maaal-e-haasil-e-gham ko gham-e-haasil samajhte hain — Muzaffar Ahmad Muzaffar

"zabaan pe ghaughaa-e-harf-e-du'aa hai kitni der ye aasraa hai magar aasraa hai kitni der fareb-khurda ujaalaa ye taar-taar badan saron pe saaya-e-aafat-rasaa hai kitni der pighal rahi hai charaaghon ki lau december mein ye barf-baari kaa mausam kaDaa hai kitni der hamaare lab pe vahi al-'atash kaa naghma hai kanaar-e-aab-e-ravaan karbalaa hai kitni der miTaa rahi hai mashiyyat har ek naqsh-e-kuhan hatheliyon pe ye rang-e-hinaa hai kitni der tumhaari garmi-e-anfaas par bharosa hai tumhaaraa lams magar jaan-fizaa hai kitni der hamaare hujra-e-jaan kaa to e'tibaar nahin tumhaari yaad kaa mehmaan-saraa hai kitni der abhi to lutf-o-'inaayaat kaa shumaar nahin khudaa khabar ki ye dast-e-'ataa hai kitni der tumhein khabar nahin is sard-posh mausam mein hamaari aankh se dariyaa bahaa hai kitni der shuru'-e-'ishq mein ye iztiraab che maa'ni kise khabar ki ye aah-o-bukaa hai kitni der sadaa-e-gumbad-e-be-dar kaa e'tibaar na kar ye baazgasht hai is ko baqaa hai kitni der bujhaa hi degaa kisi roz pyaas basti ki mujhe khabar hai ye baadal rukaa hai kitni der miraa sharik-e-safar bhi hai raahzan ki tarah vo rahnumaa hai magar rahnumaa hai kitni der jo ho sake to piyo aaj jaam bhar bhar ke nazar mein chashma-e-aab-e-baqaa hai kitni dair sharaab-e-naab hai saaghar uThaaiye vaa'iz ye bad-maza sahi par bad-maza hai kitni der kise khabar ki ye subh-e-visaal kaa panchhi jhulasti shaakh pe naghma-saraa hai kitni der"

"aamad-e-fasl-e-bahaaraan nahin jiine deti vusat-e-chaak-e-garebaan nahin jiine deti hasrat-e-dida-e-namnaak rulaati hai mujhe yaadash-e-umr-e-gurezaan nahin jiine deti qaid-e-gesu se rihaai kaa nahin hai imkaan khushbu-e-zulf-e-pareshaan nahin jiine deti kunj-e-tanhaai mein yuun shikva-ba-lab baiThaa huun tangi-e-gor-e-gharebaan nahin jiine deti jaan-levaa hai 'muzaffar' ye taghaaful un kaa tirgi-e-shab-e-hijraan nahin jiine deti"

"sharik-e-rasm-e-girya hain samundar-aashnaa aankhein jahaan-e-aarzu mein kar na dein mahshar bapaa aankhein ye patthar ki na ho jaaein kahin aqlim-e-hasti mein rakhe mahfuz aashob-e-tamannaa se khudaa aankhein tumhaare vaada-e-shab kaa yaqin aataa nahin un ko rahin-e-fitna-e-gham hain sukun naa-aashnaa aankhein hisaar-e-dasht-e-vahshat mein bagulon ke ishaaron par hatheli par liye phirti hai muddat se havaa aankhein fasil-e-shahr-e-taariki se jaane kab rihaai ho asir-e-qariyaa-e-shab hain miri simaab-paa aankhein tumhaari shaan-e-yaktaai hai aalam dil-farebi kaa vagarna dekhti hain yuun pas-e-manzar mein kyaa aankhein harim-e-naaz mein teraa na gar jalva dikhaai de to behtar hai rah-e-ulfat mein ho jaaein fanaa aankhein hui muddat nigaahon se chhuaa thaa marmarin chehra tilism-e-khvaab se ab tak na ho paain rihaa aankhein 'muzaffar' zindagi mein farz to ik baar thaa lekin tavaaf-e-kaaba-e-dil kar chuki hain baarhaa aankhein"

