nigaah-e-yaar se hotaa hai vo khumaar mujhe — Asif Rasheed Asjad

"phuul se khushbu uThi aur rang paikar se uThaa hasrat-e-nazzaara le kar main bhi manzar se uThaa raushni phaili to apni be-ghari ke khauf se ik laraztaa haanptaa saayaa mire Dar se uThaa khvaahish-e-taabir aisi thi ki apni niind se main nahin jaagaa to meraa khvaab bistar se uThaa hashr se kuchh kam nahin hai dast-e-qaatil ke liye khun-e-naahaq to rahaa chup shor khanjar se uThaa aaine kaa ye karam ham pe huaa ki bazm mein vo jo ham se duur baiThaa thaa baraabar se uThaa"

"zamin ke zakhm ko pahle rafu kiyaa jaae phir us ke baad darida falak siyaa jaae hamaaraa aks agar darmiyaan na haail ho to aaine ko gale se lagaa liyaa jaae ye zindagi to puraani sharaab jaisi hai ye kaDvaa ghunT hai lekin ise piyaa jaae jo raftagaan hain unhein lauT kar nahin aanaa ab intizaar kaa bistar uThaa diyaa jaae tumhaari yaad ne shab-khun maarnaa hai to kyaa dil-o-dimaagh se pahra haTaa diyaa jaae hamaare sar pe jo TuuTaa hai aasmaan to kyaa ab aasmaan ko sar par uThaa liyaa jaae"

"nahin hai yuun ke damaa-dam havaa ne raqs kiyaa shadid habs thaa kam kam havaa ne raqs kiyaa bas ek main hi vahaan par tavaaf mein to na thaa darun-e-shahr-e-mukarram havaa ne raqs kiyaa charaagh qatl huaa to khushi se maqtal mein lagaa ke naara-e-raqsam havaa ne raqs kiyaa tamaam din ki tamaazat ke baad raat gae giri jo phuul pe shabnam havaa ne raqs kiyaa samundaron ke safar se palaT ke aai to zaraa zaraa si hui nam havaa ne raqs kiyaa"

"kahaan kisi ko dikhaai gai hai khaamoshi baghair jism banaai gai hai khaamoshi tazaad ye hai banaa kar khanakti miTTi se mire lahu mein milaai gai hai khaamoshi balaa kaa shor unDelaa gayaa hai kaanon mein magar zabaan ko sikhaai gai hai khaamoshi zamin pe is kaa guzaaraa nahin thaa is baais khalaa ke beach basaai gai hai khaamoshi kuchh is liye bhi huaa shor-e-bazm-e-mai ki unhein ghazal banaa ke sunaai gai hai khaamoshi"

"khudaa se mashvara maangaa hai tere baare mein koi ishaara to ab hogaa istikhaare mein ye meri saans jo chaahe kharid saktaa hai main bhar ke bech rahaa huun use ghubaare mein jo baat baat pe divaar rone lagti hai kisi kaa khuun milaayaa hai tu ne gaare mein vo ik charaagh jo aayaa hai mere hisse mein vo jal rahaa hai kisi dusre sitaare mein pataa nahin hai jo ishq-o-havas kaa farq tujhe bataaun sura-e-yusuf hai kis sipaare mein"

