Ghazal

"apne dil mein aag lagaani paDti hai aise bhi ab raat bitaani paDti hai us ki baatein sun kar aise uThtaa huun jaise apni laash uThaani paDti hai vo khvaabon mein haath chhuDaa kar jaae to nindon mein aavaaz lagaani paDti hai kyaa khushbu se main us ki bach paaungaa raste mein jo raat ki raani paDti hai ab jaa kar ke baat samajh mein aai hai lekin ab kamzor javaani paDti hai"

"miri ghazal gungunaa rahaa thaa vahi jo mujh se khafaa rahaa thaa mere khayaalon mein gum thaa shaayad vo apnaa kangan ghumaa rahaa thaa main baadalon ko milaa milaa kar usi kaa chehra banaa rahaa thaa binaa tumhaare na ji sakeinge vo niind mein budbudaa rahaa thaa jo us ki aankhon se pi li ik din kai dinon tak nasha rahaa thaa"

"dimaagh-o-dil mein halchal ho rahi hai nadi yaadon ki be-kal ho rahi hai tu apne face ko Dhank kar nikalnaa nagar mein dhuup paagal ho rahi hai tumhaari yaad kaa Daaka paDaa hai hamaari ziist chanmbal ho rahi hai abhi to shauq se phaaDaa hai daaman abhi to bas rehearsal ho rahi hai tiri aankhon pe chashma gair kaa hai miri tasvir ojhal ho rahi hai"

"duniyaa ko haadson mein giraftaar dekhnaa jab dekhnaa ho doston akhbaar dekhnaa phir us ke baad shauq se baiat karo magar pahle amir-e-shahr kaa kirdaar dekhnaa us ki taraf hai amn kaa parcham lagaa huaa lekin miraa vo khvaab mein talvaar dekhnaa nisbat hai ham ko tiin sau terah se aaj mumkin nahin ke ham ko paDe haar dekhnaa vo shakhs kyaa gayaa miri binaai le gayaa main jis ko chaahtaa thaa lagaataar dekhnaa 'ashfaaq' tum ko yaad hai maghrib ke baad mein jaanaa chhaton pe chaand se rukhsaar dekhnaa"

"zamin par nim-jaan yaari paDi hai idhar khanjar udhar aari paDi hai mere hi sar pe hain ilzaam saare baDi mahngi vafaa-daari paDi hai 'ajab saa khauf phailaa hai vatan mein havaa ke haath chingaari paDi hai bichhaD kar ho gayaa barbaad vo bhi hamein bhi choT ye kaari paDi hai samundar se koi rishta hai is kaa nadi kis vaaste khaari paDi hai"

"hairat hai vo khuun ki baatein karte hain jo aksar qaanun ki baatein karte hain jin ki jebein aksar khaali rahti hain jaane kyuun qaarun ki baatein karte hain apni galiyon kaa bhi jin ko ilm nahin dekho vo rangun ki baatein karte hain kab se mausam sard paDaa hai milne kaa aur vo hain ki june ki baatein karte hain dil ki duniyaa big-baazaar mein rahti hai vo mujh se parchun ki baatein karte hain"

"apni ghazlon ko risaalon se alag rakhtaa huun yaani ye phuul kitaabon se alag rakhtaa huun haan buzurgon se aqidat to mujhe hai lekin mushkilein apni mazaaron se alag rakhtaa huun manzilein aa ke mere paanv mein gir jaati hain hausla jab main thakaanon se alag rakhtaa huun un ki aamad kaa pata deti hai khushbu un ki us ghaDi khud ko jahaanon se alag rakhtaa huun hosh vaale mujhe apnon mein ginaa karte hain main kahaan khud ko divaanon se alag rakhtaa huun mujh ko achchhaa nahin lagtaa ye umidein TuTein is liye tiir kamaanon se alag rakhtaa huun"

"tiri nazar ke ishaare badal bhi sakte hain mere nasib ke taare badal bhi sakte hain main apni naav bhanvar se nikaal laaya huun magar ye Dar hai kinaare badal bhi sakte hain amir-e-shahr ki taqrir hone vaali hai sahar talak ye nazaare badal bhi sakte hain ye daur vo hai ki ghairon kaa kyaa kahein saahab hamaare haq mein hamaare badal bhi sakte hain"