vusat-e-chashm ko andoh-e-basaarat likkhaa — Azm Bahzad

"khultaa nahin ki ham mein khizaan-dida kaun hai aasudgi ke baab mein ranjida kaun hai aamaadgi ko vasl se mashrut mat samajh ye dekh is savaal pe sanjida kaun hai dekhun jo aaina to ghunuda dikhaai duun main khvaab mein nahin to ye khvaabida kaun hai amboh-e-ahl-e-zakhm to kab kaa guzar chukaa ab rahguzar pe khaak mein ghaltida kaun hai ai karb-naa-rasaai kabhi ye to ghaur kar mere sivaa yahaan tiraa girvida kaun hai har shakhs dusre ki malaamat kaa hai shikaar aakhir yahaan kisi kaa pasandida kaun hai to azm-e-tark-e-ishq pe qaaem to hai magar tujh mein ye chand roz se larzida kaun hai"

"vusat-e-chashm ko andoh-e-basaarat likhkhaa main ne ik vasl ko ik hijr ki haalat likhkhaa main ne parvaaz likhi hadd-e-falak se aage aur be-baal-o-pari ko bhi nihaayat likhkhaa main ne khushbu ko likhaa dastaras-e-gum-shudagi rang ko faasla rakhne ki riaayat likkhaa husn-e-goyaai ko likhnaa thaa likhi sargoshi shor likhnaa thaa so aazaar-e-samaaat likhkhaa main ne taabir ko tahrir mein aane na diyaa khvaab likhte hue mohtaaj-e-bashaarat likhkhaa koi aasaan rifaaqat nahin likkhi main ne qurb ko jab bhi likhaa jazb-e-raqaabat likhkhaa itne daaon se guzar kar ye khayaal aataa hai 'azm' kyaa tum ne kabhi harf-e-nadaamat likhkhaa"

"shaam aai to koi khush-badani yaad aai mujhe ik shakhs ki vaada-shikni yaad aai mujhe yaad aayaa ki ik daur thaa sargoshi kaa aaj usi daur ki ik kam-sukhani yaad aai masnad-e-naghma se ik rang-e-tabassum ubhraa khilkhilaati hui ghuncha-dahni yaad aai lab jo yaad aae to boson ki khalish jaag uThi phuul mahke to mujhe be-chamani yaad aai phir tasavvur mein chali aai mahakti hui shab aur simTi hui be pairahani yaad aai haan kabhi dil se guzartaa thaa julus-e-khvaahish aaj usi tarah ki ik naara-zani yaad aai qisa-e-rafta ko dohraa to liyaa 'azm' magar kis masaafat pe tumhein be-vatani yaad aai"

"mujhe kal achaanak khayaal aa gayaa aasmaan kho na jaae samundar ko sar karte karte kahin baadbaan kho na jaae koi naa-muraadi ki yalghaar siine ko chhalni na kar de kahin dasht-e-anfaas mein sabr kaa kaarvaan kho na jaae ye hanstaa huaa shor sanjidgi ke liye imtihaan hai so mohtaat rahnaa ki tahzib-e-aah-o-fughaan kho na jaae ise vaqt kaa jabr kahiye ki bechaargi jism o jaan ki makaan khone vaalon ko Dar hai ki ab laa-makaan kho na jaae main apne iraadon ki gaThri uThaae kahin jaa na paayaa hamesha ye dhaDkaa rahaa mahfil-e-dostaan kho na jaae ye qisson ki rim-jhim mein bhigaa huaa halqa-e-guftugu hai yahaan chup hi rahnaa ki taasir-e-lafz-o-bayaan kho na jaae yahaan kis ko fursat ki aaghaaz o anjaam ko yaad rakkhe sabhi ko ye tashvish hai vaqt kaa darmiyaan kho na jaae ye baazaar-e-nafa-o-zarar hai yahaan be-tavaazun na honaa sameTo agar suud to dhyaan rakhnaa ziyaan kho na jaae uTho 'azm' is aatish-e-shauq ko sard hone se roko agar ruk na paae to koshish ye karnaa dhuaan kho na jaae"

"us aankh se vahshat ki taasir uThaa laayaa main jaagte rahne ki tadbir uThaa laayaa main niyat-e-shab-khun se kheme mein gayaa lekin dushman ke sirhaane se shamshir uThaa laayaa vo subh-e-rihaai thi yaa shaam-e-asiri thi jab main dar-e-zindaan se zanjir uThaa laayaa aavaara-mizaaji par harf aane se pahle hi dil tere taghaaful ki tasvir uThaa laayaa ai khvaab-e-paziraai tu kyuun miri aankhon mein andesha-e-duniyaa ki taabir uThaa laayaa vo sang-e-malaamat thaa jis ko tiraa dil kah kar us kuche se mujh jaisaa rah-gir uThaa laayaa us shakhs se main sab ko ujlat mein milaa baiThaa aur apne liye kaisi taakhir uThaa laayaa maidaan-e-shikaayat se kyaa apne sivaa laataa ik ranj thaa main jis ki taamir uThaa laayaa us bazm-e-sukhan mein ham kyaa pahunche ki shor uTThaa lo 'azm' koi zakhmi tahrir uThaa laayaa"

"dil soyaa huaa thaa muddat se ye kaisi bashaarat jaagi hai is baar lahu mein khvaab nahin taabir ki lazzat jaati hai is baar nazar ke aangan mein jo phuul khilaa khush-rang lagaa is baar basaarat ke dil mein naadida basirat jaagi hai ik baam-e-sukhan par ham ne bhi kuchh kahne ki khvaahish ki thi ik umr ke baad hamaare liye ab jaa ke samaaat jaagi hai ik dast-e-duaa ki narmi se ik chashm-e-talab ki surkhi tak ahvaal baraabar hone mein ik nasl ki vahshat jaagi hai ai taana-zanon do chaar baras tum bol liye ab dekhte jaao shamshir-e-sukhan kis haath mein hai kis khuun mein hiddat jaagi hai"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"