mahdud hai ye vusat-e-aalam bhi nazar mein — Daud Nishat

"vo miraa kasrat-e-anvaar se hairaan honaa har taraf tur-ba-kaf un kaa numaayaan honaa kis qadar hai tiri rahmat pe bharosaa yaa-rab mujh ko aayaa na gunaahon pe pashemaan honaa ahl-e-dil chal to diye hain dar-e-jaanaan ki taraf kis ki qismat mein hai khaak-e-dar-e-jaanaan honaa un ke vaade ki khushi kaa ye mukammal hai subut shaam se pahle mire ghar mein charaaghaan honaa aadmi chaahe to koshish se farishta ban jaae sakht dushvaar hai us kaa magar insaan honaa faiz ye mere junun kaa hai chaman mein jaari ghunchon ne siikh liyaa chaak-garebaan honaa jis mein afsurda hon ghunche bhi bahaarein bhi 'nashaat' qaabil-e-fakhr kahaan us kaa gulistaan honaa"

"kab havas-kaaron ne duniyaa ke dahaane dekhe Dubne ke jo the duniyaa mein Thikaane dekhe apne khalvat-kada-e-gham mein rahe ahl-e-hijaab be-hijaabi ne to mahshar ke zamaane dekhe surkhiyaan jin ki hain markuz nigaah-e-aalam tum ne vo qisse paDhe hain jo fasaane dekhe ek halkaa saa bhi partav nazar aayaa na tiraa yuun to ham ne bhi kai aaina-khaane dekhe duur jab haqq-o-sadaaqat se hue ahl-e-khirad har-nafas apni tabaahi ke Thikaane dekhe aaj tak un ki haqiqat na khuli ham pe 'nashaat' khvaab hi rah gae jo khvaab suhaane dekhe"

"zindagi ko maut ki zad par jo laa saktaa nahin maut ke aaghosh mein vo muskuraa saktaa nahin us ki tohmat apne sar baar-e-amaanat le liyaa bojh vo insaan jo apnaa bhi uThaa saktaa nahin rabt hai har shai se phir bhi is jahaan mein dosto aadmi khud aadmi ke kaam aa saktaa nahin ye jahaan hai aazmaaish-gaah-e-arbaab-e-vafaa laakh chaahe bhi to insaan muskuraa saktaa nahin kyaa isi kaa naam hai saaqi tiri dariyaa-dili mai to mai paani bhi tu ham ko pilaa saktaa nahin azm kaa suraj liye main jagmagaataa huun 'nashaat' in andheron ko kabhi khaatir mein laa saktaa nahin"

"miraa vajud samundar nahin main qatra huun har ek mauj ki aaghosh mein machaltaa huun main musht-e-khaak huun gard-o-ghubaar jaisaa huun tamaam vusat-e-aalam pe phir bhi chhaayaa huun qazaa-o-qadr kaa manzar miri nigaah mein hai hayaat-var huun ajal se nazar milaataa huun ye dahshaton ke chhalaave ye aafaton ke pahaaD khudaa kaa shukr ki is daur mein bhi zinda huun uDaaiye na havaaon mein meri baaton ko sadaa-e-vaqt huun main vaqt kaa taqaazaa huun koi bhi ruup ho pahchaan lungaa main tujh ko main kaaenaat ki har chiiz se shanaasaa huun azal se hai tu mire ilm mein ki tu kyaa hai bataa sake to bataa de mujhe ki main kyaa huun dilon mein utrein na kyon sab ke mere sher 'nashaat' jo baat kahtaa huun main tajrabe ki kahtaa huun"

"raushni kab thi mire daagh-e-jigar se pahle us ne paai hai ziyaa shams-o-qamar se pahle ashk ab tak miri aankhon se na barse pahle honT shabnam ke bhi ik buund ko tarse pahle jis ki tanvir mein pinhaan thiin hazaaron zulmaat ik sahar aisi bhi dekhi hai sahar se pahle meri khuddaar tabiat kaa taqaazaa thaa yahi aashiyaan phunk diyaa barq-o-sharar se pahle phir zamaane ki nazar meri taraf kyon uTThi bach ke chalnaa thaa mujhe un ki nazar se pahle vusat-e-kaun-o-makaan gharq hui hai jis mein aise tufaan bhi uThe dida-e-tar se pahle khuld kahte hain jise hai vo isi kaa khaaka ilm thaa kab ye tiri raahguzar se pahle chiir kar zulmat-e-shab vaqt ke teshe se 'nishaat' ik nai subh ubhaareinge sahar se pahle"

"laghzish se rahnumaaon ki jab ham sanbhal gae manzil qarib aai to raste badal gae har raah-rau se teraa pata puchhte hue ham raah-e-dair-o-kaaba se aage nikal gae phuTi hai jab bhi tere tabassum ki ik kiran ghabraa ke khud-bakhud hi andhere pighal gae rindaan-e-tishna-kaam ko ab mai se kyaa gharaz saaqi ki chashm-e-mast se jab daur chal gae ab bhi jabin-e-zist pe faaqon ki hai shikan maanaa ki zindagi ke taqaaze badal gae un ke nuqush-e-paa kaa ye eajaaz dekhiye zarre mah-o-nujum ke saanche mein Dhal gae jab bhi nikhar gayaa mire sheron kaa baankpan ai dost fikr-o-fan ke kai diip jal gae aisi chalin havaaein havaadis ki ai 'nishaat' afsaana-e-hayaat ke unvaan badal gae"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"

"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"