khud ko masruf-e-ibaadat kar diyaa — Dard Sironji

"aa jaao mohabbat ke ye mausam na mileinge mausam jo palaT aae to phir ham na mileinge is tarh agar khuun se kheli gai holi zakhmon ke liye phir kahin marham na mileinge 'aasi huun gunahgaar huun bakhshish kaa talabgaar daftar mire 'isyaan ke tujhe kam na mileinge duniyaa ki har ik shai vahaan mil jaaegi lekin jannat mein kabhi ham ko magar gham na mileinge jis daur mein ehsaas ke siine pe lagein zakhm is daur mein ai 'dard' tujhe ham na mileinge"

"zamaane ko khud se na anjaan rakh koi munfarid apni pahchaan rakh mahak jaae khushbu se saaraa jahaan sajaa kar mohabbat kaa gul-daan rakh jo hai kaamyaabi ki chaahat tujhe nazar apni manzil pe har aan rakh tiraa kyaa bigaaDegaa zaalim jahaan tu himmat ki siine mein chaTTaan rakh rag-e-jaan hai biivi agarche tiri tu maan-baap kaa bhi magar dhyaan rakh dikhaaegaa tujh ko khudaa ek din madine kaa dil mein tu armaan rakh phir ehsaas hogaa tujhe 'dard' kaa dar-e-dil pe khun-rang darbaan rakh"

"aish-o-ishrat bhare ayyaam se Dar lagtaa hai zindagaani tire anjaam se Dar lagtaa hai ji rahaa huun magar is darja haraasaan ho kar subh hoti hai to phir shaam se Dar lagtaa hai be-khudi le ke chali hai mujhe manzil ki taraf ab mujhe hosh ke paighaam se Dar lagtaa hai ungliyaan uThne na lag jaaein kahin ghairon ki rahne do aap ke inaam se Dar lagtaa hai dard baDh jaae na is tir-e-nazar ko roko aap ke saath to anjaam se Dar lagtaa hai"

"us zulf-e-girah-gir kaa bal khaanaa nayaa hai is bazm mein shaayad koi divaana nayaa hai aayaa hai baDe shauq se mahfil mein sitamgar ai shama zaraa soch le parvaana nayaa hai dekhein hain zamaane mein hasin aur bhi lekin us ghairat-e-gul-naaz kaa itraanaa nayaa hai ai rind qadam apnaa zaraa soch ke rakhnaa saaqi bhi nayaa aur ye mai-khaana nayaa hai afsaane bahut dard ke duniyaa ne sune hain ai 'dard' tire dard kaa afsaana nayaa hai"

"gulshan mein thi bahaar abhi kal ki baat hai phulon pe thaa nikhaar abhi kal ki baat hai tum hi hamaare vaaste takte the rah-guzar karte the intizaar abhi kal ki baat hai phulon ki tarah jin ko rakhaa jaan se 'aziz ban kar chhupe hain khaar abhi kal ki baat hai us ne bahut chhupaae magar gham na chhup sake aankhein thiin ashk-baar abhi kal ki baat hai vo zindagi se meri bahut duur ho gayaa thaa meraa gham-gusaar abhi kal ki baat hai ai 'dard' tu bhi meri nigaahon se gir gayaa kartaa thaa tujh ko pyaar abhi kal ki baat hai"

"hamesha maannaa ai yaar mashvara dil kaa kabhi ghalat nahin hotaa hai faisla dil kaa baDaa ajiib hai yaaro moaamla dil kaa gham-o-alam se hai din raat vaasta dil kaa alaava is ke na hamdam na koi rahbar hai hujum-e-gham liye phirtaa hai qaafila dil kaa kabhi khushi se kabhi gham mein kyon dhaDaktaa hai samajh mein kuchh nahin aataa hai falsafa dil kaa tamaam jism ke aazaa pe hukmraani hai khudaa ne khuub banaayaa hai martaba dil kaa milein to milne ki rahti hai aarzu dil mein ulajh rahaa hai kai din se masala dil kaa tujhe banaaeinge apnaa banaaeinge apnaa koi badal nahin saktaa hai faisla dil kaa agar aziiz hai tum ko sukun-e-dil yaaro banaae rakhnaa hasinon se faasla dil kaa ghamon kaa bojh masaaib hon yaa pareshaani kabhi na chhoDnaa ai 'dard' hausla dil kaa"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"jis din se meraa khvaab suhaanaa badal gayaa us din se zindagi kaa fasaana badal gayaa sunne lagaa huun jab se nasihat baDon ki main jaari thaa jo labon pe taraana badal gayaa pahchaan kaa havaala bhi baaqi nahin rahaa chehre ke saath aaina-khaana badal gayaa uThti nahin hai aankh bhi ab aasmaan ki samt jab se gali kaa chaand puraanaa badal gayaa tahzib jin ke ghar ki 'alaamat thi kal talak afsos aaj un kaa gharaanaa badal gayaa 'azmat kaa taaj sar pe hai 'akhilesh' ke sajaa aisi havaa chali ki zamaana badal gayaa itni sharaafaton mein kami aa gai hai aaj pahle thaa jo libaas puraanaa badal gayaa ahl-e-vafaa ne jis ki thi taarikh ki raqam 'faaruq' 'ishq kaa vo fasaana badal gayaa"

"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"

"khaamushi ke batn se ye guftani paidaa hui main ba-zaahir chup huaa aur shaaeri paidaa hui is tarah saabit huaa gham aur khushi kaa imtizaaj hanste hanste us ki aankhon mein nami paidaa hui jurm ki paadaash mein ham khaak par pheinke gae so yahaan par intiqaaman zindagi paidaa hui khauf ne hi maslahat ki raah bhi ijaad ki main andheron se Daraa aur raushni paidaa hui dil mein kab utri kisi ke be-maaani guftugu baat karne se to bas aavaaz hi paidaa hui"

"zindagi bojhal hui aazaar se jism jhuktaa jaa rahaa hai baar se doston ne is qadar dhoke diye aur raghbat baDh gai aghyaar se zindagi kaa ik nayaa imkaan huaa ik daricha khul gayaa divaar se ab bayaan kaise karun rudaad-e-gham kaam mushkil hai dil-e-naa-chaar se hijr ki raaton mein bahtaa hi rahaa ek naala chashm-e-dariyaa-baar se misl-e-majnun regzaaron mein rahe sar paTakte ret ki divaar se ham asiraan-e-mohabbat hain yahaan uljhe hain ab gesu-e-khamdaar se 'qalb' teri ghazlein yuun shaadaan karein dard nikle hai tire ashaar se"

"zindagi dushvaar hogi ye kabhi sochaa na thaa vo bagule gham ke uTThe jin kaa andesha na thaa saamne tum aa gae ho to bataa duun jaan-e-jaan jaise dil dhaDkaa thaa ab ki vaise dil dhaDkaa na thaa ye iraada kar liyaa thaa ham na bichhDeinge kabhi TuTeinge ik pal mein rishte ye kabhi sochaa na thaa yaad-e-maazi miT rahi hai vaqt ki raftaar se ab tasavvur mein hamaare koi bhi chehra na thaa sakht hairat ho rahi hai dekh kar apnaa vajud dhuup mein the sab ke saaye par miraa saayaa na thaa shauq-e-manzil dekh meri dekh meraa hausla shahr-e-dil ke raaston mein main kabhi Thahraa na thaa 'qalb' ko sahraa-navardi raas kyaa aati bhalaa vo kabhi aavaargi mein dar-ba-dar bhaTkaa na thaa"