Ghazal

"badli thi ek dasht mein lekin vo chhaT gai pyaali mire nasib ki aise ulaT gai har fard apne apne qabile se mil gayaa har chiiz apni asl ki jaanib palaT gai qadmon mein mere aa ke gire qudsiyaan-e-'arsh paaon ke saath shaakh-e-surayyaa lipaT gai bikhri to daaeron mein bikharti chali gai simTi to ek nuqte mein duniyaa simaT gai ab khud ko kostaa huun ki rakhtaa kitaab mein rakkhi hui thi jeb mein tasvir phaT gai barson se meri rah mein rukaavaT bani rahi ik din vo mere raaste se aap haT gai"

"angur ke daanon mein na shahtut mein aayaa jo zaaiqa tere lab-e-yaaqut mein aayaa main husn ki vaadi mein phiraa aur tarah se main misr se hotaa huaa bairut mein aayaa tujh hazrat-e-insaan ki takmil ki khaatir main 'aalam-e-laahut se nasut mein aayaa bus itnaa mujhe yaad hai manzar kaa nazaara hairat se koi haalat-e-mabhut mein aayaa ye kis ko tiri maut-bhari aankh ne dekhaa ye kis kaa janaaza mire taabut mein aayaa"

"is haal-e-be-sabaat ki aaindagi rahi agle baras mileinge agar zindagi rahi ik mehmaan qatl huaa un ke shahr mein taa-'umr kuufa vaalon ko sharmindagi rahi aakhir tamaam 'umr zulekhaa ke haath se yusuf tiri qamiz ki baafindagi rahi mere bujhe charaagh ne raushan rakhaa jahaan mere lahu se ‘asr ki taabindagi rahi"

"yahaan talak ki miraa apnaa dil nahin hotaa miri udaasi mein koi mukhil nahin hotaa kisi kisi pe hi khultaa hai bhed miTTi kaa har ek shakhs yahaan paa-ba-gil nahin hotaa tamaam zakhmon pe marham rahaa asar-andaaz bus ek zakhm hai jo mundamil nahin hotaa har aire-ghaire ki hamsaaegi mein rahtaa hai magar vo meri taraf muntaqil nahin hotaa ye duniyaa hoti kisi TheT gaanv ke maanind ye gas-o-bijli vaghaira kaa bill nahin hotaa hamaare dil mein koi aur dil samaae kyaa hamaare pahlu mein apnaa hi dil nahin hotaa"

"is mein 'ajab nahin ki pari jhiil se mile yusuf kunvein se muusaa hamein niil se mile aisaa vo apni zaat mein yaktaa-e-rozgaar tashbih se mile na vo tamsil se mile itni buland apni samaa'at ko rakhtaa huun aavaaz mujh ko sur-e-saraafil se mile pahle vo apni marzi se aate the mere paas aur ab ke mere hukm ki taa'mil se mile rakkhaa huaa hai yaad unhein al-kitaab ne jo abraha ko zakhm abaabil se mile"

"ye jo unchaa bol rahaa hai ye kab apnaa bol rahaa hai tu aane mein der karegaa teraa lahja bol rahaa hai jaane kyaa kyaa bolne vaalaa jaane kyaa kyaa bol rahaa hai koi saraapaa chup hai abhi tak koi saraapaa bol rahaa hai saare shajar khaamosh khaDe hain ek parinda bol rahaa hai"

"manzil nahin baandhi koi jaada nahin baandhaa main ne kahin jaane kaa iraada nahin baandhaa main dast-e-talab rakkhun kisi aur ke aage itnaa bhi zarurat ko kushaada nahin baandhaa khulti hi chali jaati hai har shakhs ki gaThri achchhaa hai ki dil had se ziyaada nahin baandhaa jitnaa ki samajhtaa hai tu aisaa bhi nahin hai baandhaa hai magar itnaa bhi saada nahin baandhaa taa'viz-e-mohabbat hai ise pahn ke rakhnaa gardan mein koi teri qilaada nahin baandhaa main jaantaa huun farq-e-shutur-gurba mire dost asvaar ke hamraah piyaada nahin baandhaa ik baar idhar aa gayaa to aa gayaa 'kaunain' ab vaapsi jaane kaa iraada nahin baandhaa"

"dariyaa bhi kam thaa jis ke muqaabil nahin rahaa qurbaan sab pe hotaa huaa dil nahin rahaa vaise to har jagah pe mayassar rahaa magar ab DhunDne lagaa huun to vo mil nahin rahaa ham ne bhi us ke radd mein kiye kuchh javaab arz vo bhi hamaari baat kaa qaail nahin rahaa us par 'ayaan ye baat bahut der se hui main us ki ik nazar kaa bhi ghaayal nahin rahaa jo baat honi chaahiye thi ho nahin rahi jo phuul khilnaa chaahiye thaa khil nahin rahaa jab se girah mein baandhaa hai mushkil-kushaa madad meraa to koi kaam bhi mushkil nahin rahaa"

"paani pe numudaar kabhi gul mein numaayaan honaa hai agar tujh ko to ho dil mein numaayaan main ne use dekhaa hai kisi aag ki lau mein main ne use dekhaa hai kisi til mein numaayaan ye ab jo tire pahlu mein baiThaa hai koi dost ik roz yahi hogaa muqaabil mein numaayaan vo aur kisi tarz mein mumkin hi nahin thaa jo zakhm huaa tauq-o-salaasil main numaayaan ik ism pe mauquf hain sab kaar-e-'adaalat phir faisla hogaa haq-o-baatil mein numaayaan 'kaunain' 'alaamaat-e-sitam karb-o-balaa mein maqtul se baDh kar huiin qaatil mein numaayaan"