"ai dost mujhe soz-e-nihaan maar na Daale ye naala-e-shab aah-o-fughaan maar na Daale ik umr se paivast rag-e-jaan hai magar ab Dartaa huun ki ye tir-e-tapaan maar na Daale raaij hai zabaan-bandi kaa dastur chaman mein bulbul ko kahin zabt-e-fughaan maar na Daale khurshid-e-qayaamat se sivaa soz-e-darun hai ai shaikh tujhe ishq-e-butaan maar na Daale tu khvaab hai ehsaas hai naghma hai ki gul hai ye kashmakash-e-vahm-o-gumaan maar na Daale but-khaane mein jaataa hai baDe shauq se lekin zaahid ko kahin husn-e-butaan maar na Daale betaabi-e-dil ki ye davaa khuub hai lekin pahlu mein ye sharbat ki dukaan maar na Daale had se na guzar jaae tiri tarz-e-taghaaful furqat tiri ai jaan-e-jahaan maar na Daale baiThaa huun tire saaya-e-gesu mein magar ab Dartaa huun ki ye raahat-e-jaan maar na Daale ab daulat-e-dil haar ke rotaa hai 'muzaffar' muflis ko ye ehsaas-e-ziyaan maar na Daale"

"jo lazzat-e-aashnaa-e-dard-e-hijraan hote jaate hain sar-e-ku-e-tamannaa vo ghazal-khvaan hote jaate hain safina Duub hi jaaegaa ab bahr-e-talaatum mein habaab-aasaa harif-e-mauj-e-tufaan hote jaate hain vahi bante hain baais dosto betaabi-e-dil kaa mohabbat mein jo nazdik-e-rag-e-jaan hote jaate hain mataa-e-dil jinhein saunpi thi main ne raah-e-ulfat mein taajjub hai vahi ghaarat-gar-e-jaan hote jaate hain dabistaan-e-mohabbat mein ik aisaa daur aataa hai ki auraaq-e-kitaab-e-dil pareshaan hote jaate hain asar baad-e-fanaa hone lagaa hai jazba-e-dil kaa vo mujh ko dafn kar ke ab pashemaan hote jaate hain junun mein bhi 'muzaffar' hai hamein paas-e-adab har-dam ba-qadr-e-zarf mahv-e-husn-e-jaanaan hote jaate hain"

"na qarib-o-dur ki baat kar na fareb-e-raah-guzar mein aa tu nigaar-e-subh se bach ke chal na tilism-e-shab ke asar mein aa ye niyaaz-o-naaz ke silsile ye umid-o-bim ke marhale na kisi nazar se kalaam kar na fasaad-e-husn-e-nazar mein aa main tiri talaash mein baarhaa sar-e-laa-makaan se guzar gayaa tujhe laa-makaan ki hai justuju mire jism-o-jaan ke khanDar mein aa main huun shahr-e-khvaab kaa kuza-gar mujhe apne jism ki khaak de tujhe chaak-e-jaan pe nikhaar duun kabhi mere dast-e-hunar mein aa tu hai husn-o-'ishq kaa naghma-gar tu jahaan-e-nau kaa payaambar tujhe yaad karte hain baam-o-dar are be-khabar mire ghar mein aa miraa najd-e-shauq hai jaan-balab ye furaat-e-jism hai tishna-lab kisi naqsh-e-paa ko khabar na ho tu hudud-e-gard-e-safar mein aa tu hai ik shabih-e-haram-numaa main shikast-e-shisha ki huun sadaa had-e-maasivaa se guzar ke tu kabhi meri hadd-e-nazar mein aa ye gulu-e-khushk ye regzaar ye surkh buund si titliyaan main kanaar-e-aab huun khema-zan miri khvaahishon ke nagar mein aa kisi dasht-e-barf-misaal mein miri aarzu bhi hai munjamid mire maah-o-saal pe kar nazar tu hisaar-e-raqs-e-sharar mein aa abhi abr-e-barq-farosh bhi mire khaar-o-khas se hai be-khabar ye 'muzaffar' apni hai an-kahi ki tu dard ban ke jigar mein aa"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"