"hai ghalat-fahmi havaa ki us se Dar jaataa huun main hausla ban kar charaaghon mein utar jaataa huun main niind ki aaghosh mein thak kar girun main jab kabhi khvaab ji uThte hain mere aur mar jaataa huun main ghar makinon se banaa kartaa hai patthar se nahin bas isi ummid par har roz ghar jaataa huun main main ne tujh se kyaa kabhi puchhaa kidhar jaati hai tu ai shab-e-aavaara tujh ko kyaa kidhar jaataa huun main mere jaane par na ho ghar ki udaasi yuun malul tu agar ghabraa gai hai to Thahar jaataa huun main"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"jis din se meraa khvaab suhaanaa badal gayaa us din se zindagi kaa fasaana badal gayaa sunne lagaa huun jab se nasihat baDon ki main jaari thaa jo labon pe taraana badal gayaa pahchaan kaa havaala bhi baaqi nahin rahaa chehre ke saath aaina-khaana badal gayaa uThti nahin hai aankh bhi ab aasmaan ki samt jab se gali kaa chaand puraanaa badal gayaa tahzib jin ke ghar ki 'alaamat thi kal talak afsos aaj un kaa gharaanaa badal gayaa 'azmat kaa taaj sar pe hai 'akhilesh' ke sajaa aisi havaa chali ki zamaana badal gayaa itni sharaafaton mein kami aa gai hai aaj pahle thaa jo libaas puraanaa badal gayaa ahl-e-vafaa ne jis ki thi taarikh ki raqam 'faaruq' 'ishq kaa vo fasaana badal gayaa"

"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"

"khaamushi ke batn se ye guftani paidaa hui main ba-zaahir chup huaa aur shaaeri paidaa hui is tarah saabit huaa gham aur khushi kaa imtizaaj hanste hanste us ki aankhon mein nami paidaa hui jurm ki paadaash mein ham khaak par pheinke gae so yahaan par intiqaaman zindagi paidaa hui khauf ne hi maslahat ki raah bhi ijaad ki main andheron se Daraa aur raushni paidaa hui dil mein kab utri kisi ke be-maaani guftugu baat karne se to bas aavaaz hi paidaa hui"

"shab ki taarik raahdaari hai aur miraa khauf iztiraari hai sabz khvaabon ki kam se kam qimat zindagi bhar ki ashk-baari hai ik musallat-shuda tamaddun ko ye na kahiye ki ikhtiyaari hai shash-jihaati mushaahida hai miyaan tajrabon ki sanad pe bhaari hai shukriya aap ki mohabbat kaa dil kaa maqsum sogvaari hai tajziye sun ke muskuraa denaa apni itni hi zimmedaari hai"

"ye hai mai-kada yahaan rind hain yahaan sab kaa saaqi imaam hai ye haram nahin hai ai shaikh ji yahaan paarsaai haraam hai jo zaraa si pi ke bahak gayaa use mai-kade se nikaal do yahaan tang-nazar kaa guzar nahin yahaan ahl-e-zarf kaa kaam hai koi mast hai koi tishna-lab to kisi ke haath mein jaam hai magar is pe koi kare bhi kyaa ye to mai-kade kaa nizaam hai ye janaab-e-shaikh kaa falsafa hai 'ajib saare jahaan se jo vahaan piyo to halaal hai jo yahaan piyo to haraam hai tujhe apne husn kaa vaasta mere shauq-e-did pa rahm khaa zaraa muskuraa ke naqaab uThaa ki nazar ko shauq-e-salaam hai na sunnaa to huur o qusur ki ye hikaayatein mujhe vaa'izaa koi baat kar dar-e-yaar ki dar-e-yaar hi se to kaam hai na to e'tikaaf se kuchh gharaz na savaab-o-zuhd se vaasta tiri diid aisi namaaz hai na sujud hai na qayaam hai ye durust ki 'aib hai mai-kashi ye ba-jaa ki baada haraam hai magar ab savaal ye aa paDaa ki tumhaare haath mein jaam hai jo uThi to subh-e-davaam thi jo jhuki to shaam hi shaam thi tiri chashm-e-mast mein saaqiyaa miri zindagi kaa nizaam hai miraa farz hai ki paDaa rahun tiri baargaah mein saaqiyaa koi tishna-lab hai ki sair hai yahi dekhnaa tiraa kaam hai isi kaaenaat mein ai 'jigar' koi inqalaab uThegaa phir ki buland ho ke bhi aadmi abhi khvaahishon kaa ghulaam hai"