dasht-e-taa'bir mein aankhon ko jalaane ke liye — Mumtaz Rashid

"har chehre par khauf ki chaadar shoalon ki baarish ghar ghar suuni aankhein dekh rahi hain jalte shahr kaa ye manzar pattaa bhi khaDke to dil sinon mein khauf se phaT jaaein kitni chikhon kaa madfan hai sahmaa huaa khaamosh nagar chehre ki tahrir ke pichhe kyaa dukh hai ye bhi samjho main koi akhbaar nahin huun tum rakh do jis ko paDh kar ham hi kuchh naadaan the jaane kitne khvaab sajaa baiThe aas ne yuun hi dekh liyaa thaa chalte chalte ek nazar jab bhi guzartaa hai koi aavaara havaaon kaa jhonkaa tapti Tiin ki unchi chhat par bajne lagte hain kankar pichhe rah jaane vaalon par kis munh se ilzaam dharein ham jis ki agli saf mein the haar gayaa hai vo lashkar koi patthar pheink ke is mein apnaa aks miTaa Daalein jalti ret mein kho jaaegi ye naddi aage chal kar 'raashid' kis ummid pe dil kaa aaina chamkaate ho jaane kyaa tasvir dikhaae dhundlaa dhundlaa san sattar"

"khaak-taa-khaak vo pahchaan na paayaa hai mujhe us ne har baar havaaon mein uDaayaa hai mujhe chaahtaa huun ki mujhe toD de ab us kaa sukut jis ki aavaaz ne aaina banaayaa hai mujhe ab girah mein nahin khone ke liye kuchh baaqi zindagi tu ne bhi kis moD pe paayaa hai mujhe main tiri raah ki divaar nahin thaa ai dost tu ne kyaa jaan ke nazron se giraayaa hai mujhe raushni meri andheron se ulajh sakti thi meraa dukh ye hai ki suraj ne bujhaayaa hai mujhe ab sanbhalne nahin degaa kahin tanhaai kaa bojh chhoDne vo miri dahliz tak aayaa hai mujhe main koi gauhar-e-naayaab nahin huun 'raashid' kyaa samajh ke koi baazaar mein laayaa hai mujhe"

"fazaa mein bikhre hue rang jhilmilaate kyaa vahi havaa thi charaaghon ko phir jalaate kyaa shikasta jism thaa suraj kaa qahr jhele hue baraste abr ke chhinTe hamein jagaate kyaa tamaam daur ki lahrein thiin khvaab ki surat bajaa thi pyaas saraabon mein Duub jaate kyaa har ek lamha thaa apne hi aks se dhundlaa guzarte vaqt ko ham aaina dikhaate kyaa labon pe jam gai divaar-o-dar ki khaamoshi tamaam shahr thaa viraan sadaa lagaate kyaa yahaan bhi kis ko thi ummid paar utarne ki nadi jo raah mein milti to lauT aate kyaa bhaTak rahe hain zamaane se gham ke sahraa mein ab aur us ki sadaa kaa fareb khaate kyaa tamaam umr guzaari ravaan-davaan 'raashid' the barg-e-khushk kahin par qadam jamaate kyaa"

"sakun milaa hai magar iztiraab jaisaa hai tire badan kaa fusun bhi sharaab jaisaa hai hanse vo laakh magar zabt-e-gham ki tahrirein na chhup sakeingi ki chehra kitaab jaisaa hai milegaa paas se kuchh bhi na khaak o khuun ke sivaa palaT chalein ki ye manzar saraab jaisaa hai na koi peD na saaya na aahaTon kaa gumaan ye justuju kaa safar bhi azaab jaisaa hai vo saamne hai magar us ko chhu nahin saktaa main pujtaa huun vo paikar jo khvaab jaisaa hai sulag rahe ho yunhi gham ki dhuup se 'raashid' vo haath chuum ke dekho gulaab jaisaa hai"

"na faaslon mein khalish na raahat hai qurbaton mein main ji rahaa huun ajiib be-rang saaaton mein tujhe gharaz kyaa koi bhi mauzu-e-guftugu ho har ik haqiqat badal chuki jab hikaayaton mein miri vafaa ke safar ki takmil ho to kaise hai teraa mehvar tiri adhuri mohabbaton mein koi to mere vajud ki sarhadein bataae bhaTak rahaa huun main kab se apni hi vusaton mein vo ek saaya thaa umr bhar ki thakan kaa haamil vo ek saaya jo kho gayaa hai masaafaton mein main zakhm khaa ke bhi bad-gumaan ho sakaa na 'raashid' ajiib rang-e-khulus thaa us ki nafraton mein"

"sail-e-khun paikar-e-ashaar mein Dhaltaa hi nahin gham vo laavaa hai jo siine se ubaltaa hi nahin aaine laakh magar ek si tasvirein hain kis ko dekhun main koi shakl badaltaa hi nahin jo bhaTaktaa thaa kabhi dhuup ke sahraaon mein ab vo saaya miri chaukhaT se nikaltaa hi nahin koi tahrir miTaaein to dhuaan uThtaa hai dil vo bhigaa huaa kaaghaz hai ki jaltaa hi nahin mujh se munh pherne vaale miri qimat pahchaan main vo sikka huun jo baazaar mein chaltaa hi nahin kaun chhinegaa miri soch ki daulat 'raashid' jism kaa bojh to logon se sanbhaltaa hi nahin"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"kal shab dil-e-aavaara ko siine se nikaalaa ye aakhiri kaafir bhi madine se nikaalaa ye fauj nikalti thi kahaan khaana-e-dil se yaadon ko nihaayat hi qarine se nikaalaa main khuun bahaa kar bhi huaa baagh mein rusvaa us gul ne magar kaam pasine se nikaalaa Thahre hain zar-o-sim ke haqdaar tamaashaai aur maar-e-siyah ham ne dafine se nikaalaa ye soch ke saahil pe safar khatm na ho jaae baahar na kabhi paanv safine se nikaalaa"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"