moajiza ye bhi dikhaayaa main ne — Nigar Azeem

"zaat ki sair pe niklun miri himmat hi nahin is bayaabaan se guzarne ki jasaarat hi nahin zindagi main ne qanaaat kaa hunar siikh liyaa ab tire naaz uThaane ki zarurat hi nahin koi shikva na shikaayat na sitam hai na jafaa ek muddat se tiri ham pe inaayat hi nahin jab bhi milte hain chamak uThti hain aankhein un ki aur daavaa hai unhein ham se mohabbat hi nahin dil to kyaa chiiz hai patthar bhi pighal jaae magar jazba-e-ishq mein tere vo haraarat hi nahin apne ashkon se banaa dete bayaabaan ko chaman kyaa karein ham ko to rone ki ijaazat hi nahin mo'atabar bhi vahi arbaab-e-nazar mein Thahri jis kahaani mein koi harf-e-sadaaqat hi nahin us ki yaad aai hai mat chheD mujhe baad-e-sabaa tujh se phir baat karungi abhi fursat hi nahin gulshan-e-dil pe khizaaon kaa tasallut hai 'nigaar' koi khvaahish koi armaan koi chaahat hi nahin"

"tamaam 'umr kaTi dil kaa chaak siine mein hazaar baar mare ik hayaat jiine mein tiraa khayaal kuchh aise nihaan hai dil mein mire ki jaise rang samaae kisi nagine mein qadam qadam pe bahaarein pukaarti hain mujhe main shaad rahti huun zahraab gham kaa piine mein ye kis fazaa kaa ta'aaruf havaaein deti hain ki saaraa baagh sharaabor hai pasine mein"

"sirf khaaka ubhar rahaa hai abhi koi chehra kahaan banaa hai abhi reza reza bikharti aankhon mein ghar kaa sapnaa basaa huaa hai abhi kaise kah duun badal gayaa mausam zakhm dil mein sajaa huaa hai abhi kin ruton kaa hisaab duun us ko sabz mausam kahaan milaa hai abhi raat aadhi guzar chuki hai magar ik daricha khulaa huaa hai abhi shamein sab bujh gaiin khamosh hai raat aur dil hai ki jaagtaa hai abhi kyaa milein tujh se tu ne khud ko 'nigaar' mo'atabar hi kahaan kiyaa hai abhi"

"mahrumi-e-nazar ne dilaase diye bahut yuun ham ne aandhiyon mein jalaae diye bahut vo silsile vafaaon ke sab raaegaan gae us ne mujhe bisaat ke taa'ne diye bahut dida-vari pe apni bahut thaa gumaan tumhein dida-vari ne hi tumhein dhoke diye bahut allaah meri saadgi khud main ne hi use ghairon se rasm-o-raah ke mauqe' diye bahut gham mustaqil-mizaaj thaa Tas se na mas huaa main ne use faraar ke riste diye bahut sho'la-fishaan na kyon miraa lahja ho ai 'nigaar' duniyaa ne har qadam pe sharaare diye bahut"

"taqdir ke khutut mein uljhi hui huun main khud apne vaaste hi paheli hui huun main ye rang ruup pahle to aisaa na thaa miraa is zindagi ki dhuup se maili hui huun main kar to diyaa hai us ne mujhe dil-ba-dar magar kaajal si us ki aankh mein phaili hui huun main kis ki gali kaa jhonkaa mujhe aa ke chhu gayaa is mausam-e-khizaan mein bhi mahki hui huun main us ki nazar mein kitni tamaazat thi ai 'nigaar' muddat hui par aaj bhi pighli hui huun mein"

"ab kahaan 'ishq kaa zamaana hai har taraf jang kaa fasaana hai dosti kyaa hui vo barson ki ab miraa ghar tiraa nishaana hai dekh li nafraton ki aag magar bhaDke sho'lon ko ab bujhaanaa hai kyaa khabar kyaa hai maslahat us ki kyaa karishma koi dikhaanaa hai is sadi mein 'nigaar' ji kar tum kyaa karogi kahaan Thikaanaa hai"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"kal shab dil-e-aavaara ko siine se nikaalaa ye aakhiri kaafir bhi madine se nikaalaa ye fauj nikalti thi kahaan khaana-e-dil se yaadon ko nihaayat hi qarine se nikaalaa main khuun bahaa kar bhi huaa baagh mein rusvaa us gul ne magar kaam pasine se nikaalaa Thahre hain zar-o-sim ke haqdaar tamaashaai aur maar-e-siyah ham ne dafine se nikaalaa ye soch ke saahil pe safar khatm na ho jaae baahar na kabhi paanv safine se nikaalaa"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"