jo bhi hai hasb-e-haal khincheinge — Aabid Umar

"yuun tiri raah mein paDe hue hain jaise dargaah mein paDe hue hain gham hain jitne bhi is zamaane ke meri ik aah mein paDe hue hain mere bachchon ke khvaab to filhaal chhoTi tankhvaah mein paDe hue hain bach ke nikle jo maut ke munh se yaad-e-allaah mein paDe hue hain kab kisi ki hui hai ye duniyaa ham abas chaah mein paDe hue hain khaak honaa nasib hai lekin hashmat-o-jaah mein paDe hue hain ik nazar ham pe mahvish-e-aazam tere kunjaah mein paDe hue hain kuchh gharaz hi nahin jise ham se us ki parvaah mein paDe hue hain jin ko zindaan mein honaa chaahiye thaa hujra-e-shaah mein paDe hue hain aap se ham-kalaam hai 'aabid' log kyon vaah mein paDe hue hain"

"ye kyaa paDi hai tujhe dil jalon mein baiThne ki ye umr to hai miyaan doston mein baiThne ki chhupaai jaati nahin zardiyaan so duur huun main vagarna hoti hai khvaahish gulon mein baiThne ki shumaar meraa bhi karte hain log in mein magar miri majaal kahaan shaairon mein baiThne ki abhi na ungli uThaa mujh pe thoDi mohlat de tamiz siikh rahaa huun baDon mein baiThne ki mujhe badal ke koi aur hi banaa diyaa hai ki intihaa hai ye surat-garon mein baiThne ki dikhaa rahe hain tavaatur se khaamiyaan meri bhagat rahaa huun sazaa aainon mein baiThne ki nahin majaal kisi ki ki muntashir kar de banaa chuke hain jo aadat safon mein baiThne ki khazaane luTte raheinge ye khaali hone tak ujaaD degi ye aadat gharon mein baiThne ki khudaa ataa kare ohda baDaa gharib ko aur badal sake na vo khu naukaron mein baiThne ki khushaamadi nahin rakhtaa hai apne kaam se kaam to kyaa paDi hai tujhe afsaron mein baiThne ki ye dil scan karaanaa bahut zaruri hai ki ittilaaa hai tire dhaDkanon mein baiThne ki hayaat su-e-adam le ke jaa rahi hain 'umar' jo aadatein hain gae mausamon mein baiThne ki"

"baa'd marne ke koi bosa-e-rukhsat degaa kyaa khudaa mujh ko bhi aisi bhali qismat degaa zindagi hai ye miyaan ranj-o-alam to honge jo guzaaregaa vo laazim hai ki qimat degaa farzi duniyaa se nikal aur haqiqat likh de she'r parvaaz karegaa tujhe 'izzat degaa dekh maayus na ho kufr nahin kar pyaare be-dili chhoD khudaa tujh ko bhi raahat degaa kar gai 'umr akaarat miri haae haae ik ghalat-fahmi ki tu mujh ko mohabbat degaa kul milaa ke hai asaasa miraa ye umr-e-ravaan rad nahin hogi du'aa rab miraa barakat degaa main to samjhaa thaa mohabbat kaa bulaavaa hai 'umar' kyaa khabar thi vo mujhe maut ki daavat degaa"

"buraa hi kyaa thaa jo aap apni misaal hote kamaal hote kisi tarah se jo TuuTe rishte bahaal hote kamaal hote ye lailaa majnun ye hiir raanjhaa ye shirin farhaad ki mohabbat thi aisi shiddat kahin jo un ke visaal hote kamaal hote paDhaa nahin thaa nisaab-e-ulfat amal mein aage the har kisi se samajhti duniyaa agar hamein be-misaal hote kamaal hote vo mujh se miltaa khamosh rahtaa khamoshiyon par hi daad paataa magar jo nazron se munfarid se savaal hote kamaal hote ye kyaa ki tanhaaiyon se rishta banaa ke khud ko ganvaa liyaa hai samaa ke mujh mein jo aap meraa jamaal hote kamaal hote jise bhi dekhaa usi ko daavaa-e-husn karte sunaa gayaa hai jahaan bhar mein hasin agar khaal-khaal hote kamaal hote nasib apnaa sukhanvaron mein hamaari ginti na ho sakegi 'umar' adaakaar ham agar baa-kamaal hote kamaal hote"

"vafaa ki khu pas-e-jaah-o-jalaal rah gai thi anaa ke khol mein vo be-misaal rah gai thi khaTak rahi hai na jaane kyon aaj bhi dil mein jo ek baat darun-e-savaal rah gai thi milaa jo mauqa to ham faaeda uThaaeinge ki pichhli baar adhuri dhamaal rah gai thi janaab-e-qais bhi marne mein haq-ba-jaanib the ki shahr bhar mein vahi khush-khisaal rah gai thi samay ki gard ne ojhal kiye sabhi qisse magar jo ek thi chaahat kamaal rah gai thi ghalat kahaa thaa ki raahat mili mohabbat se ye zindagi to thakan se niDhaal rah gai thi ye log aag lagaane mein itne maahir the musaalahat to pas-e-ishtiaal rah gai thi main oDhe phirtaa huun ab june ke mahine mein nishaani us ki jo ik zard shaal rah gai thi vo misl-e-dard paDaa rah gayaa thaa siine mein so us ki yaad bhi ban ke malaal rah gai thi kabhi na sochaa 'umar' us ko Thes pahunchegi use miri mujhe fikr-e-ayaal rah gai thi"

"mujh aise shakhs ki haajat-ravaai karte hue bhaTak gayaa thaa vo kaar-e-khudaai karte hue ki baaton baaton mein manzil se duur le gayaa thaa vo naa-khudaa-e-sukhan rahnumaai karte hue abhi hai vaise kaa vaisaa hi haal andar kaa ki umr Dhal gai dil ki safaai karte hue nisaab-e-ishq abhi tak hai maavaraa-e-khirad ki tiis saal hue hain paDhaai karte hue halaal luqma khilaanaa hai apne bachchon ko hamesha soch ye rakkhi kamaai karte hue vo khel baiThaa mohabbat se phir mohabbat ne javaabi vaar kiyaa kaaravaai karte hue na koi dukh kaa taassur na thi pashemaani malaal tak na huaa bevafaai karte hue diyaa palaT ke sahaaraa sisakti beTi ne ki baap girne lagaa thaa vidaai karte hue taDap ke rakh diye aankhon pe meri haath us ne main zakhm dekh rahaa thaa silaai karte hue jo mo'atabar gine jaate the vo bhi paae gae ghalat jagah pe ghalat ham-navaai karte hue khulus raas na aayaa 'umar' ki jo bhi milaa daghaa hi detaa gayaa bhaai bhaai karte hue"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"

"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"