jaras-e-dil ki sadaa ban ke chale — Manzoor Arif

"kotaah-qad hain ham to koi sar-kashida ho aavaaza ho kuchh aisaa ki har-kas shunida ho vo iltifaat-e-khaas pe maael huaa to kyaa phailaae kyaa vo shakhs jo daaman-darida ho us vaqt tak to shaakh mein rahnaa hi chaahiye jab tak ki koi ghuncha-e-gul nau-damida ho kaisi ye shaakh hai ki samar se jhuki nahin har shakhs dil mein kahtaa hai pyaari khamida ho ji chaahtaa hai khul ke kisi ki sanaa karein lekin ye sochte hain ki kis kaa qasida ho 'aarif' tamaam 'umr rahi dil mein aarzu jo likkhun chhap sake koi aisaa jarida ho"

"paayaab mauj uTThi to sar se guzar gai ik sarv-qad javaan ki dastaar utar gai karne lagaa thaa gharq samundar jahaan ko tufaan hi maujzan thaa jahaan tak nazar gai us tirgi mein barq ki shokhi ajiib thi aabaad vo huaa jise viraan kar gai soe badan ke bahr mein jaagi thi khuun ki lahr jab chaDh ke sar tak aai to jaane kidhar gai sehn-e-chaman mein dil ke lahu ki har ek buund patte ko phuul shaakh ko talvaar kar gai naaseh ne ku-e-yaar kaa rasta bhulaa diyaa achchhaa huaa ki hasrat-e-didaar mar gai"

"gham-e-dauraan bhi nahin hai gham-e-jaanaan bhi nahin sakht mushkil mein hai ab dil ki gham-e-jaan bhi nahin mujh se naaraaz hain sab jaan-o-jahaan-o-jaanaan main ki dil se bhi judaa shai huun pareshaan bhi nahin dil ne kuchh aur kahaan aql ne kuchh aur kahi sun ke donon ki na maani ki main naadaan bhi nahin had-e-imkaan-e-tasavvur mein sahi meraa suraagh lekin ai dil mujhe ab DhunDhnaa aasaan bhi nahin ek vo din ki tiri diid pe qurbaan thi nigaah ek ye din ki tire vasl kaa armaan bhi nahin jaane kis khitta-e-aflaak se utraa 'aarif' jo ik insaan ki surat bhi hai insaan bhi nahin"

"vo vasl ki lazzat mein gum hai vo soz-e-judaai kyaa jaane vo rog paraayaa kyaa samjhe vo priit paraai kyaa jaane parvaana-e-husn kaa shaidaai paapi bhanvraa ras kaa lobhi chaahat ko saudaai samjhe us ko harjaai kyaa jaane mahfil mein jise maalum nahin ehsaas ki karvaT kyaa shai hai vo dil ki suuni vaadi mein gham ki angDaai kyaa jaane ye khaak-aalud javaan chehre gul jin ki qasmein khaate hain jo aaraaish par martaa ho un ki raanaai kyaa jaane 'aarif' apnaa raaz-e-ulfat yuun hai jaise munh-band kali ye bhed zamaana kyaa samjhe ye raaz khudaai kyaa jaane"

"miri ghazal mein thiin us ki nazaakatein saari usi ke ru-e-hasin ki sabaahatein saari vo boltaa thaa to har ik thaa gosh-bar-aavaaz vo chup huaa to hain bahri samaaatein saari vo kyaa gayaa ki har ik shakhs rah gayaa tanhaa usi ke dam se thiin baaham rifaaqatein saari Dubo gayaa vo miraa lafz lafz dariyaa mein vo gharq kar gayaa meri alaamatein saari vo ek lamha sar-e-daar jo chamak uTThaa us ek lamhe pe qurbaan saaatein saari jahaan pe dafn hai us ke badan kaa taaj-mahal udhar dariche rakheingi imaaratein saari"

