Ghazal

"khirad ke maktab mein zindagi ke shuur ki aagahi nahin hai charaagh taaqon pe jal rahe hain magar kahin raushni nahin hai tumhaaraa maslak hai but-parasti ham apne haathon ko pujte hain khudaa banaate hain pattharon ko ye fann-e-dast-e-khudi nahin hai tumhaare ahd-e-shabaab ko ham khamosh nazron se dekhte hain ise bhi tum ehtijaaj samjho ye khaamushi khaamushi nahin hai main ranj-o-gham mein bhi muskuraa kar fareb detaa huun zindagi ko jo mere honTon pe murtaish hai vo mauj-e-gham hai hansi nahin hai ye bikhre bikhre se khushk patte alaamatein hain tabaahiyon ki ravish ravish gulsitaan ki 'haami' khizaan khizaan chikhti nahin hai"

"khirad ki dhund mein aks-e-rukh-e-sahar to milaa junun-e-shauq tujhe koi ham-safar to milaa jalaa gayaa hai koi ret par lahu se charaagh rah-e-junun mein koi naqsh-e-motabar to milaa tumhaare shahr mein sotaa huun paanv phailaa kar koi makaan na milaa saaya-e-shajar to milaa kisi se dil kahaan miltaa hai is zamaane mein khulus laakh tasanno sahi nazar to milaa gham-e-hayaat ke gesu sanvar hi jaaeinge nigaar-e-shaam ko aaina-e-sahar to milaa hunar kharid ke laaeinge be-hunar kitne hamaare shahr ko ik saahab-e-hunar to milaa utaar laayaa bulandi se us ko ai 'haami' vo aasmaan kaa taaraa zamin par to milaa"

"sulh ki had tak sitamgar aa gayaa aaine ki zad mein patthar aa gayaa aag to sulgi thi daaman ke qarib aastin kaa saanp baahar aa gayaa tegh mein thi jis ke dam se aab-o-taab tegh ki zad mein vahi sar aa gayaa dariyaa dariyaa paar honaa thaa mujhe biich mein koi samundar aa gayaa dhuup mein chalne ki aadat hai mujhe Dhal gai jab dhuup to ghar aa gayaa"

"koi qatra nahin habaab nahin zindagi zindagi hai khvaab nahin muntashir ho varaq varaq jis kaa main vo dimak-zada kitaab nahin main ujaalaa kahaan talak baanTun meri muTThi mein aaftaab nahin mujh ko juuDe mein kyaa sajaaoge surkh shoala huun main gulaab nahin"

"jism baaqi hai jaan khaali hai aadmi se makaan khaali hai barf mein qaid dhuup ke panchhi par salaamat uDaan khaali hai baam-o-dar ki fazaa hai barfili chaand se aasmaan khaali hai nok-e-shamshir likh rahi hai kitaab har qalam ki dukaan khaali hai ab kisi aankh mein nahin shokhi tiir se har kamaan khaali hai be-suri baansuri kanhaiyaa ki dard ki lai se taan khaali hai ek se ek log hain 'haami' ye na samjho jahaan khaali hai"

"ham tumhaare kuche ki rasm ko nibhaaeinge phuul phuul aae the zakhm zakhm jaaeinge tum hasin phulon ko shaakh shaakh se chun lo zard zard patton ko ham sameT laaeinge dhuup ke musaafir hain dhuup dhuup chalne do hai shajar shajar nangaa sar kahaan chhupaaeinge fard fard rahne se qaafile nahin bante fard fard mil hi kar qaafile banaaeinge kuchh pataa nahin chaltaa raat kitni baaqi hai kab talak charaaghon mein khun-e-dil jalaaeinge ham buland-himmat hain tegh se nahin Darte qaatilon ki mahfil mein sar uThaa ke jaaeinge tah-ba-tah zamaane ki gard jam gai 'haami' aaina huaa dhundlaa saaf kar na paaeinge"

"sar paTakti rahi dasht-e-gham ki havaa un ki yaadon ke jhonke bhi chalte rahe shaam se taa-sahar ghar ki dahliz par ham charaaghon ki maanind jalte rahe husn ki dhuup ne zulf ki chhaanv ne nuur ke shahr ne rang ke gaanv ne har qadam par Thaharne ko aavaaz di ham ko chalnaa thaa kaanTon pe chalte rahe shahr ke moD par kal mile the mujhe mere bachpan ke din mere bachpan ki shab gaahe aankhein milin gaahe palkein jhukin gaahe rukte rahe gaahe chalte rahe kaunsaa naam dein aisi barsaat ko jis ke daaman mein paani bhi hai aag bhi huuk uThti rahi ruuh jalti rahi dil pighaltaa rahaa ashk Dhalte rahe ek manzil nahin ek rasta nahin ek dil ek jaan ek chehra nahin ye naqaabon ki duniyaa ke bahrupiye bhes lamha-ba-lamha badalte rahe shahr-dar-shahr ye khaak-o-khun ki fazaa sochi-samjhi hui ek tahrik hai unche mahlon mein baiThe rahe ahl-e-zar muflison ke makaanaat jalte rahe"