Ghazal

"shahr mein ole paDe hain sar salaamat hai kahaan is qadar hai tez aandhi ghar salaamat hai kahaan raat ne aisi siyaahi ab bikheri chaar-su aankh vaalon ke liye manzar salaamat hai kahaan aap kahte hain chhupaa luun apni uryaani magar jism se lipTi hui chaadar salaamat hai kahaan qulqul-e-minaa se apni pyaas to bujhti nahin chuur sab shishe hue saaghar salaamat hai kahaan reza reza ho gai har shakhs ki paakizgi sang-saari ke liye patthar salaamat hai kahaan koi chehra asl surat mein rahe baaqi to kyuun but-shikan ke 'ahd mein aazar salaamat hai kahaan har taraf ik jang kaa maahaul hai 'aazam' yahaan aadmi ab ghar ke bhi andar salaamat hai kahaan"

"suraj ki mizaan liye ham, vo the barf ki baaT liye is haalat mein ham donon ne apne jivan kaaT liye ek hi ghar mein rahte the ham lekin donon anjaane the jab is kaa ehsaas huaa to apne raste paaT liye koi gaahak mil jaataa to achchhi qimat mil jaati biich kharidaaron ke the ham apne hunar ki baaT liye raajaaon kaa daur gayaa aur saath zamin-daari bhi gai lekin gaanv kaa mukhiyaa jiitaa hai navaabi ThaaT liye 'aazam' is vahshi duniyaa mein ham ne ye bhi dekhaa hai khuun bahaa jo apnon kaa vo khuun apnon ne chaaT liye"

"gard-o-ghubaar dhuup ke aanchal pe chhaa gae aur ghan-garaj ke shor bhi baadal pe chhaa gae ab to koi kanval nahin khiltaa hai jhiil mein ab kaanTe-daar barg hi jal-thal pe chhaa gae vo so nahin sakegaa kisi pal sukun se jab vasvase bhi aankhon ke kaajal pe chhaa gae bijli sitaare chaand shafaq aur dhuup chhaanv kaise zamin ke barhana jangal pe chhaa gae 'aazam' ise vo kahte hain rangon kaa ek fan jab daagh dhabbe farsh ke makhmal pe chhaa gae"

"sach bolne vaale ko hi ilzaam milegaa jo jhuuT kahegaa use inaam milegaa darbaar mein jo haashiya-bardaar rahe hain sunte hain unhein aaj baDaa kaam milegaa is dhuup mein saae ki tamanna na karo tum vo husn-e-mujassam to sar-e-shaam milegaa didaar ki hasrat hai to nazron ko uThaao dekho vo hasin chehra lab-e-baam milegaa jin aankhon ne gujraat ke dekhe hain manaazir taa-umr unhein ab nahin aaraam milegaa is shahr mein 'aazam' jise tum DhunD rahe ho aavaara-sifat shaair-e-badnaam milegaa"

"TimTimaataa huaa mandir kaa diyaa ho jaise teri aankhon mein koi khvaab chhupaa ho jaise pher liin tum ne nigaahein to ye mahsus huaa mujh se ruThi hui taasir-e-duaa ho jaise gunjti hai mire kaanon mein yuun aavaaz tiri koh o sahraa mein azaanon ki sadaa ho jaise apni nazrein na jhukaanaa ki gumaan hotaa hai saamne sar pe khaDi meri qazaa ho jaise un ke rukhsat kaa vo lamha mujhe yuun lagtaa hai vaqt naaraaz huaa din bhi Dhalaa ho jaise paas hote ho to mahsus yahi hotaa hai umr bhar ki ye riyaazat kaa sila ho jaise bhiiD aisi hai kise sajda karun ai 'aazam' aaj ke daur mein har shakhs khudaa ho jaise"

"qad baDhaane ke liye baunon ki basti mein chalo ye nahin mumkin to phir bachchon ki basti mein chalo sabr ki chaadar ko oDhe khvaab-gaahon mein raho sach ki duniyaa chhoD kar vaadon ki basti mein chalo jab bhi tanhaai ke hangaamon se dam ghuTne lage bhiiD mein gum ho ke an-jaanon ki basti mein chalo Daal rakkhi hai khirad-mandon ne chehron par naqaab is liye kahtaa huun divaanon ki basti mein chalo ungliyon ki zarb se saaz-e-sukun ko toD kar jab junun had se baDhe, rishton ki basti mein chalo ik tumhaari ye qayaadat mo'tabar rah jaaegi haath mein patthar liye shishon ki basti mein chalo bhiiD se 'aazam' yahaan milnaa-milaanaa chhoD kar martaba ke vaaste pardon ki basti mein chalo"

