phir nae zakhm nae karb ki jaagir liye — Manzar Azmi

"qissa hai na rudaad kahaani bhi nahin hai ab yaad mujhe us ki nishaani bhi nahin hai jitni hai labon par ye mire pyaas ki shiddat itnaa to mire hisse mein paani bhi nahin hai mujh ko bhi nahin naaz zaraa apne sukhan par duniyaa mire lahje ki divaani bhi nahin hai badli hai bahut is se miri ab ki shabaahat haalaanki ye tasvir puraani bhi nahin hai masruf agar husn hai khud mein to mujhe kyaa fursat mein abhi meri javaani bhi nahin hai duniyaa ki nazar mein hai vo maqbul sukhanvar she'ron mein abhi jis ke ravaani bhi nahin hai main kis ke liye dil ke charaaghon ko jalaaun jab shaam koi meri suhaani bhi nahin hai kyon us ko lagaataa nahin siine se kabhi tu vo jab ki tiraa dushman-e-jaani bhi nahin hai duniyaa na abhi tujh ko samajh paaegi 'manzar' naadaan nahin hai to siyaani bhi nahin hai"

"kar ke daghaa vo phir se vafaa DhunDne lage yaa'ni maraz baDhaa ke davaa DhunDne lage bezaar hain andheron se itne ki raat kyaa ham ghar mein subh-o-shaam diyaa DhunDne lage vo log jo khizaan ke sadaa ham-navaa rahe gulshan mein fasl-e-gul ki fazaa DhunDne lage puuri na us ke dil ki kabhi khvaahishein huiin duniyaa mein had se jo bhi sivaa DhunDne lage naa-aashnaa-e-rahm-o-karam khugar-e-jafaa jab 'ishq mein paDe to vafaa DhunDne lage jin ki nigaah mein thaa farishta-sifat kabhi kyaa ho gayaa hai mujh mein khataa DhunDne lage divaane hain na jaane ye kis raah-e-shauq ke sahraa mein gulsitaan ki havaa DhunDne lage vo maah-rukh hai jab se hamaari nigaah mein har raat chaudhvin ki ziyaa DhunDne lage 'manzar' hain kaisi saada tabi'at ke aap bhi bad-khvaahon mein jo harf-e-du'aa DhunDne lage"

"mahfil pe asar kuchh na hidaayaat kaa hogaa charchaa yahaan phir ku-e-kharaabaat kaa hogaa main us se bichhaDte hue ye soch rahaa huun vo vaqt bhi kyaa khuub mulaaqaat kaa hogaa ki dil ne jo sargoshi to daanish ne kahaa ye kyaa mujh pe asar teri khuraafaat kaa hogaa kyaa ahl-e-siyaasat ko khabar is ki nahin hai shahron pe asar kaisaa fasaadaat kaa hogaa main jis se sadaa bachtaa rahaa huun sar-e-mahfil denaa bhi javaab aise savaalaat kaa hogaa har aan jo duniyaa ko dikhaane ke liye hain ab sochiye kyaa aisi 'ibaadaat kaa hogaa ye ahl-e-jahaan soch ke ab mujh ko bataaein kyaa khaatma farsuda rivaayaat kaa hogaa jo zakhm mire dil ko zamaane se mile hain bhar jaaein to kyaa un ke nishaanaat kaa hogaa 'manzar' tu sadaa haq ke liye likh to rahaa hai par soch le kyaa teri ‘ibaaraat kaa hogaa"

"is daur mein bhi zaalim-o-jaabir ki tarah hain kuchh log yahaan shar ke 'anaasir ki tarah hain kyaa haal hai is shahr ke logon kaa na puchho tapte hue sahraa ke musaafir ki tarah hain kyaa ham se khataa ho gai kyaa jurm huaa hai kyon mulk mein ham apne muhaajir ki tarah hain kal tak jo rahe zulm ki buniyaad pe qaaem kuchh aise mahal aaj maqaabir ki tarah hain yaadein bhi tiri dil mein mire in dinon hamdam haare hue lashkar ke manaazir ki tarah hain gham ho ki khushi rakhtaa huun siine se lagaa kar ye donon mire dil ke 'anaasir ki tarah hain bas ek nazar mein hi banaa leti hain apnaa aankhein tiri bangaal ke saahir ki tarah hain ye aap ki marzi hai ki jo chaahe karein aap duniyaa mein magar aap musaafir ki tarah hain rishta ho koi us ko nibhaane mein ai 'manzar' is vaqt bhi ham apne akaabir ki tarah hain"

