yaa-rab hayaat-e-ishq miri be-mazaa na ho — Naresh M. A

"mausam-e-gul aa gayaa saaghar uThaa saaqiyaa ab zindagi ke giit gaa ab na rah rah kar sitamgar yaad aa yuun na fitna-gar mujhe paiham sataa ai ajal ab kyaa hai tujh ko intizaar mujh ko teri justuju hai khuub aa de rahe hain is qadar dhoke nadim uTh gai ho jaise duniyaa se vafaa ittifaaqan lab pe shikve aa gae ye nahin thaa varna meraa muddaaa ab hamein dair-o-haram se kyaa gharaz ishq dil mein bas gayaa hai aap kaa mujh pe phir farmaaeinge vo mashq-e-naaz phir miraa soyaa muqaddar jaag uThaa yaad mein barson kisi ki ai 'naresh' main lahu shaam-o-sahar rotaa rahaa"

"baada-o-jaam-o-pir-e-mai-khaana meraa dil hai inhin kaa divaana yuun muzayyan ho bazm-e-rindaana mai ho saaqi ho aur paimaana josh-e-vahshat ki ye inaayat hai dil ko bhaane lagaa hai viraana jo hamesha rahaa qarin dil ke aaj kyon ho rahaa hai begaana laakh tauba ki mai-kashi se 'naresh' dil se nikli na yaad-e-mai-khaana"

"saaghar ki kahaani bhuul gae shishe kaa fasaana bhuul gae jis vaqt laDi saaqi se nazar ham jaam uThaanaa bhuul gae ham mahv-e-nazaara kyaa hote ai dost bhalaa is mahfil mein jis bazm mein hosh-o-khirad kho kar ham hosh mein aanaa bhuul gae hai daar-o-madaar-e-ranj-o-sukun is dil kaa un ki marzi par jis vaqt zaraa hans hans ke mile ham haal sunaanaa bhuul gae sochaa thaa vo khvaab mein aaeinge ji bhar ke karungaa shikve gile afsos ki ye bhi ho na sakaa vo khvaab mein aanaa bhuul gae furqat mein 'naresh'-e-khasta-jaan ko is tarah jo taDpaate ho duzdida-nigaahi se apni kyaa barq giraanaa bhuul gae"

"husn par jaan nisaar kartaa huun shama-ruon ko pyaar kartaa huun aap ke ishq ne jo bakhshe hain un ghamon kaa shumaar kartaa huun aah imaan-parast ho kar bhi ek kaafir se pyaar kartaa huun mujh pe vo mashq-e-naaz karte hain shukr-e-parvardigaar kartaa huun dil ko har dam fareb detaa huun aap kaa intizaar kartaa huun go tiraa ahd ahd-e-baatil hai phir bhi main eatibaar kartaa huun gul-rukhon ki adaa adaa pe 'naresh' main dil-o-jaan nisaar kartaa huun"

"yuun na mujh ko pyaar se lillaah dekho baar baar ye adaa to aur bhi karti hain dil ko be-qaraar vaada kar ke bhi na tum aao tumhaaraa ikhtiyaar ham kareinge raat-din phir bhi tumhaaraa intizaar guftugu miThi dilon mein bughz niyyat mein fasaad kijiye kyaa khaak duniyaa mein kisi kaa eatibaar lo khudaa-haafiz mire hosh-o-khirad kaa dosto phuul phir khilne lage phir aa gai fasl-e-bahaar ham to jab jaanein ki kaam aae musibat mein koi varna yuun kahne ko duniyaa mein hain laakhon jaan-nisaar chand roza aadmi ki zindagi kaa ham-nashin koi bhi pahlu nazar aaya na mujh ko paaedaar ham to aksar khuun roe hain javaani mein 'naresh' aur honge jin ke hai ahd-e-javaani saazgaar"

