jo guzartaa hai guzar jaae ji — Abdullah Javed

"yaad yuun hosh ganvaa baiThi hai jism se jaan judaa baiThi hai raah taknaa hai abas so jaao dhuup divaar pe aa baiThi hai aashiyaane kaa khudaa hi haafiz ghaat mein tez havaa baiThi hai dast-e-gul-chin se muravvat kaisi shaakh phulon ko ganvaa baiThi hai kaise aae kisi gulshan mein bahaar dasht mein aabla-paa baiThi hai shahr aaseb-zada lagtaa hai kuche kuche mein balaa baiThi hai chaar kamron ke makaan mein apne ik pachhal-paai bhi aa baiThi hai shaairi peT ki khaatir 'jaaved' biich baazaar ke aa baiThi hai"

"duniyaa ne jab Daraayaa to Darne mein lag gayaa dil phir bhi pyaar aap se karne mein lag gayaa shaayad kahin se aap ki khushbu pahunch gai maahaul jaan o dil kaa sanvarne mein lag gayaa ik naqsh mauj-e-aab se barham huaa to kyaa ik naqsh zer-e-aab ubharne mein lag gayaa 'jaaved' nazd-e-aab-e-ravaan kah gayaa faqir dariyaa mein jo gayaa vo guzarne mein lag gayaa"

"har lamha marg-o-zist mein paikaar dekhnaa khinchi hui hai vaqt ne talvaar dekhnaa is dopahar ki dhuup mein saaya kahaan mile din Dhal chale to phir kahin divaar dekhnaa ab to safar ke sakht maraahil hain aur ham jab paas aae manzil-e-dildaar dekhnaa be-taabiyaan hon laakh magar us ke ru-ba-ru chhoDein na haath daaman-e-pindaar dekhnaa ai maslahat ki past zaminon ke baasiyo kitni bulandiyaan hain sar-e-daar dekhnaa zarra bhi aaftaab se kamtar nahin yahaan yaaro magar ba-dida-e-bedaar dekhnaa 'jaaved' ham hain aur hai ehsaas kaa khulus yaaron ke paas jhuuT ke tumaar dekhnaa"

"ik sail-e-be-panaah ki surat ravaan hai vaqt tinke samajh rahe hain ki vahm-o-gumaan hai vaqt parkho to jaise tegh-e-do-dam hai khinchi hui Taalo to ek uDtaa huaa saa dhuaan hai vaqt jo dil hadaf huaa ho vo shaayad bataa sake naavak bhi aap aap hi chaDhti kamaan hai vaqt ham us ke saath hain ki vo hai apne saath saath kis ko khabar ki ham hain ravaan yaa ravaan hai vaqt taarikh kyaa hai vaqt ke qadmon ki gard hai qaumon ke auj-o-past ki ik daastaan hai vaqt agle sukhan-varon ne jise aasmaan kahaa sach puchhiye to aaj vahi aasmaan hai vaqt hamdam nahin rafiq nahin ham-navaa nahin lekin hamaaraa sab se baDaa raazdaan hai vaqt kal kaaenaat apne jilau mein liye hue 'jaaved' hast-o-bud kaa ik kaarvaan hai vaqt"

"phuul ke laaeq fazaa rakhni hi thi Dar havaa se thaa havaa rakhni hi thi go mizaajan ham judaa the khalq se saath mein khalq-e-khudaa rakhni hi thi yuun to dil thaa ghar faqat allaah kaa but jo paale the to jaa rakhni hi thi tark karni thi har ik rasm-e-jahaan haan magar rasm-e-vafaa rakhni hi thi sirf kaabe par na thi hujjat tamaam baad-e-kaaba karbalaa rakhni hi thi"

"jaanib-e-dar dekhnaa achchhaa nahin raah shab bhar dekhnaa achchhaa nahin aashiqi ki sochnaa to Thiik hai aashiqi kar dekhnaa achchhaa nahin izn-e-jalva hai jhalak bhar ke liye aankh bhar kar dekhnaa achchhaa nahin ik tilismi shahr hai ye zindagi pichhe muD kar dekhnaa achchhaa nahin apne baahar dekh kar hans bol lein apne andar dekhnaa achchhaa nahin phir nai hijrat koi darpesh hai khvaab mein ghar dekhnaa achchhaa nahin sar badan par dekhiye 'jaaved' ji haath mein sar dekhnaa achchhaa nahin"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ba-zom-e-aql ye kaisaa gunaah main ne kiyaa ik aainaa thaa usi ko siyaah main ne kiyaa ye shahr-e-kam-nazaraan ye dayaar-e-be-hunaraan kise ye apne hunar kaa gavaah main ne kiyaa harim-e-dil ko jalaane lagaa thaa ek khayaal so gul use bhi ba-yak sard aah main ne kiyaa vahi yaqin rahaa hai javaaz-e-ham-safari jo gaah us ne kiyaa aur gaah main ne kiyaa bas ek dil hi to hai vaaqif-e-rumuz-e-hayaat so shahr-e-jaan kaa use sarbaraah main ne kiyaa har ek ranj usi baab mein kiyaa hai raqam zaraa saa gham thaa jise be-panaah main ne kiyaa ye raah-e-ishq bahut sahl ho gai jab se hisaar-e-zaat ko paivand-e-raah main ne kiyaa ye umr ki hai basar kuchh ajab tavaazun se tiraa huaa na hi khud se nibaah main ne kiyaa khirad ne dil se kahaa tu junun-sifat hi sahi na puchh us ki ki jis ko tabaah main ne kiyaa"

