Ghazal

"jo chaahun bhi to ab khud ko badal saktaa nahin huun samundar huun kinaaron se nikal saktaa nahin huun main yakh-basta fazaaon mein asir-e-zindagi huun tiri saanson ki garmi se pighal saktaa nahin huun mire paanv ke niche jo zamin hai ghumti hai to yuun ai aasmaan main bhi sambhal saktaa nahin huun khud apne dushmanon ke saath samjhautaa hai mumkin main tere dushmanon ke saath chal saktaa nahin huun vo paudaa nafraton kaa hai jahaan chaahe ugaa lo mohabbat huun main har miTTi mein phal saktaa nahin huun unhein laDnaa paDegaa mujh se jab tak huun main zinda hisaar-e-dushmanaan se go nikal saktaa nahin huun khule hain raaste kitne mire raste mein 'azmi' magar main huun ki har saanche mein Dhal saktaa nahin huun"

"shahr-e-khisht-o-sang mein rahne lagaa main bhi us ke rang mein rahne lagaa pahle to aaseb thaa basti ke beach ab vo ik ik ang mein rahne lagaa apni sulh-e-dosti laai ye rang vo musalsal jang mein rahne lagaa tab judaa hote na the ab faasla darmiyaan farsang mein rahne lagaa us se tark-e-guftugu karne ke baad soz ik aahang mein rahne lagaa shahr-e-khush-poshaan ko 'azmi' chhoD kar vaadi-e-be-rang mein rahne lagaa"

"sang aataa hai koi jab mire sar ki jaanib dekh letaa huun samar-baar shajar ki jaanib is masaafat kaa koi ant nahin hai lekin din nikalte hi main chal paDtaa huun ghar ki jaanib kis ne aavaaz mujhe saahil-e-jaan se di hai naav kyuun dil ki lapakti hai bhanvar ki jaanib qissa-e-shauq ko us tishna-labi kaa likhnaa kar ke ik aur safar shahr-e-hunar ki jaanib phir se angaaron kaa mausam mire andar utraa phir baDhaa haath miraa laal-o-gohar ki jaanib ye jo hai surat-e-haalaat badal sakti hai kaash kar paanv safar khair se shar ki jaanib ain mumkin hai ki pathraataa na koi 'azmi' tu ne dekhaa hi nahin muD ke nagar ki jaanib"

"pas-e-divaar zindaan zindagi maujud rahti hai andheri raat mein bhi raushni maujud rahti hai sar-e-darbaar-o-maqtal ek saa mausam anaa kaa hai garaan sar mein hamesha sar-kashi maujud rahti hai ravaan rakhte hain ham ko dasht-e-dariyaa dhuup darvaaze saraabon se safar mein tishnagi maujud rahti hai nazar se joD rakhtaa hai ye dil aise bhi nazzaare ki baad-az-marg bhi hairaangi maujud rahti hai bahut aasaan raahein bhi bahut aasaan nahin hotin sabhi raston mein thoDi gumrahi maujud rahti hai miri sochon mein yuun rach bas gae hain shabnami mausam tavaatur se tah-e-mizhgaan nami maujud rahti hai talaatum mein sadaa rahti hain kirnein husn-e-taabaan ki nasib-e-dushmanaan kuchh barhami maujud rahti hai nikal paataa nahin main kucha-e-be-naam se 'azmi' ki asbaab-e-safar mein kuchh kami maujud rahti hai"

"ehsaan-e-sang-o-khisht uThaa lenaa chaahiye ghar ab koi na koi banaa lenaa chaahiye itni ghalat nahin hai ye vaaiz ki baat bhi thoDaa bahut savaab kamaa lenaa chaahiye haalaat kyaa hon agle paDaav pe kyaa khabar sapnaa yaa sang koi bachaa lenaa chaahiye vo raat hai ki saaya badan se hai munharif ham kis jagah khaDe hain pataa lenaa chaahiye dushman yaa dost kaun khaDaa hai pas-e-ghubaar jo so rahe hain un ko jagaa lenaa chaahiye husn-e-butaan ki baat hi 'azmi' chhiDi rahe mausam kaa kuchh na kuchh to mazaa lenaa chaahiye"