"kisi bhi haal mein ye kaam darbaari nahin kartaa main zaalim hukmraan ki hukm-bardaari nahin kartaa ye mumkin thaa mire dushman mujhe barbaad kar dete agar bach kar nikalne ki main hushyaari nahin kartaa sadaa rakhtaa huun main kirdaar apnaa aaine jaisaa kisi ke saath bhi koi riyaa-kaari nahin kartaa bhalaa kaise khudaa ko aakhirat mein munh dikhaaegaa jo roz-e-hashr ki duniyaa mein tayyaari nahin kartaa hamesha chaahtaa hai dusron se jo vafaadaari vahi khud dusron se kyon vafaadaari nahin kartaa hain itne gham ki dil meraa bhi rotaa hai mohabbat mein magar main ashk aankhon se kabhi jaari nahin kartaa na jaane kyaa adaa hai ye mire maa'sum dilbar ki vo dil ki baat to kartaa hai dildaari nahin kartaa bahut se marhale aate hain ban kar bojh bhi lekin kisi bhi bojh ko main zehn par taari nahin kartaa faqat logon se sunte hain kabhi thaa daur yaari kaa kisi se is zamaane mein koi yaari nahin kartaa sadaa bote hain 'manzar' mulk mein jo biij nafrat ke main aise rahnumaaon ki taraf-daari nahin kartaa"

"mire rab ne falak par kahkashaan ko baandh rakkhaa hai bas ik kun se zamin-o-aasmaan ko baandh rakkhaa hai main tujh se tanz kaa badla to le saktaa huun ai vaa'iz magar tahzib ne meri zabaan ko baandh rakkhaa hai bahut se dil dhaDakne lagte hain ik tere aane se tire jalvon ne har pir-o-javaan ko baandh rakkhaa hai dar-o-divaar to bas naam ke hain ai miri jaanaan mohabbat ne tumhaari is makaan ko baandh rakkhaa hai yahaan ki fikr us ko ho nahin sakti kisi surat girah mein apni jis ne bhi vahaan ko baandh rakkhaa hai tijaarat vo kare hai aaj bhi imaan ki jis ne khudaa ke 'ishq mein sud-o-ziyaan ko baandh rakkhaa hai chaman mein aaj bulbul ne sunaa kar daastaan apni gulon ke hijr mein aah-o-fughaan ko baandh rakkhaa hai kahaani-kaar ne mere junun ko ahmiyat de di mire kirdaar hi ne daastaan ko baandh rakkhaa hai safar jaari hai ab bhi justuju-e-'ishq mein naaseh musaafir ne to manzil ke nishaan ko baandh rakkhaa hai vafaaon par tiri kaise karegaa vo yaqin 'manzar' jab us ne zehn se apne gumaan ko baandh rakkhaa hai"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"

"murattab aur bhi ik goshvaara ho rahaa hai to kyaa hai gar abhi ham ko khasaara ho rahaa hai hamaare paas to ham se ziyaada tu nahin thaa so tu kyaa ab to khud se bhi kinaara ho rahaa hai hamaare khvaab mein ahmiyat-e-shab thi ziyaada so ab vo khvaab aankhon mein sitaara ho rahaa hai tumhaari aarzu hone se pahle bhi to ham the guzaara ho rahaa thaa so guzaara ho rahaa hai hayaa-aalud aankhein hain na aanchal hai na chilman ye kis viraan duniyaa kaa nazaara ho rahaa hai abhi ham faisla karne ki ujlat mein nahin hain magar lagtaa hai jiine se khasaara ho rahaa hai khalaa se is zamin par sang-rezo ki ye baarish kisi jaanib se kyaa koi ishaara ho rahaa hai"

"choT par choT khaa rahaa huun main 'aadatan muskuraa rahaa huun main us ke uupar to kuchh asar hi nahin apnaa dil kyon jalaa rahaa huun main aaj tanhaai mein jo baiThe ho kyaa tumhein yaad aa rahaa huun main kaun aaegaa mujh se milne ko apnaa ghar kyon sajaa rahaa huun main aaj ji bhar ke dekh lo mujh ko ab bahut duur jaa rahaa huun main kyaa tumhein ab bhi kuchh shikaayat hai ab to sab kuchh kamaa rahaa huun main haath mein Digriyaan sajaae hue Thokarein kitni khaa rahaa huun main ab mujhe peT in se bharnaa hai ye jo khanjar banaa rahaa huun main kal koi is ko bhi na chhoDegaa ye jo paudaa lagaa rahaa huun main"