"kaam liyaa jab lafzon hi se khud ko bas naakaam kiyaa baat asar-andaaz hui jab she'ron ko paighaam kiyaa ye kaise saari duniyaa mein aaj bahut mashhur ho tum vaise to saari duniyaa ne tum ko bahut gumnaam kiyaa yak-rangi se 'aajiz aa kar rangaa-rangi ki khaatir jo mujh ko raas aayaa thaa us nilam ko nilaam kiyaa aksar tanhaai mein mujh ko yaad aa jaataa hai vo sab haan aaghaaz se pahle hi jis ko main ne anjaam kiyaa khaamoshi pas fan hai khudaa kaa sikhaa ham ne bhi lekin har-su roz machaayaa tahalka yaa paidaa kohraam kiyaa vaqt ke saath aur aap ke haathon qadrein kitni badli hain ek ilzaam se kitnaa kam hai haasil jo in'aam kiyaa kahiye husn aur 'ishq ko de kar apne dil ke khuun kaa lams kis ne use gul-rang kiyaa phir kis ne use gulfaam kiyaa ab kaa fasaad aaraam se guzre is koshish mein us ne to qashqa khinchaa dair mein baiThaa kab kaa tark islaam kiyaa"

"log kahte hain ki qaatil ko masihaa kahiye kaise mumkin hai andheron ko ujaalaa kahiye chehre paDhnaa to sabhi siikh gae hain lekin kaisi tahzib hai apnon ko paraayaa kahiye jaane pahchaane hue chehre nazar aate hain vaqt qaatil hai yahaan kis ko masihaa kahiye aap jis peD ke saae mein khaDe hain is ko sehn-e-gulshan nahin jaltaa huaa sahraa kahiye sab ke chehron pe hain akhlaaq-o-muravvat ke naqaab kis ko apnaa yahaan aur kis ko paraayaa kahiye shab ke maathe pe koi saaya numudaar huaa us ko ab pyaar ke aangan kaa saveraa kahiye zahr-e-tanhaai-e-gham pi ke mohabbat mein 'khayaal' kis tarah maut ko jiine kaa sahaaraa kahiye"

"vo dost thaa to usi ko adu bhi honaa thaa lahu pahan ke mujhe surkh-ru bhi honaa thaa sunahri haath mein taaza lahu ki fasl na di ki apne haq ke liye jang-ju bhi honaa thaa bagula ban ke samundar mein khaak uDaanaa thi ki lahar lahar mujhe tund-khu bhi honaa thaa mire hi harf dikhaate the meri shakl mujhe ye ishtihaar mire ru-ba-ru bhi honaa thaa kashish thi phuul si is mein to laa-muhaala mujhe asir-e-rang giraftaar-e-bu bhi honaa thaa sazaa to milnaa thi mujh ko barahna lafzon ki zabaan ke saath labon ko rafu bhi honaa thaa safar kaa bojh uThaane se peshtar 'saajid' mizaaj-daan-e-rah-e-justuju bhi honaa thaa"

"ab tire lams ko yaad karne kaa ik silsila aur divaana-pan rah gayaa tu kahin kho gayaa aur pahlu mein teri shabaahat liye ik badan rah gayaa vo saraapaa tiraa vo tire khaal-o-khad meri yaadon mein sab muntashir ho gae lafz ki justuju mein laraztaa huaa nim-vaa saa faqat ik dahan rah gayaa harf ke harf se kyaa tazaadaat hain tu ne bhi kuchh kahaa main ne bhi kuchh kahaa tere pahlu mein duniyaa simaTti gai mere hisse mein harf-e-sukhan rah gayaa tere jaane se mujh par ye uqda khulaa rang-o-khushbu to bas teri miraas the ek hasrat saji rah gai gul-ba-gul ek maatam chaman-dar-chaman rah gayaa ek be-naam khvaahish ki paadaash mein teri palkein bhi baaham piro di gaiin ek vahshat ko sairaab karte hue mein bhi aankhon mein le kar thakan rah gayaa arsa-e-khvaab se vaqt maujud ke raaste mein ganvaa di gai guftugu ek israar ki bebasi rah gai ek inkaar kaa baankpan rah gayaa tu sitaaron ko apni jilau mein liye jaa rahaa thaa tujhe kyaa khabar kyaa huaa ik tamannaa dariche mein baiThi rahi ek bistar kahin be-shikan rah gayaa"