"ajab hi Dhang se ab anjuman-aaraai hoti hai jahaan par bhi rahein ham saath mein tanhaai hoti hai fatuhaat-e-dil-o-jaan par yuun mat itraa mire lashkar ki is maidaan mein fil-faur hi paspaai hoti hai ye mela vaqt kaa hai haath us ke haath mein rakhnaa bichhaD jaaein yahaan to phir kahaan yakjaai hoti hai ham aise kuchh bhi kar lein un ki tah ko paa nahin sakte amir-e-shahr ki baaton mein vo gahraai hoti hai salaasat se bayaan ahvaal-e-dil karnaa hai ik khubi basaa-auqaat chup rahnaa bhi to daanaai hoti hai zabaan-e-khalq goyaai ke gauhar to luTaati hai labon par jo nahin aati vahi sachchaai hoti hai"

"bagule rahnumaa hain baad-e-sahraai safar mein hai rukein kaise hamaare saath rusvaai safar mein hai khabar bhi to nahin hai ab kidhar ko jaa rahe hain ham saraabon kaa safar hai aabla-paai safar mein hai ye basti hai ki zindaan kuchh bhi to palle nahin paDtaa the kab pachhuaa ke din aur kab se purvaai safar mein hai kahaan se aaiin kaanon ke liye rim-jhim si aavaazein jaras ik lafz-e-paarina hai shahnaai safar mein hai azal se taa-abad hai kaar-farmaa gardish-e-dauraan ki naadaani hazar mein aur daanaai safar mein hai use sadiyaan lageingi niind se bedaar hone mein abhi aaghaaz kaa mausam hai angDaai safar mein hai koi aahaT banaati hi nahin ummid kaa mausam kuchh aisi chup lagi hai jaise goyaai safar mein hai akele-pan kaa 'azmi' ho bhi to ehsaas kaise ho tasalsul se hamaari shaam-e-tanhaai safar mein hai"

"vafaa ke baab mein kaar-e-sukhan tamaam huaa chalo ki rishta-e-ruh-o-badan tamaam huaa kitaab-e-hijr-e-musalsal khuli hamaare liye ki baab-e-vasl sar-e-anjuman tamaam huaa ajiib dhuup sar-e-sehn-e-tan utar aai mizaaj tursh huaa baankpan tamaam huaa basaaraton ko sameTo bujhaa lo aankhon ko bayaan-e-karbal-e-sarv-o-saman tamaam huaa rafu-gari kaa hunar siikh to liyaa 'azmi' numud-e-fan mein magar pairahan tamaam huaa"

"be-sabab vahshatein karne kaa sabab jaantaa hai main jo kartaa huun vo kyuun kartaa huun sab jaantaa hai bolte sab hain magar baat kahaan karte hain ye saliqa to koi mohr-ba-lab jaantaa hai mujh se gustaakh ko vo kaise gavaara kar le jab ki vo shahr-e-sukhan hadd-e-adab jaantaa hai apne hi Dhab se vo kartaa hai miri chaaragari kab chamaknaa hai miraa taale-e-shab jaantaa hai kaise mausam mein kahaan raahat-e-jaan utregaa aisi sab baatein dil-e-ranj-e-talab jaantaa hai bhuul saktaa hai use ye dil-e-ayyaar magar chashm-o-abru kaa fusun lazzat-e-lab jaantaa hai muskuraa kar jise miltaa huun hamesha 'azmi' ik vahi meri udaasi kaa sabab jaantaa hai"

"ba-zaahir rang khushbu raushni yak-jaan hote hain magar ye shahr andar se bahut viraan hote hain koi maane na maane guftugu karti hai khaamoshi pas-e-divaar-e-hasrat bhi kai tufaan hote hain ulajh jaaein to suljhaane ko ye umrein bhi naa-kaafi taaaruf ke agarche silsile aasaan hote hain saraabon ki khabar rakhnaa gharon ko chhoDne vaalo kai ik be-dar-o-divaar bhi zindaan hote hain yahaan saari ki saari raunaqein reg-e-ravaan se hain bagule hi to registaan ki pahchaan hote hain palaT aane kaa rasta aur hi koi banaataa hai musaafir sab ke sab anjaam se anjaan hote hain to phir aankhon mein sapne ek se kyunkar nahin ugte lakiron ke agar donon taraf insaan hote hain safar to chalte rahne ki lagan se shart hai 'azmi' jinhein chalnaa bahut ho be-sar-o-saamaan hote hain"