai 'nayyar' zakhm ke chaand chamak uThte hain tanvir ke saath"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"khel duniyaa-e-'aarzi kaa huun ek kirdaar zindagi kaa huun mujh ko rakkhaa gayaa andhere mein main bhi haqdaar raushni kaa huun intihaa ke qarib hai duniyaa aadmi aakhiri sadi kaa huun dil ko ehsaas ho gayaa teraa mo'tarif teri dosti kaa huun main ne ghurbat mein 'ilm sikhaa hai main to maqruz muflisi kaa huun pur na hogaa jo mere baa'd kabhi ek aisaa khalaa kami kaa huun meraa dushman nahin 'khayaali' koi dost bhi main kisi kisi kaa huun"

"nahin piitaa main par navaazish hui hai baDi mausamon ki sifaarish hui hai bahut din se sahraa ke jaisaa ye dil hai na baadal ghire hain na baarish hui hai yahaan hai bulandi jo kirdaar ki to vahaan khaal-o-khad ki numaaish hui hai tiri jhiil jaisi jo dekhi hain aankhein miri Duub jaane ki khvaahish hui hai chhalaktaa nahin khuun zakhmon se aise kahin naakhunon ki bhi kaavish hui hai hamein 'ishq mein mubtalaa kar rahe hain nazar aur dil mein ye saazish hui hai vahaan dushmanon ki baDi yaad aai jahaan doston ki navaazish hui hai vafaa-daariyon kaa sila mil rahaa hai hamaari sadaa aazmaaish hui hai pareshaaniyon mein jo ham mubtalaa hain yaqinan koi ham se laghzish hui hai vahin apni aankhon ko ham chhoD aae jahaan manzaron ki numaaish hui hai raqibon ko hai chhuT mahfil mein un ki mire aane jaane pe bandish hui hai ghazal kahnaa 'faaruq' main chhoD dungaa isi baat par un se ranjish hui hai"

"jab se aayaa huun tere gaanv mein rang hi rang hain fazaaon mein aa ki dukh sukh ki koi baat karein baiTh kar shishamon ki chhaanv mein main bhi kartaa huun zabt ki koshish to bhi takhfif kar adaaon mein vo tiraa dafatan bichhaD jaanaa vo miraa dekhnaa khalaaon mein ho agar koi gosh-bar-aavaaz ik khamoshi bhi hai sadaaon mein yahi mere liye ghanimat hai saans le luun khuli fazaaon mein"

"bas ki ik lams ki ummid pe vaare hue hain so tire saamne ye khaak pasaare hue hain jaane kab un ko bujhaa baiThe koi baad-e-alam sar-e-mizhgaan-e-tamannaa jo sitaare hue hain zindagi tu bhi hamein vaise hi ik roz guzaar jis tarah ham tujhe barson se guzaare hue hain nit-nae naqsh karein us pe aziyyat ke raqam aa ki ham takhti-e-dil apni pachaare hue hain kab kuchal jaaein kisi paanv se ham barg-e-vajud vaqt ki dhuup mein vaise hi karaare hue hain jaante hain ki tu hi ishq-badan ko hai libaas ham tiraa ruup jo aashuftagi dhaare hue hain apni jurat ki sataaish ho ki ham chob-mizaaj rabt rakhte hain sadaa un se jo aare hue hain"