nain nashe ki chaDhti numu par — Nasir Shahzad

"dil se husul-e-zar ke sabhi zoam haT gae fikr-e-maaash baDh gai khaanon mein baT gae phir yuun huaa ki mujh se vo yunhi bichhaD gayaa phir yuun huaa ki ziist ke din yunhi kaT gae khenaa sakhi sakhi na sajan ki taraf mujhe lenaa sakhi sakhi mire paanv rapaT gae aaina us ko dekh ke mabhut ho gayaa gul-daan mein gulaab lajaa kar simaT gae akhroT khaaein taapein angeThi pe aag aa raste tamaam gaanv ke kohre se aT gae aane diyaa na mere buzurgon ne haq pe harf maidaan karbalaaon ke laashon se paT gae Daali nadi mein naav na bargad ke niche peing tu kyaa gayaa palaT ke vo sab din palaT gae khaadein lagin to chhoD gaiin khet titliyaan faslein baDhin to Daar parindon ke ghaT gae us se mili nazar to larazne lagaa badan diide sakhi ri dekh ke piritam ko phaT gae tu shaant ho ki teri muraadein huiin saphal baadal garaj-baraj ke jo aae the chhaT gae dekhaa to us ke tan pe gire kevDe ke phuul paanv se aabshaar ke paani lipaT gae"

"ik aks dil ke taT se be-ikhtiyaar phuTe jab chaand us nagar ki jhilon ke paar phuTe sadqa utaarne ko tere madhur nayan kaa ubhre kai sitaare ghunche hazaar phuTe vo aur main nadi ke naghmon pe bahti naav naav mein us ke mukh se ujlaa nikhaar phuTe kaanon mein ab bhi khankein gajre tire gajar-dam is ghar se jab dhuein kaa niilaa ghubaar phuTe mujh ko jhulaa rahe hain giton ke jhulne mein naghme jo paayalon ke sapnon ke dvaar phuTe us saanvle badan par mahkein khunuk savere un mast ankhDiyon se rangon ki phuvaar phuTe mat ro phir aaungaa main parbat pe tujh se milne jab barf-zaar pighle jab aabshaar phuTe"

"lahu mein saadh sat ko bhar rahaa huun koi hujra charaaghaan kar rahaa huun jhaTak kar dil se saare lobh laalach yahaan ban-baas mein behtar rahaa huun azaab-e-aakhirat ki baat aage itaab-e-zindagi se Dar rahaa huun miri pahchaan meraa gyaan hijrat sadaa ausaan mein be-ghar rahaa huun koi dekhe na aa kar daagh-e-hasrat badan par oDh kar chaadar rahaa huun mulavvis thaa main har be-rah-ravi mein magar ilzaam tujh par dhar rahaa huun taDapte tan ko miTTi par giraa kar sar-e-sahraa burida-sar rahaa huun darakte rang baadal khvaab khushbu samay ki saj se bahra-var rahaa huun Daraa huun tere khauf-e-be-bahaa se musalle par sar-e-mahshar rahaa huun tiri be-e'tinaai se gilaa kyaa main apne aap par dubhar rahaa huun"

"tu dard-e-taaza ke 'unvaan ki mahurat hai sakhi sakhi mujhe ab bhi tiri zarurat hai rakhun sanbhaal ke kab tak ye zindagi tujh bin tire milan kaa sabab hai na koi surat hai siDaul paanv subuk sohnaa sajal naanv nasha-taraaz-badan muhnaa madhurat hai yahi na tere liye koh kaaTe ban paaTe tujhe kuchh aur bhi mujh se koi kudurat hai"

"hasrat-e-ahd-e-vafaa baaqi hai teri aankhon mein hayaa baaqi hai baat mein kohna rivaayaat kaa lutf haath par rang-e-hinaa baaqi hai abhi haasil nahin zaalim ko davaam abhi duniyaa mein khudaa baaqi hai bujh gayaa gir ke khunuk aab mein chaand sath-e-dariyaa pe sadaa baaqi hai gopiyaan hi kisi gokul mein nahin bansiyon mein to navaa baaqi hai paanv ke niche sarakti hui khaak sar mein masnad ki havaa baaqi hai biich mein raat, bachan, biite milan oT mein jaltaa diyaa baaqi hai dekh ye chaand nadi phuul na jaa rut mein ras shab mein nasha baaqi hai"

"rabt bhi toDaa bani nit ki talab kaa base bhi patr bhi is ne likhe bheje mujhe sandes bhi chaukhaTaa dil kaa yahaan hai hu bahu tujh saa koi honT bhi aankhein bhi chhab Dhab bhi tujhi saa face bhi ziist ke path par nahin honaa thaa tujh mujh mein milaap har janam mein priit ne dekhe badal kar bhes bhi puut ki saaDi gulaabi aaftaabi jism par laT gundhi choTi ribbon shaanon pe sanvre kes bhi tujh se bichhDe gaanv chhoTaa shahr mein aakar base taj diye sab sangi-saathi tyaag Daalaa des bhi bas asaasa hai yahi ghar kaa yahi ghar ki mataaa sofa ik do bed kitaabein aur ik show kes bhi shaairi mein baazuon ke saath dil bhi shal huaa aakhirash majbur ho kar haar di ye race bhi niche in jharnon pe vaadi mein kise jaa kar milun sang ik sautan ke beri pi gae pardes bhi jaantaa thaa kaun jiite hain yahi kuchh dekhne dil pe sah leinge mohabbat mein birah ki Thes bhi"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"hai jo ik maa'raka faisal nahin hone detaa jin vo ho ke mujhe botal nahin hone detaa qatl ik roz hi kartaa huun isi goshe mein aur saabit ise maqtal nahin hone detaa zid hai us ki ki har ik shaakh ho phir sabz hi sabz garche paidaa koi konpal nahin hone detaa raushni apne khayaalon hi se karni hogi koi raushan kahin mash'al nahin hone detaa chun-ki miTTi ki bhi ek apni alag khushbu hai main kahin bhi ise sandal nahin hone detaa ik parinda ki jo sahtaa hai havaaon kaa dabaao aur parvaaz ko paidal nahin hone detaa Dar hai us ko nazar aae na kahin zehn kaa 'aks vo miraa aaina saiqal nahin hone detaa tiraa qaanun hai jangal kaa ghanimat hai ki tu mire is shahr ko jangal nahin hone detaa chalo baat us ki sunein ek 'ajab mantiq se jo kisi baat ko muhmal nahin hone detaa"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"