"koi baada-kash jise mai-kashi kaa tariq-e-khaas na aa sakaa gham-e-zindagi ki kashaa-kashon se kabhi najaat na paa sakaa ye muqaddaraat ke shoabde ye mire nasib ye bebasi ki vo puchhne bhi lage kabhi to main dard-e-dil na sunaa sakaa miri hamsari kaa khayaal kyaa miri ham-rahi kaa savaal kyaa rah-e-ishq kaa koi raah-rau miri gard ko bhi na paa sakaa zar-o-sim shohrat-o-martaba mujhe is jahaan mein milaa na kyaa magar ek shai thi sukun-e-dil jo main zindagi mein na paa sakaa miri guftugu mein vo zor thaa ki sukhan-shanaas the dam-ba-khud magar un ki mahfil-e-naaz mein main zabaan tak na hilaa sakaa kabhi aandhiyon ne uDaa diyaa kabhi bijliyon ne jalaa diyaa kisi haal mein miraa aashiyaan mujhe aah raas na aa sakaa kahin doston ki tasalliyon se hui hai dard mein kuchh kami ye to ek kahne ki baat hai koi gham hai kis kaa baTaa sakaa use ai 'naresh' main kyaa kahun jo kahun na ishq kaa moajiza ki gham-e-jahaan to gham-e-jahaan mujhe aasmaan na miTaa sakaa"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"taavil-e-ahd-e-fan hi to vahshat kaa hal nahin pesh-e-nazar junun hai yaaro ghazal nahin ab is ke baad ahd ki taarik raat hai ye ikhtitaam-e-shaam hai subh-e-azal nahin ai dost ishq mansab-e-fahm-o-shuur hai ye irtiqaa hai zehn kaa koi khalal nahin ik umr ratjagon ki aziyyat mein kaaT di ab mere khvaab niind kaa radd-e-amal nahin kyaa kyaa ataa-e-neamat-e-rabb-e-karim hai lekin 'samir' dard kaa nemul-badal nahin"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"sharik-e-aalam-e-kaif-o-surur main bhi thaa ki raat jashn mein tere huzur main bhi thaa ajiib vaqt thaa duniyaa qarib thi mere ghazab ye thaa tire daaman se duur main bhi thaa ghamon ke ghere mein jab raqs kar rahi thi hayaat tamaash-bin ki tarah be-shuur main bhi thaa na ruknaa raah mein shart-e-safar mein shaamil thaa thakan se varna bahut chuur chuur main bhi thaa utar rahaa thaa lahu kis balaa kaa aankhon mein tire khayaal mein us dam zarur main bhi thaa guzarte vaqt ne pahre baiThaa diye 'aabid' khataaein un ki na thiin be-qusur main bhi thaa"

"raakh ke Dher pe kyaa shoala-bayaani karte ek qisse ki bhalaa kitni kahaani karte husn itnaa thaa ki mumkin hi na thi khud-nigari ek imkaan ki kab tak nigaraani karte shola-e-jaan ko bujhaate yunhi qatra qatra khud ko ham aag banaate tujhe paani karte phuul saa tujh ko mahaktaa huaa rakhte shab bhar apne saanson se tujhe raat ki raani karte naddiyaan dekhein to bas sharm se paani ho jaaein chashm-e-khun-basta se paidaa vo ravaani karte sab se kahte ki ye qissa hai puraanaa saahab aah ki aanch se tasvir puraani karte dar-o-divaar badalne mein kahaan ki mushkil ghar jo hotaa to bhalaa naql-e-makaani karte koi aa jaataa kabhi yunhi agar dil ke qarib ham tiraa zikr pae-yaad-dahaani karte sach to ye hai ki tire hijr kaa ab ranj nahin kyaa dikhaave ke liye ashk-fishaani karte dil ko har lahza hi di aql pe ham ne tarjih yaar-e-jaani ko kahaan dushman-e-jaani karte shab isi tarah basar hoti hai meri 'irfaan' harf-e-khush-rang ko andoh-e-maaani karte"