ye zamin aasmaan kaa mumkin — Zafar Iqbal

"us ki har tarz-e-taghaaful pe nazar rakhti hai aankh hai dil to nahin saari khabar rakhti hai lab tak aaegi magar aa ke palaT jaaegi TuTaa-phuTaa sahi ye aah bhi ghar rakhti hai dil se ubhraa hai judaai kaa chamaktaa suraj raat bhi aaj tab-o-taab-e-sahar rakhti hai chaand ki chaandni deti hai qaraar aankhon ko dil ki maujon ko magar zer-o-zabar rakhti hai mujh se aage hain mire saath nikalne vaale ik yahi baat mujhe garm-e-safar rakhti hai tu ne ai muntazir-e-marg na sochaa varna zindagi bhi isi vaadi mein guzar rakhti hai be-dili teri koi dam ki hai mehmaan ki ye tuda-e-barf hai siine mein sharar rakhti hai"

"qaafiya chaahiye khaane ke liye yaa'ni matle' mein khapaane ke liye khosha-chinon ko khabar hai shaayad main kamaataa huun luTaane ke liye sab se pahle suni us ne miri baat bazm se mujh ko uThaane ke liye muft mein us se laDaai le li koi pahunchaa na chhuDaane ke liye huaa ijaad khushi kaa Tiika gham ki mi'aad baDhaane ke liye kuchh havaa chaahiye aakhir mujh ko saans kaa sankh bajaane ke liye kuchh fazaa ki bhi zarurat hai mujhe apni be-par ki uDaane ke liye Tuut jaane ke liye juDtaa huun she'r likhtaa huun miTaane ke liye shaa'iri asl kahaan hai ki 'zafar' daant hain ye to dikhaane ke liye"

"pichhe pichhe aataa huun aankhein miche aataa huun uupar aa nahin sakte aap main hi niche aataa huun chal nahin saktaa apne aap khud ko khinche aataa huun kahin gae hote hain phuul jis baaghiche aataa huun Dartaa huun be-shar'i se bin paaeinche aataa huun naak apni hi toDungaa muTThi bhinche aataa huun jaaungaa aache bhi 'zafar' abhi to iiche aataa huun"

"roz is dil ki sifaarish nahin ki jaa sakti aap se aur guzaarish nahin ki jaa sakti aap ke khvaab to ham dekhte rahte hain bahut ik zaraa aap ki khvaahish nahin ki jaa sakti aap ko gher ke laanaa to nahin naa-mumkin magar is abr se baarish nahin ki jaa sakti aate jaate to hain is dil ke makaan mein itnaa kahiye kyaa is mein rihaaish nahin ki jaa sakti ye jo koshish hai rah-e-raast pe laane ki mujhe isse baDh kar koi saazish nahin ki jaa sakti ye adab-gaah-e-mohabbat hai so ham jaante hain aap ke saamne jumbish nahin ki jaa sakti hone vaalaa hi nahin kaam paDaa hai jo 'zafar' ye nahin hai koi koshish nahin ki jaa sakti"

"har hujjat hiila chhoD diyaa lafzon ko Dhilaa chhoD diyaa suraj ki tarah ghurub hue dharti ko giilaa chhoD diyaa kahin jhaaDu diyaa safaai se kahin tinkaa tiilaa chhoD diyaa phike pakvaan ki hasrat mein saalan mirchilaa chhoD diyaa us tez hare hariyaale par kuchh piilaa piilaa chhoD diyaa uupar taariki si kar ke niche chamkilaa chhoD diyaa ghar mein to khuub kifaayat ki baahar kharchilaa chhoD diyaa chubhtaa hi rahaa din raat 'zafar' kyaa she'r nukilaa chhoD diyaa"

"qaafiye ki band galiyon kaa gadaagar kar diyaa us ne kaise kaam par mujh ko muqarrar kar diyaa ham kai the aur hamaare raaste bhi the kai vo akelaa thaa so us ne maa'raka sar kar diyaa jis ne chori ki thi sau pachchaas par chhoDaa use jo saDak par jaa rahaa thaa us ko andar kar diyaa chhat zamin par aa rahi naazuk the shahtir is qadar gir paDi divaar bhi aisaa palastar kar diyaa raushni ab raah se bhaTkaa bhi deti hai miyaan us ki aankhon ki chamak ne mujh ko be-ghar kar diyaa jhuTh-muTh aakhir gale mil kar ba-zo'm-e-khud 'zafar' aglaa pichhlaa sab hisaab us ne baraabar kar diyaa"

"pahaaD jo khaDaa huaa thaa khvaab-saa khayaal saa bikhar gayaa hai raaste mein gard-e-maah-o-saal saa nazar kaa farq kahiye is ko hijr hai visaal saa uruuj kah rahe hain jis ko hai vahi zavaal saa tumhaaraa lafz sach kaa saath de sakaa na duur tak misaal jis ki de rahe ho hai vo be-misaal saa khulus ke hiran ko DhunD kar riyaa ke shahr mein mire aziiz kar rahe ho tum ajab kamaal saa adaavaton ki mauj jis zamin pe bo gai namak ugegaa sabza-zaar us jagah ye hai muhaal saa shab-e-visaal aaine mein paD gayaa shigaaf kyun? hamaaraa dil to saaf hai tumhein hai kyuun malaal saa 'karaamat'-e-hazin faraar ho ke haal-e-zaar se guzishta ahd se milaa to vo lagaa hai haal saa"

