Ghazal

"tumhaari yaad mein kuchh is tarah thiin nam aankhein tamaam shab nahin kar paae band ham aankhein hai intizaar kisi kaa is ehtimaam ke saath bichhaa ke rakkhi hain ham ne qadam qadam aankhein hasin hai yuun to bilaa-shubh aap kaa paikar hasin-tar hai magar aap ki sanam aankhein dukhaao dil ko magar ye bhi rakho pesh-e-nazar sukun tumhaaraa uDaa deingi meri nam aankhein kashish ho itni ki ji chaahe Duub jaane ko dikhaai deti hain duniyaa mein aisi kam aankhein tumhaari yaad se aakhir shikast khaa hi gaiin chhalak ke toD gaiin zabt kaa bharam aankhein ajiib baat hai rahti hain din mein khushk magar chhalakne lagti hain raaton mein dam-ba-dam aankhein gai hai jab se tire saath raushni in ki baraae naam hain chehre pe ai sanam aankhein udaas udaas saa lagtaa hai ek ik manzar 'shakil' jab se huiin aashnaa-e-gham aankhein"

"jab se hue jazbaat ki farhang se vaaqif ham log hain har chehre ke har rang se vaaqif kyaa un se laDaai mein maza aaegaa ham ko maidaan mein aae hain nahin jang se vaaqif phir bahs na ki ham ne kabhi bhuul ke un se jab ho gae zehnon pe lage zang se vaaqif honTon pe hansi dekh ke jo khaa gae dhokaa vo log nahin dard ke is rang se vaaqif siine se pahaaDon ke nikal sakti hain nahrein ho jaae gar insaan rag-e-sang se vaaqif rahti hai 'shakil' us ke hi qaabu mein ye duniyaa hotaa hai jo duniyaa ke har ik Dhang se vaaqif"

"apni 'azmat ko vo miTTi mein milaa dete hain kar ke ehsaan jo ehsaan jataa dete hain dil mein yaadon ke charaaghon ko farozaan kar ke ham shab-e-gham ke andheron ko sazaa dete hain jaante hain rag-e-har-gul mein lahu hai meraa phir bhi saavan mein mujhe log bhulaa dete hain kyaa yaqin aae ki shak bhi nahin hotaa un par is saliqe se kai log daghaa dete hain ham to hans hans ke chhupaate hain har ik gham ko 'shakil' baaz gham hain jo hansi mein bhi rulaa dete hain"

"chehre se miraa dard koi bhaanp rahaa hai khul jaae kahin raaz na dil kaanp rahaa hai ehsaas judaai kaa yuun Dastaa rahaa shab bhar jaise mire siine mein koi saanp rahaa hai jab qatl ki saazish mein mulavvis vo nahin thaa phir aankh milaate hue kyon kaanp rahaa hai kyaa us se rakhun raahnumaai ki tavaqqo kuchh duur hi chal kar jo bahut haanp rahaa hai kis tarah 'shakil' aap ko vo qatl karegaa talvaar uThaate hue jo kaanp rahaa hai"

"khushk zamin huun barkhaa ho tum main pyaasaa huun dariyaa ho tum bhar do mere khaali-pan ko main saaghar huun miinaa ho tum saari duniyaa se kah dungaa meri saari duniyaa ho tum sun kar jis ko vajd ho taari bas aisaa hi naghma ho tum mil kar tum se yuun lagtaa hai dhuup mein jaise saayaa ho tum kahnaa paDaa ye dekh ke tum ko qudrat kaa shah-paara ho tum tum ko 'shakil' ab aur kahe kyaa bas ik chaand kaa TukDaa ho tum"

"tark kar diyaa ham ne husn par ghazal likhnaa vaqt kaa taqaaza hai masalon ke hal likhnaa hai badan to insaan kaa lazzaton kaa ik daldal lazzaton ke daldal mein ruuh ko kanval likhnaa zindagi ke safhon par khuun aur pasine se aaj bas amal likhnaa phir hasin kal likhnaa unche unche ohde hain haath kaT bhi sakte hain be-zamir logon par soch kar ghazal likhnaa haadson mein bach jaanaa moajiza lage jab bhi saans ki rifaaqat ko nekiyon kaa phal likhnaa khud-navisht jab apni tum 'shakil' likhoge zindagi ke maathe kaa ek ek bal likhnaa"

"tum meraa intikhaab tumhaaraa main intikhaab tum bhi ho laa-javaab to main bhi huun laa-javaab fursat us aadmi ko kahaan hai gunaah ki roTi jis aadmi ko ho mushkil se dastiyaab yuun dil mein tere dard ko ham ne sajaa rakhaa mehraab mein ho jaise muqaddas koi kitaab ab kyaa kisi se koi vafaa ki rakhe umiid har koi kar rahaa hai vafaaon se ijtinaab kin kin kharaabiyon kaa karun zikr main 'shakil' al-qissa-mukhtasar ki zamaana hi hai kharaab"

"dosti mein dil jo TuuTaa dushmani achchhi lagi raushni mein luT gae to tirgi achchhi lagi dekh kar unche makaanon mein amiron ke chalan ham ko apni jhonpDi mein muflisi achchhi lagi zindagi se koi dilchaspi na thi ham ko magar haadse mein bach gae to zindagi achchhi lagi khair se us ki javaan beTi jo rukhsat ho gai aaj barson baad us ko niind bhi achchhi lagi thaa hamaare saath manzil kaa tasavvur ai 'shakil' dopahar ki chilchilaati dhuup bhi achchhi lagi"