kuchh to is dasht-e-gum-aasaar ki viraani se — Asif Bilal

"kabhi jo aankh mein paani ko dekhte the ham 'ajab nazar se javaani ko dekhte the ham shikasta-paai kaa ehsaas jab bhi hotaa thaa to apne dushman-e-jaani ko dekhte the ham udaas lamhon mein sahraaon ki taraf jaate phir apni naql-e-makaani ko dekhte the ham hamaaraa vaqt se yuun taal-mel Thiik nahin baghaur us ki ravaani ko dekhte the ham mahal kaa shaah kanizon mein mast rahtaa thaa saf-e-ghulaam mein raani ko dekhte the ham hamaari tarah nikal aae kyaa khabar koi shakhs ulaT palaT ke kahaani ko dekhte the ham bichhaDte vaqt to apni anaa ke zo'm mein the judaa hue to nishaani ko dekhte the ham"

"kuchh nahin dijiye to jaan zaruri hai miyaan 'ishq mein itnaa to nuqsaan zaruri hai miyaan gaanv ke narm ravayyon mein pale hain ham log shahr mein koi nigahbaan zaruri hai miyaan 'aalam-e-hu mein sahi shor to kar lene do apne hone kaa bhi e'laan zaruri hai miyaan 'umr bhar dhuul uDaane pe bhi rahtaa hai malaal dasht mein khaak ki pahchaan zaruri hai miyaan"

"vahshat-e-dasht se ghabraanaa nahin ham-safaraan ab hamein lauT ke bhi jaanaa nahin ham-safaraan ajnabi shahr se kyaa talkh-navaai kaa gila ham ko jab apnon ne pahchaanaa nahin ham-safaraan ret par der talak rang dikhaaegaa badan is ko 'ujlat mein hi dafnaanaa nahin ham-safaraan is andhere mein hi chamkegi koi sham'-e-hayaat tum kisi daam mein bas aanaa nahin ham-safaraan"

"guzishtagaan saa kuchh apnaa bhi haal ho rahaa hai sitam to ye hai ki is par malaal ho rahaa hai tum apne tarz-e-taghaaful se baaz aa jaao tumhaaraa chaahne vaalaa niDhaal ho rahaa hai ye kaisi gard takhayyul pe paD rahi hai mire kisi ko sochte rahnaa muhaal ho rahaa hai falak talaashtaa hai roz is liye taare zamin par jo ye meraa zavaal ho rahaa hai ham aise log bahut der tak nahin rahte yaqin jaaniye koi kamaal ho rahaa hai ye intizaar ki ghaDiyaan bhi ik qayaamat hain is intizaar kaa lamha bhi saal ho rahaa hai"

"kuchh to mar jaaeinge ham apni pareshaani se aur kuchh dasht-e-gum-aasaar ki viraani se ek kheme ki tanaabein kaTin vahshat ke sabab ek khanjar ki bujhi pyaas khun-afshaani se ik faqir aaj bhi gardan ko uThaataa hi nahin jhuk gai thi kisi hijrat pe pashemaani se main ki bichhDaa thaa kisi shakhs se barson pahle tab se sahmaa huun main qudrat ki nigahbaani se ab jo is shahr mein aae to tumhaari qismat ham mayassar kahaan aate hain yuun aasaani se ham husaini hain hamein pyaas ki shiddat kaisi surkh-ru aaj bhi vaise hai lahu paani se aa hi jaaeinge adaakaari ke kuchh Dhab 'aasif' kaun bach saktaa hai is 'aalam-e-insaani se"

"jahaan-e-vahshat ke kaar-khaane mein kaun kaar-e-junun karegaa hamaare jaane ke baa'd bhi kyaa koi fazaa nilgun karegaa ye apne kheme kaa ek bimaar aadmi hai jo beDiyon mein tumhaari aankhein baras paDeingi bayaan jo haal-e-darun karegaa bas ek chhoTe se niim qasbe kaa rahne vaalaa 'ajib laDkaa kise khabar thi ki vaqt ke baadshaah kaa sar nigun karegaa koi to hogaa ki jis pe ik din ye raaz-e-kaun-o-makaan khulegaa ham aise majnun pe sab se pahle vo aashkaar-e-fusun karegaa guzarte mausam ke saath zakhm-e-jigar bhi naasur ho rahaa hai vo ek baar apne haath phere ye raushni juun kaa tuun karegaa main dasht mein nim-shab ko aakhir bataao rahvaar roktaa kyon ye jaantaa gar ki meraa dushman bhi aaj hi meraa khuun karegaa vo ek buDhaa shajar bhi 'aasif' khizaan-rasida hi ho rahaa hai ye vaqt ki tez dhuup aakhir kahaan talak pur-sukun karegaa"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"

"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"