diye us ne auron ko saaghar pe saaghar — Aafaq Banarasi

"dikhaa kar mujh ko chashm-e-mast mastaana banaa Daalaa pilaa kar aaj saaqi tu ne divaana banaa Daalaa qiyaam-e-yaad-e-khubaan ko taraqqi de khudaa is ne mire ujDe hue dil ko pari-khaana banaa Daalaa dil-e-sad-chaak meraa thaa bhalaa kis kaam ke qaabil magar ik shokh ne le kar ise shaanaa banaa Daalaa zarar pahunchaa na mai-khaane ko kuchh sang-e-havaadis se agar TuuTi koi botal to paimaana banaa Daalaa ghazab jaadu bhari hoti hain aankhein husn vaalon ki nazar jis se milaai us ko divaana banaa Daalaa tamannaa vasl ki dil se jo nikli ye khayaal aayaa ki ik aabaad ghar ko haae viraana banaa Daalaa vo mai-kash huun ki har dam shisha-o-saaghar hai saath apne jahaan baiThaa vahin par ek mai-khaana banaa Daalaa kHayaal-e-bada-noshi furqat-e-saaqi mein jab aayaa banaayaa dil ko khum aankhon ko paimaana banaa Daalaa khudaa ke fazl se 'aafaaq' thaa farzaana-o-‘aaqil navaazish ki buton ne us ko divaana banaa Daalaa"

"chubhe jab dil mein khaar-e-‘ishq phir kamtar nikalte hain nikalte hain agar to jaan hi le kar nikalte hain tire naavak jo siine mein kabhi chubh kar nikalte hain to ban kar khuun armaan-e-dil-e-muztar nikalte hain kidhar kaa qasd hai kis kaa muqaddar aaj jaagaa hai talab hotaa hai shaana aaina zevar nikalte hain tumhaaraa tiir rasta rok kar siine mein baiThaa hai jo naale bhi nikalte hain to ruk-ruk kar nikalte hain vo kahte hain ajal hoti hai jis ki ham pe martaa hai qazaa aati hai jab chyunTi ki us ke par nikalte hain hasinon ko jo dekho shakl kaisi bholi hoti hai TaTolo dil agar un ke to vo patthar nikalte hain lagaa di garmi-e-ulfat ne kaisi aag siine mein ki aankhon se jo aansu ki jagah akhgar nikalte hain koi dekhe zaraa 'aafaaq' ki us vaqt kaifiyyat kabhi hazrat jo sahbaa-e-sukhan pi kar nikalte hain"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"