Ghazal

"chaand chhat chhoD raah par niklaa ghar ko chhoDaa to dil se Dar niklaa log kahte the vo rahi manzil umr bhar kaa magar safar niklaa aankh vaale to be-basar nikle aur ik andhaa dida-var niklaa log the muntazir kinaaron par duur kitnaa vo Duub kar niklaa aaj bachchon ko DaanTtaa hai magar khud vo kab ghar se puchh kar niklaa chaand niklaa to yuun lagaa mujh ko shab ki divaar mein bhi dar niklaa ki nazar raat aasmaan ki taraf yuun lagaa sar pe ik khanDar niklaa jis ko buzdil samajh rahaa thaa 'raaj dekh teraa hi ham-safar niklaa"

"na kar kisi ki mohabbat kaa eatibaar na kar tamaam umr tamanna ko sogvaar na kar khulus-e-dil hai baDi chiiz zindagi ke liye zaraa se gham mein garebaan ko taar taar na kar jabin-e-shauq ko paamaal kar na yaas ke naam yuun zulm apni javaani pe be-shumaar na kar unhein to shaam Dhale niind aa gai hogi sahar ke vaqt sitaaron kaa intizaar na kar kahaa thaa us ne tumhein pyaar ham bhi karte hain to us ki baaton kaa aise to eatibaar na kar ye jaan kar bhi ki london pe 'raaj hai us kaa tu meri maan le us par yuun ikhtiyaar na kar"

"har ek khvaab mein ham ne use sajaayaa bahut vo yaad aur bhi aaya jise bhulaayaa bahut ye aur baat ki ab yaad aae hain us ko vafaa ke naam pe jis ne hamein sataayaa bahut hain surkh-ru mire ashaar to taajjub kyaa ki ham ne khuun se har lafz ko sajaayaa bahut na jaane kaise khabar ho gai zamaane ko tumhaari yaad ko aankhon se to chhupaayaa bahut ham intizaar mein jis ke sulagte rahte hain vo jab bhi saamne aaya to muskuraayaa bahut hamaari aankhon ke kuuze mein band thaa dariyaa ye ji hi jaantaa hai kis tarah dabaayaa bahut vo zulf raat ki parchhaain thi magar ai 'raaj khayaal aaya hai us kaa to jagmagaayaa bahut"

"naqsh-e-qadam ke saath vo raste miTaa ke rah gaiin andhe safar ko aandhiyaan kitnaa baDhaa ke rah gaiin sab ke vajud ke liye kun ki sadaa ke aate hi arz-o-samaa ki vusatein us mein samaa ke rah gaiin haathon se kaanpte rahe sukhe hue sanaa ke phuul pesh-e-asar duaaein bhi aankhein jhukaa ke rah gaiin ek baras to bhiig le sahn bhi chhat ke saath saath aisi hi ek do khvaahishein dil ko dukhaa ke rah gaiin pursish-e-haal par tire lab to khamosh hi rahe aankhon ko jaane kyaa huaa aansu giraa ke rah gaiin kitni duaaein maangi thiin ham ne sahar ke vaaste us ki shuaaein kyaa karein aankhein bujhaa ke rah gaiin dekh ke be-samar shajar baagh mein 'raaj is baras dil ko kai kahaaniyaan yaad si aa ke rah gaiin"

"dil se koi sadaa nahin aati ab labon par duaa nahin aati zakhm dil ke jo mundamil kar de tum ko aisi davaa nahin aati dil taDaptaa hai un se milne ko is ko taskin zaraa nahin aati shahr kaa zikr kyaa pahaaDon par ghar mein taaza havaa nahin aati ibtidaa hi kaa bol-baalaa hai ishq mein intihaa nahin aati bevafaai na aa saki ham ko aur un ko vafaa nahin aati 'raaj karti hai ghar mein tanhaai rut koi khushnumaa nahin aati"

"shahr mein ruk saa gayaa kaar-e-jahaan tere baad kyaa bataaun ki gayaa kaun kahaan tere baad chikhte phirte hain sannaaTe khuli saDkon par na rahaa koi bhi aabaad makaan tere baad aankh se aaTh pahar ashk mire bahte hain dil se uThne lagaa rah rah ke dhuaan tere baad har taraf baat tiri yaad tiri fikr tiri jaag uTThe tiri furqat ke nishaan tere baad puchhnaa chaahungaa gar tu jo kahin mil jaae be-zabaan ho gae kyon ahl-e-zabaan tere baad hasratein dil mein sulagti hain mire aakhir-e-shab apne hone kaa bhi baaqi na gumaan tere baad mubtalaa 'raaj to hai dukh mein teri furqat ke shahr mein kyon na rahaa amn-o-amaan tere baad"

"apne ghar kaa pata nahin miltaa varna duniyaa mein kyaa nahin miltaa ji mein Thaani hai dil lagaane ki par koi raasta nahin miltaa ham se chhoTaa kahaan zamaane mein tum se koi baDaa nahin miltaa shahr hai aur itnaa sannaaTaa koi darvaaza vaa nahin miltaa teri basti ajiib basti hai peD par ghonsla nahin miltaa be-khatar hai safar suno jab tak raah mein rahnumaa nahin miltaa 'raaj landan mein ho gayaa lekin husn punjab kaa nahin miltaa"

"zindagi paaemaal karte ho banda-parvar kamaal karte ho zulm hai jor hai jafaaein hain kis se kasb-e-kamaal karte ho hijr denaa mizaaj hai un se kyon savaal-e-visaal karte ho vasl do-chaar saaaton ke liye hijr mein maah-o-saal karte ho ek hi dil thaa de diyaa tum ko kis liye ab vabaal karte ho vasl hai ek jis ki khaatir tum jaane kitne savaal karte ho jaan leni hai jaan le lenaa is mein kyaa qil-o-qaal karte ho dard dete ho ranj dete ho meraa kitnaa khayaal karte ho tum ko un se vafaa ki hai ummid 'raaj saahab kamaal karte ho"