logo ham chhaan chuke jaa ke samundar saare — Bashir Farooqi

"chuum lo us haath ko jo haath bik jaataa na ho vaqt ki sachchaaiyaan likhne se ghabraataa na ho haadisa ye hai ki meri pyaas ne baandhi hai aas aise baadal se barasnaa hi jise aataa na ho koi raahi itnaa bhi bebas nahin hotaa jise koi aansu koi jugnu raah dikhlaataa na ho is kaa imkaan hai ki is shahr-e-saraab-o-khvaab mein jis ko paa letaa ho insaan us ko bhi paataa na ho koi din aisaa nahin ai khub-surat zindagi jab miri aankhon mein teraa ruup lahraataa na ho dil mein armaan le ke chaltaa ho to mumkin hi nahin aadmi shishe se yaa patthar se Takraataa na ho vo koi tasvir hai jis mein na ho rang-e-vafaa vo koi manzar hai jo aankhon ko bahlaataa na ho ik iraada hai junun hai ik safar hai zindagi haadson se vo Dare jiinaa jise aataa na ho aise suraj se to miTTi kaa diyaa achchhaa 'bashir' aisaa suraj jo kisi aangan talak jaataa na ho"

"yuun ruuTh kar na jaa ki tujhe kuchh khabar bhi hai 'umr-e-junun daraaz bhi hai mukhtasar bhi hai vo aankh dekh kar bhi mujhe ajnabi si hai iqraar-e-‘ishq bhi hai zamaane kaa Dar bhi hai ai zindagi kabhi to mujhe muD ke dekh le ik shakhs teraa chaahne vaalaa idhar bhi hai is shahr-e-qaatilaan se hamein kyaa nahin milaa siine mein daagh-e-‘ishq bhi hai zakhm-e-sar bhi hai maayus ho ke kuchh na milegaa jahaan mein jiinaa bhi sikhiye ki ye jiinaa hunar bhi hai suraj hisaar-e-shab se nikal to gayaa magar khun-e-shafaq se jaama-e-khush-rang tar bhi hai itnaa tujhe khayaal rahe ai amir-e-shahr unchi haveliyon kaa muqaddar khanDar bhi hai patthar uThaa ke soch rahaa huun main ai 'bashir' is shahr-e-sang mein miraa shishe kaa ghar bhi hai"

"jahaan-panaah kahaan meraa gham samajhte hain qalam ke dard ko ahl-e-qalam samajhte hain faqih-e-shahr kaa mansab unhi ko miltaa hai jo qasr-e-shaah ko baab-e-haram samajhte hain ab apne dard kaa ehsaas baDh gayaa hai bahut kisi ke dard ko ab log kam samajhte hain uThaane do unhein divaar-e-dushmani lekin giregi kaise ye divaar ham samajhte hain nazar kisi ki taraf hai to dil kisi ki taraf tiri adaa-e-takhaatub ko ham samajhte hain zamaane dekhe hain is aankh ne jo ab chup hai ye honT talkhi-e-sahbaa-o-sam samajhte hain isi liye to hamein gham 'ataa kiye us ne ki us ke gham ki nazaakat ko ham samajhte hain ham ahl-e-shauq hain aise hi tishnagaan mein 'bashir' jo shaakh-e-gul ko hi dast-e-sanam samajhte hain"

"hamaare dil kaa vo 'aalam hai un ke naam ke baa'd ki jaise raat ki raani khili ho shaam ke baa'd vo shaakh-e-gul ki tarah dast-e-ahmarin us kaa vo muD ke dekhnaa us kaa mujhe salaam ke baa'd har ek daur mein ye sochte rahe ham log ki ab sukun milegaa nae nizaam ke baa'd main saath chal to diyaa huun magar ye khauf bhi hai ki tum fareb na de jaao chand gaam ke baa'd bachaane nikle hain kis ko salaamati daste bachaa hi kaun hai basti mein qatl-e-'aam ke baa'd ye sar bachaa ke guzargaah-e-haadsaat se ham khudaa kaa shukr karein ghar to aae shaam ke baa'd fasaad uljhe hue masalon kaa hal to nahin ye sho'le aur bhaDakte hain intiqaam ke baa'd main jaise TuuT gayaa huun bikhar gayaa huun 'bashir' 'ajib haal hai meraa shikast-e-jaam ke baa'd"

"us ki nazar kaa mujh pe kuchh aisaa asar huaa dil thaa sadaf misaal ba-rang-e-guhar huaa vo shokhiyaan thiin aur na vo rang-rup thaa kal main bahut udaas use dekh kar huaa isaar aur vafaa ki mire daastaan ye hai jab bhi vatan pe vaar hue main sipar huaa vo haadisa to koi baDaa haadisa na thaa ye aur baat dil pe ziyaada asar huaa aisaa bhi ek dar hai isi kaaenaat mein us dar kaa jo faqir huaa taajvar huaa ab jaa ke mujh ko sard shabistaan huaa nasib barson tamaam jism pasine mein tar huaa dahshat-zada fazaaon se vo be-niyaaz thaa jab us kaa ghar jalaa hai to us par asar huaa yaad aa gai thi mujh ko shahid-e-vafaa ki pyaas dariyaa ko dekh kar jo miraa dil sharar huaa patthar bhi pheinkte koi aataa nahin idhar buDhe shajar ki tarah jo main be-samar huaa jis din miri ghazal ne chhue us ke lab 'bashir' us din miri ghazal kaa safar mo'atabar huaa"

"hamein yaqin thaa ki ham doston mein rahte hain jo ghar jalaa to lagaa dushmanon mein rahte hain ham ik kiran hain magar baadalon mein rahte hain bichhaD ke tum se baDi uljhanon mein rahte hain hamaare jiine ki ab ye misaal hai jaise kaTe piTe hue jumle khaton mein rahte hain inhi si choT bhi lagti hai sar-bulandon ko jo pattharon ki tarah Thokaron mein rahte hain jo chehre chaand se lagte hain mahfilon mein hamein vo sham’-e-kushta ki surat gharon mein rahte hain kuchh aise phuul hain jin ko milaa nahin maahaul mahak rahe hain magar jangalon mein rahte hain vatan ki khair manaao ki dushmanaan-e-vatan sahar se shaam talak saazishon mein rahte hain hamaare shahr mein insaan ab nahin rahte ham apne shahr ki parchhaaiyon mein rahte hain unhin ko mere ghamon ki khabar nahin hai 'bashir' jo ruuh ban ke miri dhaDkanon mein rahte hain"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"