tiir jaise kamaan se niklaa — Ghani Ejaz

"thakan ghaalib hai dam TuuTe hue hain safar jaari qadam TuuTe hue hain ba-zaahir to hain saalim jism-o-jaan se magar andar se ham TuuTe hue hain adhure hain yahaan saare ke saare sabhi to besh-o-kam TuuTe hue hain buraa ho e'timaad-e-baahami kaa ki sab qaul-o-qasam TuuTe hue hain taalluq TuTne ko hai jahaan se chalo ki band-e-gham TuuTe hue hain khudaa kaa ghar na bakhshaa zaalimon ne kai dair-o-haram TuuTe hue hain unhein munsif nahin qaatil kaho tum ki sab un ke qalam TuuTe hue hain"

"khvaahishein apni saraabon mein na rakkhe koi in havaaon ko habaabon mein na rakkhe koi chand lamhon kaa ye jiinaa hai ghanimat jaano zindagi apni azaabon mein na rakkhe koi aaj har fard hai ik hasrat-e-taabir liye ab khayaalaat ko khvaabon mein na rakkhe koi kaam tahqiq ke unvaan pe baDhegaa kaise gar savaalon ko javaabon mein na rakkhe koi ye bhi kyaa zid hai ki kaanTon ko mahakne diije yaani khushbu ko gulaabon mein na rakkhe koi nekiyaan kitni hain 'ejaaz' hisaar-e-dil mein khubiyaan hon to kharaabon mein na rakkhe koi"

"parinda hadd-e-nazar tak jo aasmaan mein hai paron mein zor kahaan hausla uDaan mein hai abhi se bhiig rahaa hai hadaf pasine mein ki tiir chhuTaa nahin hai abhi kamaan mein hai giregi kaun si chhat pe ye kab kise maalum kaTi patang havaaon ke imtihaan mein hai sukun-e-qalb ko mahlon mein DhunDne vaalo sukun-e-qalb faqiron ke khaandaan mein hai kharidnaa hai jo tohfa tumhein mohabbat kaa milegaa dil ke evaz dard ki dukaan mein hai hayaat-o-maut faqat naam ghar badalne kaa sameT rakkhaa hai saamaan saaebaan mein hai"

"junun mein der se khud ko pukaartaa huun main jo gham hai daaman-e-sahraa mein vo sadaa huun main badal gayaa hai zamaana badal gayaa huun main ab apni samt bhi hairat se dekhtaa huun main hayaat ek sazaa hai bhagat rahaa huun main dar-e-qubul se lauTi hui duaa huun main jise khud aap hi apne pe pyaar aa jaae jafaa ke daur mein vo laghzish-e-vafaa huun main jamaal-e-yaar ki raanaaiyaan maaaz-allaah nigaah ban ke nazaaron mein kho gayaa huun main bas ek jumbish-e-lab tak vajud hai jis kaa zabaan-e-shauq pe vo harf-e-muddaaa huun main agar hai jurm mohabbat to phir takalluf kyaa madaar-e-jurm huun taqsir huun khataa huun main rafaaqaton ke ye faanus taa-ba-kai 'ejaaz' havaa ki zad pe laraztaa huaa diyaa huun main"

"bijli ki zad mein ek miraa aashiyaan nahin vo kaun si zamin hai jahaan aasmaan nahin bulbul ko gham hai gul ke nigahbaan nahin rahe gulchin hai khush ki ab koi daaman-kashaan nahin manzil kaa milnaa zauq-e-tajassus ki maut hai achchhaa hai jo hayaat miri kaamraan nahin chashm-e-karam nahin nigah-e-khashmagin to hai naa-mehrbaan to hain vo agar mehrbaan nahin vo apni apni tarz-e-takallum ki baat hai gul mahv-e-guftugu hain go munh mein zabaan nahin"

"bijli giri to soch ke sab taar kaT gae yak-lakht raushni se andhere lipaT gae sahraa-navardiyon mein to mahfuz the magar shahron ke aas-paas hi kheme ulaT gae milne ko chand roz mile the sukun ke din apni umr ke to bahar-haal ghaT gae saae ki phailte hi chale the zamin par suraj ne junhi aankh dikhaai simaT gae anjaam-e-kaar khud hi shikaari the jaal mein 'ejaaz' ahl-e-jaur ke paanse palaT gae"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"