saath vo aakhir-e-shab tak rahtaa — Mohammad Haneef Katib

"kyaa muqaddar hai Thahre paani kaa hukm aataa nahin ravaani kaa saaat-e-sabz mambaa-e-anvaar koi unvaan miri kahaani kaa koi patthar uchhaal kar dekho shor hogaa to hogaa paani kaa shor kartaa vajud-e-faani mein ek sannaaTaa laa-makaani kaa mahl thaa ek do the shahzaade ek raaja kaa ek raani kaa saahilon saahilon guzar jaaein koi mausam to ho ravaani kaa bazm-e-surat-garaan mein charchaa thaa ek tasvir-e-raaegaani kaa neza neza ubhar ke dekh liyaa ek dhokaa thaa kaamraani kaa saahilon par bachaa nahin kuchh bhi bas nishaan rah gayaa hai paani kaa"

"silsile fikr-o-fan ke the hi nahin ham to is anjuman ke the hi nahin kaun apnaa hi ghar ujaaDtaa hai baaghbaan vo chaman ke the hi nahin kyon palaT kar idhar nahin dekhaa kyaa bulaave vatan ke the hi nahin mutmain the darun-e-shahr-e-panaah ham sipaahi to ran ke the hi nahin sab navishte to ham ne dekh liye vo havaale matan ke the hi nahin haae vo rabt-e-baahami ki fazaa faasle maa-o-man ke the hi nahin ab khulaa ham pe vo sabhi rishte tan ke the saare man ke the hi nahin"

"hissa mire makaan kaa mujh ko bhi chaahiye ik gosha aasmaan kaa mujh ko bhi chaahiye tum ko bhi chaahiye to chalo baanT lete hain saaya to saaebaan kaa mujh ko bhi chaahiye mujh ko bhi dekhnaa hai kahaan hai miraa makaan naqsha tire jahaan kaa mujh ko bhi chaahiye halkaan ho rahaa huun main tere firaaq mein harjaana meri jaan kaa mujh ko bhi chaahiye kab tak main bheDiyon se hiraasaan phiraa karun ab aasraa machaan kaa mujh ko bhi chaahiye"

"roz-o-shab mujh mein samaataa hai koi nit-nae jalve dikhaataa hai koi chain se kab mujhe sonaa hai nasib vaqt be-vaqt bulaataa hai koi band hai silsila-e-aamad-o-raft koi aataa hai na jaataa hai koi baarhaa mujh ko jalaane ke liye baarhaa mujh ko bujhaataa hai koi jaate jaate to rulaate hain sabhi aate aate bhi rulaataa hai koi daakhle ke sabhi dar band hue yuun bhalaa der se aataa hai koi"

"raat bhar thaa main kisi khvaab mein gum mauj-dar-mauj thaa girdaab mein gum gahre paani kaa shanaavar thaa kabhi dekhnaa ab use paayaab mein gum vajd mein aauun to raqsaan sar-e-bazm aur kabhi khalvat-e-mehraab mein gum ek fariyaad gulu-basta rahi jaise naghma kisi mizraab mein gum dar-ba-dar honaa muqaddar Thahraa jab tavakkul huaa asbaab mein gum ham se hairat kaa safar tai na huaa ham ki the manzar-e-naayaab mein gum khushk hon aankhein to DhunDein tiraa aks tu kahaan jaa ke huaa aab mein gum"

"apni poshaak badalne ke liye aae hain ham tiri aag mein jalne ke liye aae hain kaun kahtaa hai sanbhalne ke liye aae hain ham to sarkaar machalne ke liye aae hain ham kahin aur se aae hain yahaan par vaise aur yaan se bhi nikalne ke liye aae hain vaadi-e-gul kaa pata puchhne aae hain yahaan aur yahaan phulne-phalne ke liye aae hain raat bhar ke liye mil jaae Thikaana ham ko khvaab hain aankh mein palne ke liye aae hain aaj ki raat alaav ke muqaabil honge aaj ki raat pighalne ke liye aae hain hai khabar garm ki kuchh sar-phire aabi dhaare regzaaron mein ubalne ke liye aae hain phir kisi yaad ke aangan ke chamakte jugnu meri aankhon mein machalne ke liye aae hain subh-dam un ki hai dahliz pe haazir honaa raat ke raat nikalne ke liye aae hain"

"tujh ko khiffat se bachaa luun paani tishnagi apni chhupaa luun paani khaak uDti hai har ik chehre par kis ki aankhon se nikaalun paani dhuup dariyaa pe nazar rakhti hai tujh ko kuuze mein chhupaa luun paani uDte phirte hain saron par baadal khvaab aankhon mein basaa luun paani roz bachchon ko sulaa duun yunhi roz patthar ko ubaalun paani aag se kheltaa hai kal mujh ko aa tujhe apnaa banaa luun paani khaarzaaron pe chalun nange paanv khushk dharti ki duaa luun paani sabr ki had bhi to kuchh hoti hai kitnaa palkon pe sambhaalun paani bhuul jaaun na kahin tairaaki kyuun na kashti hi jalaa luun paani apni vahshat kaa ik izhaar sahi kar ke sard aag jalaa luun paani zakhm ho phuul ho yaa angaara ho jo raushan to bulaa luun paani shart hai teri rifaaqat varna vaqt ki aag mein Daalun paani aag matlub-e-lab-e-tishna hai main tujhe kaise bulaa luun paani chashm-e-ahbaab jo ho khushk 'ataa' khuun ko apne banaa luun paani"

