phir ham ko ehtiyaat se chalnaa bhi aa gayaa — Haleem Sabir

"mujhe be-khaanmaa kar ke pashemaan vo na yuun hotaa agar meri tabaahi se use haasil sukun hotaa mujhe aasudgi bakhshi thi meri khasta-haali ne mire honTon pe kyon kar shikva-e-haal-e-zubun hotaa dar-e-munim pe jhuk kar sarfaraazi hoti jo haasil main aisi sarfaraazi ke liye kyon sar-nigun hotaa khirad ke saamne hoti na rusvaai kabhi us ki agar josh-e-junun vaaqif ba-aadaab-e-junun hotaa vahi ho ke rahaa aakhir jo honaa thaa mire haq mein ab is par ranj kyaa karnaa ki yuun hotaa na yuun hotaa agar main saahir-e-fan hotaa apne ahd kaa saabir asar-andaaz logon par mire fan kaa fusun hotaa"

"ahl-e-haq bhi aa gae ab un ki mahfil ke qarib maslahat-koshi unhein le aai baatil ke qarib sar se unchaa ho jahaan paani vahin hai Dubnaa ab koi manjdhaar mein Duube ki saahil ke qarib sakht mushkil se bhi ham pahunche na aasaani ke paas kitni aasaani se pahunche log mushkil ke qarib is ghaDi saabit-qadam rahnaa baDaa dushvaar hai Dagmagaate hain qadam jab aa ke manzil ke qarib saamne maqtul ke jo kar rahe the ehtijaaj ho gae gunge sabhi jab aae qaatil ke qarib un ki yaadon se na ham ghaafil rahe 'saabir' kabhi vo nazar se duur rah kar bhi rahe dil ke qarib"

"dil tavangar kaa ho ki muflis kaa ishq par ikhtiyaar hai kis kaa rishte-naate to naam ke hain bas is zamaane mein kaun hai kis kaa paanv us ke bhi to zamin par hain aasmaan par dimaagh hai jis kaa qabl-az-vaqt karti hai mahsus tajraba tez hai chhaTi his kaa aib dekheinge log boleinge band munh kijiyegaa kis kis kaa aane vaalaa salaam kartaa hai hai ye 'saabir' usuul majlis kaa"

"shohratein auron ne paain naam auron ko milaa kaam to ham ne kiyaa inaam auron ko milaa fasl jo main ne ugaai kar ke mehnat raat din jab biki vo fasl meri daam auron ko milaa mere purkhon ne lagaae peD jo mere liye un ki ThanDi chhaanv mein aaraam auron ko milaa mere hisse mein sulagti dopahar ki dhuup thi zindagi kaa lutf subh-o-shaam auron ko milaa thi hamaari haisiyat is shahr mein meamaar ki ham ne chhat taamir ki aaraam auron ko milaa ham bhi pyaase the magar munh dekhte hi rah gae dast-e-saaqi se chhalaktaa jaam auron ko milaa mujh ko 'saabir' har qadam par raah mein kaanTe mile phulon se aaraasta har-gaam auron ko milaa"

"ye log hain kaise ki jinhein gham nahin hotaa mar jaae agar koi to maatam nahin hotaa har dard ki qismat mein davaa bhi nahin hoti har zakhm ki taqdir mein marham nahin hotaa ho jaataa hai shaadaabi-e-rukhsaar se mahrum vo phuul jo aasuda-e-shabnam nahin hotaa izhaar-e-tamannaa ki koi rut nahin hoti iqraar-e-vafaa kaa koi mausam nahin hotaa har dar pe jo jhuk jaae use sar nahin kahte sar vo hai ki jo vaar pe bhi kham nahin hotaa ye dard-e-mohabbat bhi ajab dard hai 'saabir' baDhtaa hai to baDhtaa hai kabhi kam nahin hotaa"

"main badalte hue haalaat pe aksar royaa dekh kar shahr kaa badlaa huaa manzar royaa chup huaa ro ke jo phir royaa mukarrar royaa ro ke jab ji na bharaa meraa to ji bhar royaa jaise-taise mujhe ronaa kabhi aayaa hi nahin jab bhi royaa main bahut soch samajh kar royaa munhasir thaa miraa ronaa bhi miri marzi par chand lamhe kabhi royaa kabhi din bhar royaa mujh ko rone kaa hunar aa gayaa rote rote rone vaalon se ba-har-taur main behtar royaa mere rone kaa bhi andaaz ajab thaa 'saabir' rote rote jo hansi aai to hans kar royaa"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"kisi ki mehrbaani ho gai hai ayaan dil ki kahaani ho gai hai hare mausam ki pahli khvaahishein uf khushi gham ki divaani ho gai hai sabhi afraad ghar ke so gae hain bahut lambi kahaani ho gai hai rivaayat kaa hai ab bhi sahar qaaem har ik jiddat puraani ho gai hai pas-e-chehra milaa ik aur chehra 'aqidat paani paani ho gai hai"