Ghazal

"na hotaa dahr se jo be-niyaaz kyaa kartaa khulaa thaa mujh pe kuchh aisaa hi raaz kyaa kartaa mariz kashmakash-e-jabr-o-ikhtiyaar mein thaa ilaaj-e-jazb-o-kashish chaara-saaz kyaa kartaa tire karam ne to duniyaa hi saunp di thi mujhe bachaa ke kuchh na rakhaa hirs-o-aaz kyaa kartaa bigaD gayaa miraa huliya to barhami kaisi the rahguzar mein nasheb-o-faraaz kyaa kartaa mujhe khabar thi ki main bhi tire sabab se huun phir apni zaat pe main fakhr-o-naaz kyaa kartaa tamaam umr rahe pahre-daar kaandhon par tire khilaaf ai 'anjum'-navaaz kyaa kartaa"

"main chup huun aur duniyaa sun rahi hai khamoshi daastaanein bun rahi hai taajjub hai ki ik sone ki chiDiyaa bayaabaanon mein tinke chun rahi hai kahaan neki gunaahon se hi bach lein hamein to bas yahi ik dhun rahi hai tujhe mahsus karte bhi to kaise chhaTi his bhi hamaari sun rahi hai main us basti kaa baashinda thaa yaarab jahaan sachchaai bhi avgun rahi hai yahaan gardish mein hain din raat 'anjum' vahaan bas ik sadaa-e-kun rahi hai"

"zard patton pe miraa naam likhaa hai us ne sabz khvaabon kaa ye anjaam likhaa hai us ne koi miltaa nahin jo paDh ke sunaa de mujh ko barg-e-gul par koi paighaam likhaa hai us ne sach hai tanhaai mein insaan sanak jaataa hai roz-e-raushan ko siyah-faam likhaa hai us ne mehr-o-mah diip huaa abr samundar khushbu kis ki taqdir mein aaraam likhaa hai us ne sar uchhalte hain zabaan kaTti hai jis mein 'anjum' mere zimme vahi ik kaam likhaa hai us ne"

"kyaa khabar thi ye din bhi dekheinge khuun boeinge sabr kaaTeinge kis ko munsif kahein kise qaatil bach rahe kal talak to socheinge main agar yuun hi sar uThaataa rahaa log apne hi but ko pujeinge aap apnaa bhi jaaeza le lein ham to apni sazaa ko pahuncheinge qaum mazhab zamin rang zabaan yunhi kab tak lakirein khincheinge kyaa tumhein bhi gumaan thaa 'anjum' ham khud apne badan ko nocheinge"

"main sochtaa to huun lekin ye baat kis se kahun vo aaine mein jo utre to main sanvar jaaun khud apne aap se vahshat si ho rahi hai mujhe bichhaD ke tujh se main ik mustaqil azaab mein huun har ek lamha bhanvar hai har ek pal tufaan kahaan tak aur main saahil ki justuju mein baDhun mire vajud ne kyaa kyaa libaas badle hain kahin charaagh kahin raaste kaa patthar huun havaa ke dosh pe huun misl-e-barg-e-aavaara ab aur kyaa kahun 'anjum' mein apnaa haal-e-zabun"

"zard mausam ke ik shajar jaisi saari basti hai mere ghar jaisi jab bigaDtaa hai vaqt insaan kaa chhipkali lagti hai magar jaisi saans jaise safar mein hai raahi apni kaayaa hai rahguzar jaisi chhuT jaataa hai rang chhune se khvaahishein titliyon ke par jaisi aur kyaa ham gharib rakhte hain ek daulat hai bas hunar jaisi zindagi aaj ke zamaane mein bahr-e-zulmaat ke safar jaisi hai zamir aur jism mein 'anjum' kashmakash kashti aur bhanvar jaisi"

