Ghazal

"apne pairon pe kisi taur khaDe hote nahin buDhe ho jaate hain ham log baDe hote nahin sabr-o-khaamoshi ki zanjir jakaD leti hai ab kalaai mein baghaavat ke kaDe hote nahin halqa-e-ishq mein sab chaak-dilaan milte hain is qabile mein koi khaas dhaDe hote nahin aise us shakhs ke lahje se pighal jaate hain jaise ham log kabhi zid pe aDe hote nahin Thokaron baa'd kahin nazron mein aate hain 'aqil' ham anguThi mein nagine to jaDe hote nahin"

"oDh letaa hai koi tirgi shab se pahle runumaa hote hain asaraat sabab se pahle sab se unchaa thaa zamaane mein takhayyul meraa haadse mujh pe giraa karte the sab se pahle ek duuje se numu paati hain chizein aksar pyaas kaa naam kahaan hotaa thaa lab se pahle sher ne husn ki tarvij kaa saamaan kiyaa raaegaan jaati thi har aankh adab se pahle subh kaa bhulaa huaa aa to gayaa hai vaapas masala ye hai ki aayaa nahin shab se pahle vo jo din-raat ki tartib lagaataa hai abhi jaane kyaa kartaa thaa is kaar-e-ajab se pahle naaz-bardaari tiri karte bahut karte magar zindagi ham ko mili hai tu talab se pahle aaj kuchh aur hi maqsad hai charaaghon kaa 'aqil' raushni itni nahin hoti thi ab se pahle"

"rakhe hain chaak-e-zamaan par fanaa baqaa aur main umaD rahe hain tamaashaa-e-naaravaa aur main phir ek roz khalaa bhar gayaa thaa kamre mein ki jazb ho gae divaar mein sadaa aur main charaagh bujhte rahe aur shahr jalte rahe sukut oDh ke baiThe rahe khudaa aur main ye dasht aaj bhi ham se hai be-khabar afsos kahaan ki khaak uDaate rahe havaa aur main badan ki naav thi girdaab-e-lams joban mein ajab khumaar mein Duube the naakhudaa aur main thaa irtiqaa-e-sukhan koi khaamushi kaa amal hue hain vaqf-e-tahayyur miri navaa aur main zaraa si der miraa dhyaan baT gayaa thaa kahin bujhe mile hain kisi aankh mein diyaa aur main kuchh is tarah se huaa kam hamaaraa khaali-pan ki ek dusre mein bhar gae khalaa aur main abhi khayaal hai tajsim ki nazar se pare abhi hain ret mein mastur aaina aur main"

"is liye teri hui dasht-hansaai bhaai tu ne jaldi mein zaraa khaak uDaai bhaai aakhir-e-kaar koi uzr use mil hi gayaa ye mohabbat bhi kisi kaam na aai bhaai main huun kone mein paDaa TuuTaa huaa kangan aur zindagi ek hasina ki kalaai bhaai tab miraa saaraa badan kaan mein tabdil huaa jab kisi ne mujhe aavaaz lagaai bhaai avval avval ye zamin Thahri rahi ek jagah phir kisi aankh ne putli thi ghumaai bhaai"

"khud apni zaat kaa inkaar karne vaalaa hai koi tamaam hadein paar karne vaalaa hai abhi na haath baDhaa pagDiyon ki jaanib tu ki ye tamaasha su-e-daar karne vaalaa hai kabhi kisi ne kiyaa hai na kar sakegaa koi jo mere saath miraa yaar karne vaalaa hai mujhe vo maatami aankhein lagaae jaa rahaa hai vo mere khvaab azaadaar karne vaalaa hai miraa tumhaaraa khudaa ek ho nahin saktaa miraa khudaa to baDaa pyaar karne vaalaa hai abhi to raat hai sab chain se hain soe hue magar jo subh kaa akhbaar karne vaalaa hai"

"main samajhtaa thaa dar-o-baam kahaan bolte hain phir tire baa'd khulaa mujh pe ki haan bolte hain ye jo dabti hai mire shor mein aavaaz miri meri hasti mein kahin kaar-e-ziyaan bolte hain is jahaan ke mutavaazi bhi jahaan hai koi jo yahaan bol nahin paate vahaan bolte hain muttasil us ke labon se hai ye kaar-e-aavaaz vo agar hil na sakein ham bhi kahaan bolte hain ik zamaane ko bayaan karte hain lafzon ke baghair mujh sukhan-saaz se behtar to nishaan bolte hain dekh ik duuje se Takraane lagin aavaazein itnaa be-Dhang tire log yahaan bolte hain ik khalaa hai jo sadaaon ko nigal jaataa hai koi sun hi nahin paataa jo makaan bolte hain aag roti hai to ham ko bhi rulaa deti hai ye to aansu hain jinhein log dhuaan bolte hain ashk dar ashk salaasat hai bahaao mein 'aqil' miri aankhon ko tabhi chashm-e-ravaan bolte hain"

"kari nigaah-o-samaaat ne bartari taslim labon ke saath tiri baat bhi hui taslim ham aise log pas-e-jism saans lete hain hamaari maut bhi hoti hai zindagi taslim charaagh DhunD ke laae koi to kah denaa hamaari aankh andhere ko kar chuki taslim tum ek bahr mein joDo duaa ke saare huruf ki aasmaan pe hoti hai shaairi taslim ataa ki qadr baDhaati hai aur mahrumi so ek andhaa bhi kartaa hai raushni taslim dayaar-e-sher mein parda bahut zaruri hai kahaa sunaa hai sabhi rad hai an-kahi taslim charaagh huun so miraa kaam sirf jalnaa hai koi kare na kare meri raushni taslim abhi bhi koi khalaa hai 'aqil' duniyaa mein abhi bhi lagtaa hai duniyaa nahin hui taslim"

"ek duuje ke qarin baiTh ke ro lete hain jahaan kahtaa hai vahin baiTh ke ro lete hain main bahut jald zamaane se bichhaD jaaungaa aaiye mujh ko kahin baiTh ke ro lete hain aaj kaa ronaa kabhi kal pe nahin Taalaa hai jahaan kaa gham ho vahin baiTh ke ro lete hain mujh ko maalum hai vo itnaa na ro paaegaa is liye yaar hamin baiTh ke ro lete hain vahaan mayyat ki samaaat pe garaan guzregaa main to kahtaa huun yahin baiTh ke ro lete hain ek ham hain jinhein fursat hi nahin milti 'aqil' varna to log kahin baiTh ke ro lete hain"

"sogvaaron mein azaadaar nahin koi bhi yaani sach hai ki miraa yaar nahin koi bhi khud ko ik umr binaa dekhe pareshaan rakhaa ab jo dekhaa pas-e-divaar nahin koi bhi qahqaha-vaar rulaane ki riyaazat hai tiri zindagi tujh saa jafaakaar nahin koi bhi main to yuun mast huaa log tujhe ye na kahein ki tire ishq mein sarshaar nahin koi bhi aankh likhti hai shab-e-hijr kaa ahvaal 'aqil' yuun nahin ishq kaa akhbaar nahin koi bhi"