"kaise aa pahunchi hai gulshan ki havaa zindaan mein dil kaa jau zakhm thaa ik phuul banaa zindaan mein aisaa dil-kash thaa ki thi maut bhi manzur hamein ham ne jis jurm ki kaaTi hai sazaa zindaan mein main gulistaan mein bhi tanhaa thaa magar yaad to thi kaisaa be-yaar-o-madad-gaar huaa zindaan main main nai tanhaai se tang aa ke use yaad kiyaa ab mire saath hi rahtaa hai khudaa zindaan mein vo jo gulshan mein mire gham kaa mudaavaa na huaa chaand niklaa to use yaad kiyaa zindaan mein aaj jab aankh khuli hai to fazaa hai khaamosh subh-dam kaun su-e-daar gayaa zindaan mein"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"khel duniyaa-e-'aarzi kaa huun ek kirdaar zindagi kaa huun mujh ko rakkhaa gayaa andhere mein main bhi haqdaar raushni kaa huun intihaa ke qarib hai duniyaa aadmi aakhiri sadi kaa huun dil ko ehsaas ho gayaa teraa mo'tarif teri dosti kaa huun main ne ghurbat mein 'ilm sikhaa hai main to maqruz muflisi kaa huun pur na hogaa jo mere baa'd kabhi ek aisaa khalaa kami kaa huun meraa dushman nahin 'khayaali' koi dost bhi main kisi kisi kaa huun"

"nahin piitaa main par navaazish hui hai baDi mausamon ki sifaarish hui hai bahut din se sahraa ke jaisaa ye dil hai na baadal ghire hain na baarish hui hai yahaan hai bulandi jo kirdaar ki to vahaan khaal-o-khad ki numaaish hui hai tiri jhiil jaisi jo dekhi hain aankhein miri Duub jaane ki khvaahish hui hai chhalaktaa nahin khuun zakhmon se aise kahin naakhunon ki bhi kaavish hui hai hamein 'ishq mein mubtalaa kar rahe hain nazar aur dil mein ye saazish hui hai vahaan dushmanon ki baDi yaad aai jahaan doston ki navaazish hui hai vafaa-daariyon kaa sila mil rahaa hai hamaari sadaa aazmaaish hui hai pareshaaniyon mein jo ham mubtalaa hain yaqinan koi ham se laghzish hui hai vahin apni aankhon ko ham chhoD aae jahaan manzaron ki numaaish hui hai raqibon ko hai chhuT mahfil mein un ki mire aane jaane pe bandish hui hai ghazal kahnaa 'faaruq' main chhoD dungaa isi baat par un se ranjish hui hai"

"jab se aayaa huun tere gaanv mein rang hi rang hain fazaaon mein aa ki dukh sukh ki koi baat karein baiTh kar shishamon ki chhaanv mein main bhi kartaa huun zabt ki koshish to bhi takhfif kar adaaon mein vo tiraa dafatan bichhaD jaanaa vo miraa dekhnaa khalaaon mein ho agar koi gosh-bar-aavaaz ik khamoshi bhi hai sadaaon mein yahi mere liye ghanimat hai saans le luun khuli fazaaon mein"

"bas ki ik lams ki ummid pe vaare hue hain so tire saamne ye khaak pasaare hue hain jaane kab un ko bujhaa baiThe koi baad-e-alam sar-e-mizhgaan-e-tamannaa jo sitaare hue hain zindagi tu bhi hamein vaise hi ik roz guzaar jis tarah ham tujhe barson se guzaare hue hain nit-nae naqsh karein us pe aziyyat ke raqam aa ki ham takhti-e-dil apni pachaare hue hain kab kuchal jaaein kisi paanv se ham barg-e-vajud vaqt ki dhuup mein vaise hi karaare hue hain jaante hain ki tu hi ishq-badan ko hai libaas ham tiraa ruup jo aashuftagi dhaare hue hain apni jurat ki sataaish ho ki ham chob-mizaaj rabt rakhte hain sadaa un se jo aare hue hain"