"ilaahi mahshar mein bahr-e-pursish jab ek darbaar aam hogaa miri baghal mein suraahi hogi zabaan par teraa naam hogaa nasib tujh ko nahin ye neamat to zahmat-e-tur kar gavaaraa yahaan to hote hain roz jalve kalim tujh ko kalaam hogaa nigah rahe aasmaan pe teri hai taair-e-arsh-aashiyaan tu nazar mein jis ki zamin hogi vahi giraftaar-e-daam hogaa qubul kar markaz-e-haqiqat tiraa makaan laa-makaan hai ai dil majaaz ke daaere mein aakar fuzul paaband-e-naam hogaa harim-e-kaaba-o-dair donon hain qaabil-e-ehtiraam lekin nazaaa-e-baaham ke hon na markaz to phir dili-ehtiraam hogaa tu nashsha-e-zohd kaa hai taalib tujhe kahaan vajd-e-jaavedaani jo rind-e-mast-e-mudaam hogaa vo raazdaar-e-davaam hogaa shuur kahte hain jis ko aaqil vo roz mehvar badal rahaa hai jo aa gayaa jaada-e-junun mein sukun mein us kaa qiyaam hogaa na hongi hal mushkilaat 'aiman' fuzul sab koshishein hain teri khudaa se imdaad ki duaa kar baghair is ke na kaam hogaa"

"dam-ba-khud meri anaa teri adaa bhi dam-ba-khud tere pahlu mein rahaa main aur rahaa bhi dam-ba-khud dekhiye pahle lahu Tapke ki phailein kirchiyaan dam-ba-khud teri nazar bhi aaina bhi dam-ba-khud itnaa sannaaTaa ki jaise avvalin shaam-e-firaaq dam-ba-khud hai aasmaan bhi aur havaa bhi dam-ba-khud yaad hai tujh ko vo pahle lams ki hiddat ki jab rah gai thi dafatan teri hayaa bhi dam-ba-khud ek se aalam mein donon mukhtalif asbaab se dam-ba-khud teraa karam meri duaa bhi dam-ba-khud aisaa lagtaa hai ki donon se nahin nisbat mujhe dam-ba-khud umr-e-ravaan sail-e-fanaa bhi dam-ba-khud khauf-e-tajdid-e-taaluq darmiyaan haail rahaa dam-ba-khud teraa sitam meraa galaa bhi dam-ba-khud yuun gumaan hotaa hai donon ki tavaqqoa ek thi dam-ba-khud teri vafaa meri sazaa bhi dam-ba-khud jab khule meri haqiqat tum vo manzar dekhnaa dam-ba-khud naa-aashnaa bhi aashnaa bhi dam-ba-khud"

"yaar ke bhes mein mahbub sitamgar niklaa phuul ham jis ko samajhte the vo patthar niklaa ek roTi ke evaz de gayaa jannat ki duaa mere kuche kaa bhikaari bhi mukhayyar niklaa aaj-kal aankh kaa dekhaa bhi ghalat hotaa hai jis ko samjhe the apaahij vo tavangar niklaa vaqt kamzor ko shah-zor banaa detaa hai shaam ko Duubaa magar subh mein khaavar niklaa ghar badalne se bhi taqdir badal jaati hai siip mein paani paDaa ban ke vo gauhar niklaa jo mire zehn-o-takhayyul mein bahut unchaa thaa us kaa qad taalib-e-duniyaa ke baraabar niklaa jis ke zimme thi mire ghar ki hifaazat 'muztar' dushmanon kaa mire vo shakhs bhi ham-sar niklaa"

"khauf dil mein na tire dar ke gadaa ne rakkhaa din ko kashkol bharaa shab ko sirhaane rakkhaa fikr-e-meaar-e-sukhan baais-e-aazaar hui tang rakkhaa to hamein apni qabaa ne rakkhaa raat fōtpath pe din bhar ki thakan kaam aai us kaa bistar bhi kyaa sar pe bhi taane rakkhaa khauf aayaa nahin saanpon ke ghane jangal mein mujh ko mahfuz miri maan ki duaa ne rakkhaa ye alag baat samundar pe vo barsi 'saajid' aur kisi khet ko pyaasaa na ghaTaa ne rakkhaa"

"dard kab dil mein mehrbaan na rahaa haan magar qaabil-e-bayaan na rahaa ham jo gulshan mein the bahaar na thi jab bahaar aai aashiyaan na rahaa gham garaan jab na thaa garaan thaa mujhe jab garaan ho gayaa garaan na rahaa doston kaa karam maaaz-allaah shikva-e-jaur-e-dushmanaan na rahaa bijliyon ko duaaein detaa huun dosh par baar-e-aashiyaan na rahaa"