Ghazal

"husn khud mein na huaa jalva-numaa mere baad raas kyaa aati zamaane ki havaa mere baad myaan se nikli na shamshir-e-jafaa mere baad raqs-e-bismil kaa tamaasha na huaa mere baad paas-e-dastur na saaqi ko rahaa mere baad dar-e-mai-khaana khulaa chhoD diyaa mere baad ik mire uThne se dil baiTh gayaa rindon kaa jaam uThe aur na shisha hi jhukaa mere baad har qadam duri-e-manzil ki taraf le ke gayaa raasta bhuul gae raah-numaa mere baad baar-e-ehsaan se dab jaae na turbat 'aazaad' chaadar-e-gul se na marqad ko sajaa mere baad"

"khun-chakaan qalb-o-jigar chaak-garebaan niklaa jo tiri bazm se niklaa so pareshaan niklaa teri ik ek nazar ne kiyaa sab ko ghaayal jis ko dekhaa vahi minnat-kash-e-paikaan niklaa ghunche bedaar hue jaag uThe laala-o-gul bahr-e-gul-gasht jo vo rashk-e-gulistaan niklaa jis ki guftaar se thaa sab ko farishte kaa gumaan apne kirdaar mein vo saani-e-shaitaan niklaa ham shab-e-taar mein bhi tere makaan tak pahunche apnaa har daagh-e-jigar sham-e-farozaan niklaa shukr hai ashk-e-nadaamat mire kaam aa hi gae marhala hashr kaa mere liye aasaan niklaa baDh ke daaman ko mire khaar-e-mughilaan ne liyaa main jo 'aazaad' kabhi su-e-bayaabaan niklaa"

"subu hai aur shisha hai na koi jaam hai saaqi zabaan par rind-mashrab ki khudaa kaa naam hai saaqi shikaayat gardish-e-dauraan ki karte bhi to kyaa karte ajal hi jab ilaaj-e-gardish-e-ayyaam hai saaqi kahaan vo fikr-o-fan kaa mai-kada aabaad thaa jin se na 'ghaalib' hai na 'saudaa' hai na vo 'khayyaam' hai saaqi kashaakash se gham-o-aalaam ki ab mil gai fursat tiri zulfon ke saae mein baDaa aaraam hai saaqi qafas mein hausla parvaaz kaa dam toD detaa hai na khatra baad-o-baaraan kaa na khauf-e-daam hai saaqi gham-o-andoh ki shiddat mein poshida masarrat hai masarrat ek aks-e-shiddat-e-aalaam hai saaqi main vo aazaad huun jo baada-e-irfaan kaa tishna hai pilaa de ok se meraa piyaala khaam hai saaqi"

"kisi ki be-rukhi hai aur main huun maaal-e-aashiqi hai aur main huun falak ne phir nae fitne jagaae kamaal-e-dushmani hai aur main huun jigar ke daagh hain sham-e-farozaan har ik su raushni hai aur main huun khushi kaa baab mujh ko DhunDhtaa hai kitaab-e-zindagi hai aur main huun mataa-e-dil luTaae jaa rahaa huun miri dariyaa-dili hai aur main huun thaa kal tak raunaq-e-bazm-e-hasinaan magar ab bebasi hai aur main huun saje 'aazaad' kaise bazm-e-hasti yahi gar zindagi hai aur main huun"

"bad-mast nigaahon ke mastaane hazaaron hain haathon mein liye dil ke nazraane hazaaron hain us aariz-e-taabaan ke divaane hazaaron hain ek shama farozaan hai parvaane hazaaron hain kuche se guzar un ke ik roz huaa hogaa us roz se vaabasta afsaane hazaaron hain jaane hue gar apne anjaane hain gham kaisaa jab shahr-e-gulistaan mein anjaane hazaaron hain ye zikr-e-mai-e-athar kyaa pyaas bujhaaegaa piini hai agar vaaiz maikhaane hazaaron hain us but ke taghaaful kaa kyaa khaak asar lete aazar kaa zamaana hai but-khaane hazaaron hain ham ok se pi leinge paimaana haTaa lenaa 'aazaad' yahaan jhuTe paimaane hazaaron hain"

"na hote rind gar saaqi to maikhaane kahaan jaate suraahi kis ke ghar jaati ye paimaane kahaan jaate pata manzil kaa miltaa hai to divaanon se miltaa hai na hote gar ye divaane to farzaane kahaan jaate tumhaare aariz-e-taabaan harif-e-shama-e-mahfil hain na aate khich ke parvaane khudaa jaane kahaan jaate mire mamnun hain dasht-o-bayaabaan ek muddat se chaman mein gar bahal jaataa to viraane kahaan jaate tumhaari zulf ke kham halqa-e-zanjir-e-zindaan hain na aate daam-e-gesu mein to divaane kahaan jaate pata dil kaa hamaare aap ko maalum thaa varna nazar ke tiir le kar shauq farmaane kahaan jaate buDhaape mein javaani kaa zamaana yaad aataa hai magar 'aazaad' vo lamhaat phir laane kahaan jaate"

"dosti kyaa hai dushmani kyaa hai jo na samjhe vo aadmi kyaa hai aap puchhein to koi baat bane varna vaqat hi baat ki kyaa hai muskuraa kar gulon ne dekh liyaa do ghaDi ki shaguftagi kyaa hai ek muddat se gham-shanaasaa huun main nahin jaantaa khushi kyaa hai saae jalve hain husn-e-jaanaan ke chaand taare ye raushni kyaa hai jurm-e-naa-karda ki sazaa ke liye doston ki yahaan kami kyaa hai sehr-kaari hai lafz-o-maani ki varna 'aazaad' shaaeri kyaa hai"

"ye haqiqat majaaz hai phir bhi jaane kyon dil-gudaaz hai phir bhi vaqt ke haath maat khaai hai aql par apni naaz hai phir bhi raat din jhuuT luuT makr-o-fareb panj-vaqta namaaz hai phir bhi chheD kartaa hai mah-jabinon se aadmi paak-baaz hai phir bhi ham faqat do qadam samajhte hain garche manzil daraaz hai phir bhi go nahin koi maail-e-tauba dar-e-tauba to baaz hai phir bhi kaam 'aazaad' kyon nahin bante vo baDaa kaar-saaz hai phir bhi"