Ghazal

"udaas baam hai dar kaaTne ko aataa hai tire baghair ye ghar kaaTne ko aataa hai khayaal-e-mausam-e-gul bhi nahin sitamgar ko bahaar mein bhi shajar kaaTne ko aataa hai faqih-e-shahr se insaaf kaun maangegaa faqih-e-shahr to sar kaaTne ko aataa hai isi liye to kisaanon ne khet chhoD diye ki koi aur samar kaaTne ko aataa hai tire khayaal kaa aahu kahin bhi din mein rahe magar vo raat idhar kaaTne ko aataa hai kahaa to thaa ki hamein is qadar bhi Dhiil na de ab uD rahe hain to par kaaTne ko aataa hai ye kaam karte the pahle sagaan-e-aavaara bashar ko aaj bashar kaaTne kaa aataa hai ye us ki raah nahin hai magar yunhi 'baaqi' vo mere saath safar kaaTne ko aataa hai"

"dasht-o-dariyaa ke ye us paar kahaan tak jaati ghar ki divaar thi divaar kahaan tak jaati miT gai hasrat-e-didaar bhi rafta rafta hijr mein hasrat-e-didaar kahaan tak jaati thak gae honT tiraa naam bhi lete lete ek hi lafz ki takraar kahaan tak jaati laaj rakhnaa thi masihaai ki ham ko varna dekhte lazzat-e-aazaar kahaan tak jaati raahbar us ko saraabon mein liye phirte the khilqat-e-shahr thi bimaar kahaan tak jaati har taraf husn ke baazaar lage the 'baaqi' har taraf chashm-e-kharidaar kahaan tak jaati"

"yuun sitamgar nahin hote jaanaan phuul patthar nahin hote jaanaan kyuun mire dil se kahin jaate ho ghar se be-ghar nahin hote jaanaan vasl ki shab jo karam tum ne kiye kyuun mukarrar nahin hote jaanaan ham tumhein but ki tarah pujte hain phir bhi kaafar nahin hote jaanaan gham ke dipak nahin jalte jab tak dil munavvar nahin hote jaanaan ham to rahte hain tumhaari had mein had se baahar nahin hote jaanaan ek jaise hain khushi ke lamhe dukh baraabar nahin hote jaanaan is qadar khuun na bahaanaa dil kaa dil samundar nahin hote jaanaan"

"saamne sab ke na boleinge hamaaraa kyaa hai chhup ke tanhaai mein ro leinge hamaaraa kyaa hai gulshan-e-ishq mein har phuul tumhaaraa hi sahi ham koi khaar chubho leinge hamaaraa kyaa hai umr-bhar kaun rahe abr-e-karam kaa muhtaaj daagh-e-dil ashkon se dho leinge hamaaraa kyaa hai haath aayaa na agar dast-e-hinaai teraa ungliyaan khuun mein Dubo leinge hamaaraa kyaa hai tum ne mahlon ke alaava nahin dekhaa kuchh bhi ham to fōtpath pe so leinge hamaaraa kyaa hai apni manzil to saraabon kaa safar hai 'baaqi' ham kisi raah pe ho leinge hamaaraa kyaa hai"

"mujh se bichhaD ke vo bhi pareshaan thaa bahut jis ki nazar mein kaam ye aasaan thaa bahut sochaa to be-khulus thiin sab us ki qurbatein jis ke baghair ghar miraa viraan thaa bahut be-khvaab surkh aankhon ne sab kuchh bataa diyaa kal raat dil mein dard kaa tufaan thaa bahut ye kyaa kiyaa ki pyaar kaa izhaar kar diyaa main apni is shikast pe hairaan thaa bahut vahshat mein kyuun kisi ke garebaan ko dekhtaa mere liye to apnaa garebaan thaa bahut ab to koi tamannaa hi 'baaqi' nahin rahi ye shahr-e-aarzu kabhi gunjaan thaa bahut"

"bahut jaldi thi ghar jaane ki lekin mujhe phir shaam raste mein paDi hai nisaab-e-zindagi jis mein likhaa hai kitaab-e-dil vo baste mein paDi hai nahin arzaan mataa-e-raaegaani magar mujh ko ye saste mein paDi hai vo aise DhunDne nikle hain 'baaqi' mohabbat jaise raste mein paDi hai"

"roz-e-vahshat hai mire shahr mein viraani ki ab koi baat nahin baat pareshaani ki mere dariyaa kabhi dariyaa bhi huaa karte the ab bhi aavaaz si aati hai mujhe paani ki aaina-khaane ke baahar vo mujhe puchhte hain aaina-khaane mein kyaa baat thi hairaani ki ab ghazaalaan se kaho chhup ke kahin baiTh rahein aamad aamad hai kisi ghul-e-bayaabaani ki ham khule ghar ke makinon ki yahi aadat hai ham na darbaan hue aur na darbaani ki yaad kar lenaa bahattar ki kahaani 'baaqi' jang chhiD jaae kisi vaqt agar paani ki"

"teri tarah malaal mujhe bhi nahin rahaa jaa ab tiraa khayaal mujhe bhi nahin rahaa tu ne bhi mausamon ki paziraai chhoD di ab shauq-e-maah-o-saal mujhe bhi nahin rahaa meraa javaab kyaa thaa tujhe bhi khabar nahin yaad ab tiraa savaal mujhe bhi nahin rahaa jis baat kaa khayaal na tu ne kabhi kiyaa is baat kaa khayaal mujhe bhi nahin rahaa toDaa hai tu ne jab se mire dil kaa aaina andaaza-e-jamaal mujhe bhi nahin rahaa 'baaqi' mein apne fan se baDaa pur-khulus huun is vaaste zavaal mujhe bhi nahin rahaa"

"tu nahin to teraa dard-e-jaan-fazaa mil jaaegaa zinda rahne kaa koi to aasraa mil jaaegaa ai miri chashm-e-pashemaan apne aansu rok le raat ki tanhaai mein rone se kyaa mil jaaegaa zindagi ke kaarvaan par kuchh asar paDtaa nahin ik musaafir kho gayaa to dusraa mil jaaegaa saari basti mein faqat meraa hi ghar hai be-charaagh tirgi se aap ko meraa pataa mil jaaegaa sochte rahne se to manzil kabhi milti nahin chalte jaao raaste se raasta mil jaaegaa koi to meraa bhi hogaa muntazir 'baaqi' yahaan ik na ik to dil kaa darvaaza khulaa mil jaaegaa"