"dil hai tire pyaar karne kuun ji hai tujh par nisaar karne kuun ik lahr lutf ki hamein bas hai gham ke dariyaa suun paar karne kuun chashm meri hai abr-e-nisaani girya-e-zaar-zaar karne kuun chashm niin anjhuvaan ki basti ki zulm teraa shumaar karne kuun rashk siin jab koi chhue vo zulf dil uThe maar maar karne kuun is adaa suun laTak laTak mat aa dil miraa be-qaraar karne kuun naanv kuun garche tu mamulaa hai baaz hai dil shikaar karne kuun kyaa karun kis se jaa lagaaun ghaat 'aabru' us ke yaar karne kuun"

"dil ko sabr-o-qaraar bhi na huaa jabr par ikhtiyaar bhi na huaa laala har chand baagh mein phulaa gul-rukhon mein shumaar bhi na huaa mar miTe fikr mein uruuj ke ham khaak unchaa ghubaar bhi na huaa rah gayaa tir-e-yaar pahlu mein kyaa sitam hai ki paar bhi na huaa khuun se mere daaman-e-qaatil takhta-e-laala-zaar bhi na huaa mai se mujh ko khumaar bhi na huaa nashsha kaisaa utaar bhi na huaa asar-e-chashm-e-zaar bhi na huaa saaf un kaa ghubaar bhi na huaa ek bose ko to ginaa sau baar gaaliyon kaa shumaar bhi na huaa un ki rusvaaiyon kaa paas rahaa main kabhi ashk-baar bhi na huaa sarv ne sar-kashi se kyaa paayaa shajar-e-meva-daar bhi na huaa"

"chaman mein phulon kaa daamaan-e-taar-taar bhi dekh bahaar dekh chukaa haasil-e-bahaar bhi dekh asir-e-subh-e-tarab shaam-e-sogvaar bhi dekh guzarte lamhon kaa ik aur shaahkaar bhi dekh mah-o-nujum ke jalvon se khelne vaale fazaa mein phailaa huaa rang-e-intishaar bhi dekh tire khayaal se aage tiri nazar se pare jo pal rahe hain vo lamhaat-e-khalfishaar bhi dekh nikal ke marmarin mahlon ke sard-khaanon se tapaa tapaa saa gharibon kaa reg-zaar bhi dekh bahaar ghuncha-o-gul se nazar haTaa ke zaraa sisakti qaum ke zakhmon kaa laala-zaar bhi dekh ba-naam-e-amn liye aslahon ke daaman se jo uTh rahaa hai vo tufaan-e-shoala-baar bhi dekh lahu lahu hai jahaan jism-e-aashti 'ahmar' sitam-rasidon kaa vo khun-chakaan dayaar bhi dekh"

"giraft-e-zist mein huun qaid-e-be-hisaar mein huun azaab-e-arsa-gah-e-jabr-o-ikhtiyaar mein huun khayaal hai to abhi DhunDh phir milun na milun abhi main tere uDaae hue ghubaar mein huun bhaDak rahaa hai badan ruuh ko khabar bhi nahin ye kyaa maqaam hai ye kaise shoala-zaar mein huun main kaun huun tire nazdik ye savaal nahin hubaab huun ki sadaf bahar-e-be-kanaar mein huun khud apne aap se har dam huun barsar-e-paikaar main apni zaat ke maidaan-e-kaar-zaar mein huun mein bhed kyaa tujhe duun be-karaan khalaaon ke ki main azal se isi halqa-e-madaar mein huun talaash kis ki hai mujh ko abhi ye kyaa sochun 'bashir' abhi to main apne hi intizaar mein huun"

"vo sanam jo mehr-ezaar hai use ham se milne mein aar hai vale apnaa jo dil-e-zaar hai vo hazaar jaan se nisaar hai mile jab se kuche mein us ke jaa ye surur-e-aish hai barmalaa lab-e-dil hai aur vo naqsh-e-paa bar-e-jaan hai aur dar-e-yaar hai vo nigah jo us ki hai fitna-gar use mashq-e-said hai pesh-tar hai jo dil kaa taair-e-tez-par usi baaz kaa ye shikaar hai vo mizha lagaa ke jo ek sinaan gai phir to kar na dil ab fughaan kai aise hoveinge imtihaan ye abhi to pahlaa hi vaar hai jo bahaar gul pe rahi hai tul hamein kyaa jo husn ki pi hai mul jinhein chaahiye hai vo rashk-e-gul unhein gul se kyaa sarokaar hai jo buton ko devein dil aur diin rakhein us ko ye ba-alam qarin bhalaa kahiye kyaa use ham-nashin ye ajab kuchh un kaa shiaar hai kai din hue hain 'nazir' ab ki khafaa hai ham se vo ghuncha-lab use kyaa vale hamein roz-o-shab na to sabr hai na qaraar hai"