kisi ke dukh pe agar ham malaal karte hain — Jahanzeb Sahir

"tu mere saath hatheli uThaa nikal aae koi duaa na sahi bad-duaa nikal aae kabhi-kabhaar use chuum lein to mumkin hai hamaare munh se bhi shukr-e-khudaa nikal aae khabar ki taak mein baiThe hue to chaaheinge kisi tarah se koi vaaqia nikal aae yahi to dukh hai qabila bhi khaandaan thaa ek magar mizaaj hi apne judaa nikal aae mare huon ki talaashi mein ho bhi saktaa hai kisi ki jeb se us kaa pata nikal aae uThaa rahaa huun yahi soch kar ziyaan pe ziyaan kisi ki khair kisi kaa bhalaa nikal aae mujhe khabar hai ki ye log lauT jaaeinge agar yahaan se koi raasta nikal aae nayaa safar ho mubaarak magar karoge kyaa vahaan bhi aisi hi aab-o-havaa nikal aae nikal rahaa huun main us dil se is tarah 'saahir' ki jaise kaaT ke qaidi sazaa nikal aae"

"kai dinon se muravvat nahin hui mujh se use bhi koi shikaayat nahin hui mujh se bahut se kaam dikhaave ke kar rahaa thaa main khudaa kaa shukr ibaadat nahin hui mujh se nae sire se mohabbat ki aarzu thi magar nae sire se mohabbat nahin hui mujh se ye log apne aqide se pyaar karte hain isi liye to aqidat nahin hui mujh se main zimmedaar huun teri udaas aankhon kaa main maantaa huun hifaazat nahin hui mujh se tamaam raat yunhi tiliyaan jalaataa rahaa diyaa jalaane ki himmat nahin hui mujh se ye aur baat tujhe darguzar kiyaa varna kisi ke saath riaayat nahin hui mujh se"

"pesh-khema ye kisi ek musibat kaa nahin dukh hai kuchh aur miri jaan masaafat kaa nahin ham mazaafaat se aae hue logon kaa miyaan masala rizq kaa hotaa hai mohabbat kaa nahin jism ki jiit koi jiit nahin mere liye ye vo saamaan hai jo meri zarurat kaa nahin thoDi koshish se hi aa jaati hai ab niind mujhe is kaa matlab hai ki vo meri tabiat kaa nahin ye to khud chal ke nishaane pe lage hain tere dakhl is mein to koi teri mahaarat kaa nahin roz dariyaa mein jo ik phuul bahaa detaa huun ye kisi dukh kaa ishaara hai aqidat kaa nahin ham hain haare hue lashkar ke sipaahi 'saahir' faaeda ham ko kisi ki bhi himaayat kaa nahin"

"ham aise log kahaan manzilon ko paate hain ham aise log faqat raaste banaate hain ye tere jism ko chhu kar pata chalaa hai mujhe ki narm phuul bahut jald suukh jaate hain ye kaam hijr mein bidat shumaar hotaa hai magar ye dekh ki ham phir bhi muskuraate hain tiraa to khair koi tujh se duur hi na gayaa tujhe khabar hi nahin saans kaise aate hain nazar na aaeinge tujh ko ghubaar uDne de tire liye jo mujhe raah se haTaate hain tumhaare khvaab ghanimat hain bujhti aankhon ko magar ye khvaab hamein niind se jagaate hain ye kaun baagh mein 'saahir' dikhaai dene lagaa ki phuul peD parinde khushi manaate hain"

"baDe khulus se apnaa banaa liyaa thaa mujhe tumhaare hijr ne zinda bachaa liyaa thaa mujhe yaqin jaan bahut Dar gayaa thaa us din jab gale se tu ne achaanak lagaa liyaa thaa mujhe bichhaD gae hain to saaraa qusur hai teraa ki tu ne sar pe jo itnaa chaDhaa liyaa thaa mujhe main itni der kahin baiTh hi nahin saktaa kisi ne haath pakaD kar biThaa liyaa thaa mujhe jo is tarah se mujhe kharch kar rahaa hai tu ye chand roz mein kitnaa kamaa liyaa thaa mujhe mujhe khushi hai suhulat se ab marungaa main ki ek baar to us ne bachaa liyaa thaa mujhe vo sard shaam vo baarish vo laapataa yaadein kisi ne shaal mein 'saahir' chhupaa liyaa thaa mujhe"

"havaa mein tair rahe hain sahaab miTTi ke zamin pe aaeinge ik din azaab miTTi ke mujhe to is se kai aadmi banaane the parind bhi na bane dastiyaab miTTi ke falak se nuur ki surat savaal utre the diye zamin ne lekin javaab miTTi ke ye kis jahaan mein mujh ko gumaan le aayaa ubhar rahe hain yahaan aaftaab miTTi ke phir ek roz use chaak par utaaraa gayaa phir us ke baad hue din kharaab miTTi ke kiye gae the hazaaron hi tajrabaat magar badan rahe hain faqat kaamyaab miTTi ke ye us ke naqsh kaf-e-paa hain aur lagte hain zamin pe jaise khile hon gulaab miTTi ke kisi ke vaaste saahir charaagh the lekin havaa ke haath pe rakkhe the khvaab miTTi ke"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"

"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"