"mausam sukhaa sukhaa saa thaa lekin ye kyaa baat hui keval us ke kamre mein hi raat gae barsaat hui main ne samjhaa, us ne samjhaa, bhiiD mein bhi khaamoshi thi dekhne vaale kuchh bhi na samjhe lekin phir bhi baat hui bin maange mil jaae moti to is ko taqdir kaho daaman phailaa kar duniyaa mil jaae to khairaat hui sankaT ke din the to saae bhi mujh se katraate the sukh ke din aae to dekho duniyaa mere saat hui jivan ke is khel mein apnaa gyaan bhi dhokaa detaa hai ulTe saare daav hamaare shah bhi di to maat hui jaate jaate tanhaai kaa gham dene vo aae the tum hi bolo kyaa ye un ki ulfat ki saughaat hui 'aazam' bhulnaa chaahe bhi to ab tak bhuul na paae vo un ki yaadon se vaabasta aise meri zaat hui"

"tumhaare jaate hi har chashm-e-tar ko dekhte hain hai aansuon kaa samundar jidhar ko dekhte hain 'faraaz' ho gae rukhsat jahaan-e-faani se udaas udaas sukhan ke safar ko dekhte hain kahaan vo ishq-e-javaan ki Thahar gaiin kirnein ruki ruki hui baad-e-sahar ko dekhte hain sunaa hai 'faiz' se aage nikal gae the 'faraaz' ghazal ke soz-e-darun ke asar ko dekhte hain sunaa hai us ne ghazal kaa badal diyaa lahja sabhi 'faraaz' ke fikr-o-nazar ko dekhte hain sunaa hai us ki ghazal aaina thi hasti kaa isi liye to ham us aaina-gar ko dekhte hain sajaayaa us ne hunar se jo apni ghazlon ko sunaa hai log ab us ke hunar ko dekhte hain kahaan 'faraaz' kahaan 'aazam'-e-shikasta-jaan zaraa saa chal ke ham us ki Dagar ko dekhte hain"

"kisi ki baat koi bad-gumaan na samjhegaa zamin kaa dard kabhi aasmaan na samjhegaa samundaron pe jo chaltaa rahaa hai be-maqsad kahaan hain paanv ke naqsh-o-nishaan na samjhegaa use junun hai lafzon se khelne kaa bahut hamaari saada si lekin zabaan na samjhegaa ye sab hain ahl-e-siyaasat inhi ki saazish hai yahi hai sach jise saaraa jahaan na samjhegaa jo meri zaahiri surat se khaa rahaa hai fareb yaqin jaaniye dard-e-nihaan na samjhegaa mataa-e-lauh-o-qalam luTtaa rahaa hai jo lahu-luhaan hain kyuun ungliyaan na samjhegaa kamaal-e-zabt ke baa-vasf koi bhi 'aazam' ye kaise phaT gayaa aatish-fishaan na samjhegaa"

"jo maze aaj tire gham ke azaabon mein mile aisi lazzat kahaan saaqi ki sharaabon mein mile saari duniyaa se nahin un ko hai parda lekin vo mile jab bhi mile mujh ko naqaabon mein mile teri khushbu se moattar hai zamaana saaraa kaise mumkin hai vo khushbu bhi gulaabon mein mile zindagaani mein nasihat nahin kaam aati hai dars-e-akhlaaq faqat mujh ko kitaabon mein mile main ne phulon se bhi naazuk se savaalaat kiye mujh ko patthar se hi alfaaz javaabon mein mile pyaar ke baab mein ab naam kahaan hai teraa koi tahrir-e-vafaa kaise nisaabon mein mile kyaa pata kal jo baDi shaan mein gum thaa 'aazam' ab vahi shakhs tujhe khaana-kharaabon mein mile"

"gesu o rukhsaar ki baatein karein aao mil kar pyaar ki baatein karein bevafaai jis kaa hai tarz-e-amal bas usi dildaar ki baatein karein aaj-kal paidal safar dushvaar hai khubsurat car ki baatein karein le ke niklein ik mobile haath mein ab to bas be-taar ki baatein karein jab samajh mein kuchh na aae aap ko baiTh kar be-kaar ki baatein karein baat kaanTon ki tarah jis ki chubhe kyuun usi gulnaar ki baatein karein sulh par jab donon aamaada hue phir ye kyuun talvaar ki baatein karein jo yahaan daavaa baDe vaade kare bas usi sarkaar ki baatein karein kyuun ho 'aazam' ek mahbuba ki baat aur bhi do-chaar ki baatein karein"

"jaane vaale itnaa bataa do phir tum kab tak aaoge phuul bhi ab murjhaane lage hain, bolo kab apnaaoge dil ke is album mein to ab bas tasvir tumhaari hai man mandir ke dvaar pe apne tum bhi kuchh laTkaaoge raat ki tanhaai mein jab bhi yaad hamaari aaegi niind tumhaari uD jaaegi aur bahut ghabraaoge pairon ki zanjirein kaaTo aur himmat se kaam bhi lo varna qaid mein rah kar yuun hi jivan bhar pachhtaaoge duniyaa ki ik riit puraani, milnaa aur bichhaDnaa hai ek zamaana biit gayaa hai tum kab milne aaoge ab nahin aataa hai sandesa koi tumhaari nagri se kis ko thaa maalum ki tum begaane se ho jaaoge phulon ke din biit na jaaein aao aao aa bhi jaao kab tak jhuTe vaadon se tum 'aazam' ko bahlaaoge"