zindagi ke udaas lamhe the — Moid Rasheedi

"kis ke hisse mein hairat thi kis ko jashn manaanaa thaa kis ne harf kamaae the aur kis ko chup ho jaanaa thaa ek taraf be-naam thakan aur ek taraf aagaah safar pichhe gahri tanhaai thi aage ek zamaana thaa kuchh be-khvaab nafas aise the jin ke andar thi zanjir kuchh betaab nafas aise the jin ko baahar aanaa thaa saanson ki hiddat mein thi kyon aise lamhon ki takhliq khilnaa thaa ik pal mein jin ko ik pal mein murjhaanaa thaa miTTi ko sonaa kar ke rishton ki aag bujhaani thi khvaabon ko girvi rakh kar miTTi kaa qarz chukaanaa thaa"

"ai meri jaan ye pechidgi nahin maa'lum ye 'ishq-vishq mujhe vaaqa'i nahin maa'lum tire visaal ki raa'naaiyon se Dartaa huun mujhe to hijr ke aadaab bhi nahin maa'lum"

"main ne khoyaa hai tujhe yaa ki tujhe paaya hai tu hi aankhon mein basaa hai ki tiraa saaya hai dil ki dhaDkan mein charaaghaan ki si kaifiyyat hai raushni ban ke koi dil mein utar aayaa hai 'ishq aabaad kiyaa hai to akelaa nahin main ik charaagh-e-shab-e-hijraan miraa ham-saaya hai khvaab kaa jashn manaane mein luTaayaa sab kuchh aur ye kaar-e-junun ruuh kaa sarmaayaa hai"

"ye zindagi jo mujhe ajnabi si lagti hai kisi nigaah ki jaadugari si lagti hai jo dekhtaa huun to raqs-e-sharar hai ye duniyaa jo sochtaa huun to kuchh raushni si lagti hai charaagh-e-raah se puchho ki us ki tanhaai pighalti jaati hai phir bhi nai si lagti hai udaas lamhon mein kis ko pukaarti hai havaa agar koi nahin kis ki kami si lagti hai samaa'aton mein utartaa hai naala-e-dil-gir basaaraton mein kahin tishnagi si lagti hai"

"kuchh nahin hone mein hone ki masarrat kaisi aur hone mein na hone ki aziyyat kaisi main ne har sang ko paasang kiyaa hai din raat sakht-jaani hi bataaegi ki lazzat kaisi apni miTTi ki taraf lauT rahi hai har shai jaada-e-nur pe taaron ki masaafat kaisi aao paamaal zaminon ki taraf kuuch karein shahr-e-gul mein khas-o-khaashaak ki qimat kaisi jo bhi aayaa hai sar-e-khaak vo hogaa tah-e-khaak kaisaa ye naam-o-nasab shaan ye shaukat kaisi"

"kyaa baat hui ki saare manzar Duub gae hairaani mein kyon khauf kaa siina chaak huaa kyon aag lagi hai paani mein ik shahr hamaare dil mein hai ik shahr hamaari aankhon mein ik mahv-e-tamaashaa rahtaa hai ik rahtaa hai naadaani mein jab shaam pighalne lagti hai to aankhein bhiig si jaati hain phir ek charaagh saa jaltaa hai aaseb-zada viraani mein ab puchhti rahti hain aankhein jab Duub gae aansu aansu gar 'ilm na thaa gahraai kaa to kyon utre the paani mein"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"zindagi bojhal hui aazaar se jism jhuktaa jaa rahaa hai baar se doston ne is qadar dhoke diye aur raghbat baDh gai aghyaar se zindagi kaa ik nayaa imkaan huaa ik daricha khul gayaa divaar se ab bayaan kaise karun rudaad-e-gham kaam mushkil hai dil-e-naa-chaar se hijr ki raaton mein bahtaa hi rahaa ek naala chashm-e-dariyaa-baar se misl-e-majnun regzaaron mein rahe sar paTakte ret ki divaar se ham asiraan-e-mohabbat hain yahaan uljhe hain ab gesu-e-khamdaar se 'qalb' teri ghazlein yuun shaadaan karein dard nikle hai tire ashaar se"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"jis din se meraa khvaab suhaanaa badal gayaa us din se zindagi kaa fasaana badal gayaa sunne lagaa huun jab se nasihat baDon ki main jaari thaa jo labon pe taraana badal gayaa pahchaan kaa havaala bhi baaqi nahin rahaa chehre ke saath aaina-khaana badal gayaa uThti nahin hai aankh bhi ab aasmaan ki samt jab se gali kaa chaand puraanaa badal gayaa tahzib jin ke ghar ki 'alaamat thi kal talak afsos aaj un kaa gharaanaa badal gayaa 'azmat kaa taaj sar pe hai 'akhilesh' ke sajaa aisi havaa chali ki zamaana badal gayaa itni sharaafaton mein kami aa gai hai aaj pahle thaa jo libaas puraanaa badal gayaa ahl-e-vafaa ne jis ki thi taarikh ki raqam 'faaruq' 'ishq kaa vo fasaana badal gayaa"

"jab tak mizaaj-e-dost mein kuchh barhami rahi goyaa bujhi bujhi si miri zindagi rahi jis par nigaah-e-lutf-e-karam aap ki rahi hairat se har nigaah use dekhti rahi go main rahaa kashaakash-e-dauraan se ham-kanaar lekin mire labon pe hansi khelti rahi laayaa hai ishq ne mujhe aise maqaam par khud-aagahi rahi na khudaa-aagahi rahi josh-e-junun ne manzil-e-maqsud paa liyaa aql-e-salim dekhti hi dekhti rahi sab kuchh mujhe 'khayaal' ki duniyaa mein mil gayaa lekin tumhaare husn-e-nazar ki kami rahi"

"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"