ye varaa-e-makaan mulaaqaatein — Farah Rizwi

"laakh chhupte phirein harfon mein simaTte jaaein sher uftaad hain uD uD ke lipaTte jaaein hasrats-e-hauq ne is darja uDaai rangat ab jo manzar hamein dekhein to ThiTakte jaaein dastak-e-gham ne miri niind abhi toDi hai kirchiyaan chunte hue khvaab sisakte jaaein be-ghaDi rasm-e-aqidat si nibhaai ham ne ghar ko jaaein bhi to sau baar bhaTakte jaaein shoala-e-dil tu jalaaegaa hamein yuun kab tak teri marzi hai sar-e-hashr dahakte jaaein"

"chalo sabil karein us ko jaa manaane se khushi ko giit mayassar nahin zamaane se sukut aisaa samar-baar to kabhi na huaa gul-e-malaal jhaDaa ab ke shaakhsaane se tumhaaraa qurb hatheli pe ret jaisaa hai havaa ke saath bikhartaa hai ik bahaane se ham apne bas mein jabinon ke bal nahin jaate hamein charaagh bulaate hain aastaane se vo dil ke saath ulajhti hui kamaan-e-talab vo ek tiir uchaTtaa huaa nishaane se hamaare zakhm tamaashaa nahin hain hairat hain so is liye bhi chhupaate hain ik zamaane se"

"vaahima iztiraab ki chaukhaT be-yaqini saraab ki chaukhaT abtari aastaana-e-vahshat raaegaani azaab ki chaukhaT surmai shaam ke gharaunde mein ye shafaq maahtaab ki chaukhaT is kitaab-e-dar-e-tamannaa par hai tire intisaab ki chaukhaT aks hai zau-fishaaniyon kaa mahl aaina aab-o-taab ki chaukhaT khvaahishon ki ghulaam-gardish mein tishnagi baaryaab ki chaukhaT"

"dil ko aazaar lagaa deti hai abtari paar lagaa deti hai chaand to ek hi hotaa hai qalaq be-kali chaar lagaa deti hai ham vo tasvir khamoshi hain jise khud pe divaar lagaa deti hai hasrats-e-hauq ki chyunTi dil mein gham kaa ambaar lagaa deti hai zindagi tere tamaanchon se hazar roz do chaar lagaa deti hai"

"phir se darpesh safar kaa qissa ek TuuTe hue ghar kaa qissa ham ne taaviz ki surat baandhaa dil se nikle hue Dar kaa qissa gosha-e-chashm kaa jalte rahnaa khushk hote hue tar kaa qissa khair ne baanjh zaminon pe likhaa lahlahaate hue shar kaa qissa phailte phailte kaisaa phailaa be-ghari teri khabar kaa qissa biij ko khaak-e-numu tu bakhshe khiltaa jaaegaa shajar kaa qissa"

"jis dam khayaal-e-yaar ki be-chehragi gai aaina-e-firaaq se be-raunaqi gai baiThaa ghubaar-e-hasrat-e-taamir ab ki baar shauq-e-safar ki raah mein aavaargi gai vahshat hamaare zabt kaa ujDaa mazaar hai laakhon jatan kiye na saraasimgi gai ham se qabaa-e-dard pe taare na Tank sake kasb-e-hunar ki taak mein vaamaandgi gai hone kaa e'tibaar banaati sahar ke saath kirnon ki be-niyaaz tar-o-taazgi gai"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"kal shab dil-e-aavaara ko siine se nikaalaa ye aakhiri kaafir bhi madine se nikaalaa ye fauj nikalti thi kahaan khaana-e-dil se yaadon ko nihaayat hi qarine se nikaalaa main khuun bahaa kar bhi huaa baagh mein rusvaa us gul ne magar kaam pasine se nikaalaa Thahre hain zar-o-sim ke haqdaar tamaashaai aur maar-e-siyah ham ne dafine se nikaalaa ye soch ke saahil pe safar khatm na ho jaae baahar na kabhi paanv safine se nikaalaa"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"