Ghazal

"mere hone na hone mein na thaa kuchh bhi magar phir bhi na jaane kyon huaa takhliq be-qimat bashar phir bhi havaa ki pusht pe taaron bhari vusat mein ho aaya magar ik qalb ki gahraaiyon se be-khabar phir bhi dhamaakon ki sadaa se gunjti hai ye zamin har pal qalam ki nim-bismil aah-e-shab hai be-asar phir bhi agarche khaak mustaqbil kaa har imkaan rakhti hai charaaghon ke muqaddar mein nahin hoti sahar phir bhi hamaari dosti kaa baj rahaa hai shahr mein Dankaa miraa dil aabla phir bhi tiri zid neshtar phir bhi"

"dil-shikan andaaz dilbar dil-navaazi kyaa kare but-taraashi kaa hunar aaina-saazi kyaa kare dard-e-dil ke vaaste paidaa kiyaa insaan ko dard-mandi se bashar phir be-niyaazi kyaa kare khubi-e-jauhar se paati hai har ik shai imtiyaaz koh ke be-faiz patthar ki faraazi kyaa kare dil mein zauq-e-vasl-o-yaad-e-yaar tak baaqi nahin shisha-e-hasrat mein koi rukh-taraazi kyaa kare"

"sitaaron kaa dilkash samaan chhu liyaa thaa zamin chhoD kar aasmaan chhu liyaa thaa nishaan bhi nahin shisha-e-muntashir par use tum ne jaane kahaan chhu liyaa thaa miri aarzuein javaan ho gaiin thi mohabbat kaa jab aastaan chhu liyaa thaa jahaan zindagi thi tire aasare par vahin marhale kaa nishaan chhu liyaa thaa tiri naa-khudaai mujhe raas aai samundar ne to baadbaan chhu liyaa thaa 'fidaa' aandhiyaan kyon na le jaaein hasrat pari-ru ne meraa makaan chhu liyaa thaa"

"hamaare haath se qudrat ne kyaa jauhar dikhaae hain jo nuqte khud nahin samjhe vo auron ko sikhaae hain ujaale ki sahar laanaa nahin sab ke muqaddar mein falak pe raat ne yuun to kai suraj ugaae hain haqiqat ke samundar mein dhule sab rang hasti ke sahar ki raushni ne niind se sapne bhagaae hain taqaddus un ke chehron kaa bayaan kartaa hai aaina yahaan kirdaar jo ashk-e-nadaamat se nahaae hain baDi mushkil se aaya qalb ke jazbaat par qaabu ye bachche raat ke pichhle pahar ham ne sulaae hain 'fidaa' kaise bayaan kar luun main apne shahr kaa qissa yahaan ahl-e-vafaa ne kis tarah aansu chhupaae hain"

"vatan ki hai agar pahchaan sarhad laDaai be-vajh imkaan sarhad chhupaae jang kaa saamaan sarhad hai laashon kaa bhi qabristaan sarhad agar do bhaaiyon ke biich ubhre banaae hind-o-paakistaan sarhad lagaa donon taraf donon taraf ko ajab khatre pe hai hairaan sarhad baTe hain baaDh se jazbaat varna mohabbat se nahin anjaan sarhad 'fidaa' insaan ko de kar tahaffuz kare insaan ko qurbaan sarhad"

"hai dam apnaa apnaa adam apnaa apnaa yahaan har kisi ko hai hai gham apnaa apnaa nahin koi taqlid ab khud-sari hai sabhi kaa hai naqsh-e-qadam apnaa apnaa kahaan koi banda kahaan bandagi hai magar chaahte hain haram apnaa apnaa har ik shakhs kaa ik alag falsafa hai sanam diin dozakh iram apnaa apnaa tiri bazm ki hai ye raahat ghaDi bhar chaleinge sabhi le ke gham apnaa apnaa 'fidaa' kis musannif ki tasnif kyaa hai samajh apni apni qalam apnaa apnaa"

"kahaaniyon ki kitaab mein gum hui hai sachchaai khvaab mein gum tufuliyat kaa pasand chehra javaan huaa aur naqaab mein gum gulaab kaaghaz mein gum hain aise hasin manzar saraab mein gum chhalak paDi jab nigaah-e-saaqi hue hain saaghar sharaab mein gum habaab ko gum kare samundar abhi hai saagar habaab mein gum hain zaaiqe ke hazaar pahlu bas ek miThe savaab mein gum"