"de ke chubhte hue savaal havaa le gai mere tiis saal havaa paanv dharti se uTh rahe hain mire ho sake to mujhe sambhaal havaa aur phunkegaa bastiyaan kitni aag se teraa ittisaal havaa tu ki jalte diye bujhaati hai mere zakhmon kaa indimaal havaa vo to kahiye ki teraa jism nahin tu bhi ho jaati paaemaal havaa lauh-e-marqad pe aab-e-zar se likho ho gai hai yahaan niDhaal havaa har qadam dekh-bhaal kar 'anjum' bun rahi hai anokhe jaal havaa"

"tesha-ba-dast aa mire aazar taraash de be-Dol hai bahut miraa paikar taraash de gar qumriyon ke naghme giraan-baar hain tujhe is rut mein saare sarv sanobar taraash de yuun uD gai hai bu-e-vafaa us ki zaat se jis tarah koi shaakh-e-gul-e-tar taraash de uDnaa agar hai baad-e-mukhaalif kaa dhyaan rakh aisaa na ho ki tez havaa par taraash de kyaa mom ke badan ki haqiqat tire liye tu chaahe to nigaahon se patthar taraash de"

"shahr meraa hujra-e-aafaat hai sar pe suraj aur ghar mein raat hai surkh the chehre badan shaadaab the ye abhi do-chaar din ki baat hai phuTne hi vaalaa hai chashma yahaan saari duniyaa arsa-e-arfaat hai vo to hai bechain milne ke liye darmiyaan khud meri apni zaat hai main huun 'anjum' aafiyaat-e-nim-shab mujh se bargashta andheri raat hai"

"uThaao sang ki ham mein sanak bahut hai abhi hamaare garm lahu mein namak bahut hai abhi utar rahi hai agar chaandni utarne de mahakti zulf mein teri chamak bahut hai abhi ye kal kisi nae mausam ki fasl kaaTeinge saron mein ahl-e-junun ke Thanak bahut hai abhi use khabar nahin suraj bhi Duub jaataa hai hasin libaas pe naazaan dhanak bahut hai abhi hamaare pahle hi mausam ne ham ko toD diyaa magar tumhaare badan mein lachak bahut hai abhi havaa-e-vaqt ne jhonki hai dhuul aankhon mein hamaari aankh mein lekin chamak bahut hai abhi dil apnaa un ki hatheli pe rakh bhi de 'anjum' tire khulus pe yaaron ko shak bahut hai abhi"

"khushk miTTi mein lahu ki jo nami aaegi dekhnaa baagh mein phir sabz pari aaegi kaT gai umr isi dhun mein safar karte hue do qadam aur abhi chhaanv ghani aaegi sachche alfaaz baratne lage ashaar mein ham apne hisse mein bhi hiire ki kani aaegi dam-ba-dam khuun ki ravaani mein bhanvar paDte hain aisaa lagtaa hai koi sakht ghaDi aaegi dekh kar sakhti-e-haalaat gumaan hai 'anjum' apne baad aaegi jo nasl jari aaegi"

"ab zard libaade bhi nahin khushk shajar par jis samt nazar uThti hai be-rang hai manzar utre hain miri aankhon mein javon ke sahife khvaabon kaa farishta huun main ghazlon kaa payambar biite hue lamhon se mulaaqaat agar ho le aanaa havaao zaraa ik baar mire ghar itraao na masti mein javaan-saal parindo purvaai ke jhonkon se bhi kaT jaate hain shahpar aa jaate hain jab bhi tiri khushbu ke bulaave pechida savaalaat kiyaa kartaa hai bistar"

"hairaan huun nasib ki bakhshish ko dekh kar saae se apne dhuup mein mahrum hain shajar qabze mein apne hoti fazaaon ki mamlikat uDte agar havaaon ki raftaar dekh kar un se mile to khud se bhi pahchaan ho gai varna ham apni zaat se ab tak the be-khabar har TukDe mein bas ek hi tasvir paaoge dekho to apni zaat kaa aaina toD kar nashtar se log karte hain zakhm-e-jigar rafu ye rasm to kahaan se chali mere chaaraagar 'anjum' zamin se jin ki jaDein rishta toD lein dekhaa hai sab ne suukh ke girte hain vo shajar"